Korinth Khua A Saptuamte Kiang A Laikhak

1. KORINTH KHOPI: Hiai khopi tuh mitampi tenna, khopi hausa tak, Achaia gam a Romete Capital ahi. BC. 1200 malam pek apan hiai khopi dingta hiding a gintak ahi. Himahleh Rome kumpi tung a, a hel ziak ua tawlkhat sung suksiat dimdem a om in, huai nung kum zakhat bei in Julius Caesar in hon lamthak nawn hi. Suah, tum, sim leh mal sumsinna lampite hiai khopi a kisutuah vek ahihman in sumsin mite ading in mun poimoh tak suak hi. Sumsinna munpi a hihman in nam tampi teng khawm ua, pau-le-ham, tawndan leh chindan banah biakna tuamtuamte’ ten khawmna munpi suak hi.

2. KORINTH KHUA A BIAKNA: Korinth khopi simlam feet 2,000 vel a sang ah Acrocorinth kichi om hi. Huai ah itna leh chiphatna pathiannu kichi Aphrodite temple om hi. Hiai temple a siampi nasem numei kizuak 1000 vel ten mite na kipolh pih zel uhi. Milim pathian dang khualzinte pathian Melicertes, tuipi pathian Poseidon, gahphatna pathian Demeter leh Kore, hihdamna pathian Aclepius Aigupta pathian Isis; kumpite biakna emperor cult om hi. Paunak khat “Korinthiazo”- Kotinthte bang chih thumal tuh “Numei leh pasal kal thang tatna” genna a kizang paunak tualleng mahmah khat ahi.

3. KORINTH KHUA SAPTUAMTE: Paul Missionary khualzin 2veina, AD. 51-52 vel in Massidonia sapna a muh dung zui in Philippi Masidonia galkai in, Amphikoli, Appolonia, Thessalonica, Beriah leh Athen tawn in Korinth tung suk in kha 18 om uhi. Priscilla leh Akuilate inn ah tung in anu toh puanbuk bawl nna sem khawm uhi. Khawlni teng in Synagogue ah Judate leh Greekte kiang ah kuhkal takin Pathan thu sinsak zel uhi. Mi tampi in Pathian gingta a baptisma tang in Saptuam kiphut khia hi. Appolo in saptuam kem a Priscilla leh Akuilaten leng kithuahpih zel uhi. (Na.18:1-8,24-28; 1Kor.3:6)

4. LAIKHAKTU LEH A KHAK HUN: Korinth khua saptuamte kiang a laikhak tuh sawltak Paul gelh ahi chih muanmoh huai louhna san tuh a pau zatdan leh a laigelh paidan ah chiang mahmah kichi hi. A hun thu ah AD. 54-55 vel a gelh hiding a gintak ahi (16:5-6).

5. KORINTH SAPTUAMTE TOH PAUL KIZOPNA: Sawltak Paul Missionary khualzin 2veina AD. 51-52 lai in Korinth khua ah kha 18 om in huai hun in Saptuam phut hi (Nas.18:1-8). Khosung boruakten Saptuam peh in buaina tuak uhi. A buainate uh toh kisai Chloe mite ban ah Stephenas, Fortunatas leh Achaicus-te tungtawn in za hi (1:11-13; 7:1; 16:17). Paul in Korinth a va phak leh laikhakte toh kisai a tomkim in:-

a). KHAT VEI PHAKNA: Ahun AD. 51-52 vel ahi a, Missionary khualzin 2veina kha 18 atam sung mah a Saptuam leng hong kipan khia ahi. (1Kor.2:1-3; Nas.18:1-18)

b). NIHVEI PHAKNA: Ahun AD.55 vel, Ephesa a kum 3 a om sung a Timothi apan Korinth khua a Saptuamte tanchin a zak a liam leh nasa mahmah a’ a vehna (painful visit) (1Kor.4:17; 16:10; 2Kor.1:15;2:1,5; 7:2; 12:14;13:1-2)

c). THUMVEI PHAKNA: Ahun AD.56-57 kha 3 va om in Juda ginglouten thah na sawm uhi. (Nas.20:2-3; 2Kor.13:1) Paul in hiai khua awlmoh leh puakgik a nei a hihna kilang hi.

6. LAIKHAKTE: Korinth saptuam in buaina a tuahte uh toh kisai amau mahmah in lai a’ a gelh ban uah mi kisawl in Paul kiang ah va hoh uhi. Huaite ziakin Paul in leng awlmoh huai sa in 4vei mahmah laikhak hi, tuate tom chikchik in en khawmni:-

a). LAIKHAK KHATNA: Agelh hun AD.53 Paul Missionary khualzin 3veina, Ephesa a kum 3 a om sung a, a gelh mi dukdak loute (immoral) toh kithuahlou ding a hilhna (5:9-11) Bible a bel omlou ahi.

b). LAIKHAK NIHNA: A hun AD. 54-55 vel hi a, Laisiangthou a Korinthte kiang a Paul laikhak 1na chi a i theih pen uh ahi. A khakna san- Saptuamte misawl Stephenas, Fortunatas, Achaicus leh Chloe inkuante apan buaina thu a zakte dawnna ding a’ a khak ahi (1:11-13;16:17).

c). LAIKHAK THUMNA: Ahun AD. 56 vel ahi a’ Paul a na simmoh mahmah ziak un laikhak khauh (severe letter) khak in Tita posak a, Korinth-ten lungkham pih mahmah uhi (2Kor.2:4; 7:4,8-9, 13-16). Hiai pen zong i Laisiangthoute ah laikhak thumna dan a omlou in a thu khenkhat kigelh chih dan ahi.

d). LAIKHAK LINA: A khak hun AD. 56-57 vel lai hi a, hiai pen i Laisiangthou ah Korinth Saptuamte kiang a sawltak Paul laikhak 2na chi a i neih uh ahi. Sawltak Paul Philippi a omlai in Korinth khua a saptuamte kisikna thu Tita tung tawn in za a, huaiziakin amaute hanthawnna ding laigelh in Tita leh a sanggamte posak hi (2 Kor. 8:16-20).

Korinth Saptuam sung a buainate Korinth laikhak 1na bung 1 apan bung 8 nikum a sinnate uah kim leh chiang takin na kigelh ta hi. Tukum in a ban sin ding i hihman un kithalop huai mahmah hi.