Jacob 1:22 Himahleh noumau kikhem in ngaikhete leltak hilou in thuzuite hizaw un.
Ka naupan deuh lai a ka khua ua upa khat’ thugen, ka theihgige a om hi. Ama’n hichi’n a chi a, “Ka neu lai in, ka pate’n laisim ding in honsawl sek ua, amau pau dang bangmah theih nei lou ahihman un, gen neiloupi a ka kikou balbal chiang bangin laisim tha-it ahonsa ua, a kipak thei mahmah sek uh. Kumtawp exam ahong hun a, tua ah ka fail; ka nu leh pa khem ka kisak leh “kei-le-kei kikhem” ka na hi maimah a, lou ka khoh hongngaita hi. Vuahzu nisa thuak a ekmong gawzen a ka pan inle kum khat kham di ka khohkhiak louh hun atam mahmah” a chi hi.
Limchiinna khawvel a I om lai in, khemna leh kikhemtheih dan gen seng louh a-om hi. Khem zoh a om a lauhhuai mahmah lai in, huai sanga lauhhuai zaw leh khawk zaw tuh MAHNI KIKHEM ahi. Kuahiam khat in honkhem a, khem zoh a i om leh a honkhemtu inle I thiltuah ah mohpuak khakna anei ngei di’a, himahleh eimah leh eimah (mahni) I kikhem chiangin kuamah hon mohpuakpih ding leh I ngohsawn di a omkei hi. Thamlou in, mahni kikhemna ah a’ nunggu thuak ana khawl diak le abang a, kiphawkkhiak leh zonkhiak le abaih kei a, ahihbei mahle a baihsam kei hi.
Laisiangthou ah zuau kihilhtuah louh ding leh khemna lak a pilvan dingdan tampi hilh in I om. I Bible simna mah inle Pathian thu I zak leh theihte I zuihtuan kei leh mahni kikhem bang lel I hihdan hilh in i om uhi. 1 Korinth 3:18 ah “Kuamah, amah-le-amah kikhem kei hen” chia hilhna I mu hi. Mahni kikhem I chih chiangin, adik atang theinapi a zuih noplouhna, thumanlouhna, mahni hihnatak hiloupi, ahi dan a omna, mahni hihna sanga thupizaw a kikoihna, mahni hihna tak sanga hihna louhpi a lat utna leh adangdang tampi a om di.
Mahni kikhemna hong kipatna tuh mahni-le-mahni kitehpihna apat ahi akichi hi. Sawltak Paul in hichibang te tuh, “Amau-le-amau kiteh in amau leh amau kitehpih in lungsim neilou in a om uhi ” achi hi (2 Korinth 10:12).
Hiai dan a mahni kikhem, TOUPA Jesu’n A taihilhte lak a khat tuh Leodisia saptuamte ahi. Amau kikoihna dan leh TOUPA Jesu muh leh koihdan a kigamla mahmah. Amau tuh, ‘Ka hausa, hauhsaknate ka neita, bangmah ka kitasam kei’ chi mah le uh, Toupa Jesu’n, “Mi genthei nuamsa lou, zawng, mitdel leh vuaktang na hihlam kithei lou a, ‘ka hausa, hauhsaknate ka neita, bangmah ka kitasam kei’ na chih ziak in; Kei akipan in dangka-eng mei a hih siangthousa lei ding in K’on thuhilh ahi, na hong hauhsak theihna ding in; puanngoute na honsilh a, na vuaktang zumhuaina a dawklouhna ding in; huan na muh theihna ding in na mit a nuh ding mitlou lei in” chi’n a thuhilh hi.
I Kristian hinkhua ah, hiai bang kilimbawl leh mahni kikhem a poisau didan, ngaihtuah in I nei kha ngei hia? Mimal hi’n a pawlpi hitaleh, midangte adi’a ettontaak (model) bang kisak khak a, ataktak alah Pathian hontheih dan toh na kigamla lua, a muatgawp (decay) pi hihkhak di thil omthei, pilvanhuai mahmah ding na hita e chih hon ngaihtuahsak hi. Mahni kikhemtawm a, Va-ak, Utong a ut ziak a Utong mul akibulh hang a Utong suak tuan theilou a, Utongte hi’n a chipih va-akte lak a nuihzabuk asuah maimah bat khaktheih hinkhua ah pilvang ni. Pathian zaw zekhem a mawkbawl vual ahi kei; mi’n a tuh peuh uh huai mah a at nawn ngei ding ahihziakin (Gal 6:6).
Thilbangkim ah sahkhuana hi’n khawvel khosakna vai ah hitaleh, mahni kikhem hi a poina alian mahmah hi. Mahni chiat kivelthak in, i khalam dinmun bang houh chiangkuang lou a I kitheih a, kimuanmohna leh lungnoplouhna bang I neih leh Kumpi David, Sam 139-a a’ thumna - Pathian aw, ngentel tak in hon ensuak inla, ka lungtang thei in; honchian inla, ka ngaihtuahnate thei in. Kei ah gilou-salou lam mawngmawng a om hia omlou, en inla, tangtawn lampi ah honpi in (t. 23-24) – koppih in chih taktak in thum le’ng, Ama’n lampi dik ah honpi ding hi. Tua bang ding in TOUPA’N simtute hon vualzawl chiatta hen!
