“Diktatna in nam a tawisang a: himahleh khelhna mi kuapeuh adi’n zahlakna ahi”.
Paunakte 14:34
October 2014 bul lam hi in ka thei a, Dehradun a State Forest Service (SFS) trainee-te East India tour a pai kava makaih (tour in-charge) hi. Huai tour a ka mangngilh theihlouh ka tuahkhak ka hon taklang ut hi. Meghalaya a mun tuamtuam en zou in Shillong a kipan Assam a Kaziranga National Park (KNP) ah ka lut uhi. KNP ka tun un Assam Forest Department staff-te’n hon’na vaidawn in, singpi leh nektheih hon pia uhi. North-East (NE) mi India gam thuk a SFS officer trainee 20 val va makaih ahon muh un hon’na kipahpih mahmah uhi.
Room khat a forest officer-te toh singpi ka dawn khit kuan un hichi’n ka houlim uhi. Heutupa, nang’ NE mi-khat huai a faculty a va om thei ko’n kipahpih lua uhi. NE a koi State a kipan na hi a? Ke’n Manipur State a kipan ka hi ka chih leh, ahi maw koi District a kipan chih hon dong nawn uhi. Churachandpur district a kipan ka hi chi’n ka dawng hi. Huai takin, ahihleh Paite mite na thei kha di maw? Hon chi nawn uhi. Ke’n le, “Hi, thei e, kei le Paite community a kipan ka hi” chi’n ka dawng hi. Huai ka dawnna a zak tak un a melput dan uh hong lamdang ta hi. A ban bangmah gen nawn kei mahle uh, kipak lou ahih uh ka muthei hi. Bangziak ahi dia le?
KNP sunga Chingpi (Rhino) solkal in bittak a a kepbit ziakin, I gam India, khovel theih tham a Wildlife Conservation hihhoih a chiamteh in om hi. Tuchiang in hiai KNP sungah Chingpi 2,500 val om ta hi. Chingpi ki (horn) a mantam luat ziakin poacher-te’n vakap sek uhi. Solkal in huai dalna dingin KNP sunga sem forest official-te thau (gun) pia ua, a kul leh mi kaplup theihna power pia uhi. Huchibang dinmun ah Assam forest official-te’n Chingpi kap dia vakuan sekte lakah Paite mi om uh chih thei mahmah uhi. Huai ziaka, Paite community a kipan ka hi ka chih leh kiguih phial hi ding un gintakhuai hi! Khelhna pen nam zahlakna tuntu ahihdan a tak in ka tuak kha hi.
Tua a tunga I gen KNP ka hoh ma tham un ka lawmte khat in, NE a ka zinna mun khat ah, awlchik a kiza mialmial in, “hiaite lawi a khenchia pahtakhuai la’ bang, khenchia la’h iplahhuai’ chih hon gen kha hi. Aban a gen zelna ah, “ahih fuh chiang ua sawm-a-khat bang tampipi hong lutthei” hon chi zomah lai hi. Ke’n huailai in hiai Chingpi kapte gen hidi’n kana ngaihtuah kha kei himhim hi. A khonung a ka ngaihtuah thak leh huaite gen ana hi di’n ginmohna ka nei hi.
Hiai a tunga ka thiltuah tungtawn in I kivel thakna di tampi om hi’n ka thei hi. Khatna ah, sum deihtak luatna ziaka sih theihna mun a va gamtang hi ding uhi. Nihna ah, tuabang a gamtang mi tawmchikte ziakin I nam in minsiatna ki-ngah hi. Thumna ah, tua bang gamtat hoihlou a kipan sum a muhte uh Saptuam a thoh pawl om hihtuak hi.
“Dangka sum deihtak zaw gilou chiteng bul ahi ngal a; huai tuh khenkhatte’n a eng ua, ginna a pai mangsan ua, amau leh amau lungkhamna tampi’n a kisunlet tektok uhi”. 1 Timothi 6:10.
Pathian, lei leh van siampa’n, tuabang summuhna a kipahpih gintakhuai lou hi. I sum muhnate Pathian mitmuh in a siangthou diam? Kivel thak chiat ni !
