Tukum sung tawntung a thupi a i zat kipumkhatna i chih a hoihna leh poimohdan kigen zoulou ding hi. Kipumkhat a deihlou, utlou leh nuam a salou gingtu diktak om ding in gintakhuai lou hi. Gingtute a ding in Jesu Khrist apan ki-it ding leh lungsim munkhat a om a kipumkhat a om dia sinsak leh thupiakte i hi uhi. Tua bang a ei gingtute ki-it ding leh kipumkhat ding tuh Pathian’ deihdan leh nungzui i hihna uh kilatna poimohpen ahi a, theihtawpsuah a panlak ngai hi.
Tua bang gingtu leh Khrist nungzui hihna i latsak theihna, tua kipumkhatna leh ki-itna biahlamtak in suksiat theih a, pilvan ngai mahmah hi. Tua bang a kipumkhatna a suse theite lak a a langsarpen dia muanmoh tuh ‘EGO,’ ei pau a thumal khat a om geihlou, kisaktheihna, kiletsakna, kithupisakna, kideihkhopna chih thumalte huamkha vek thumal ahi. Mihingte’n ego kinei vek - ngeinadan a ei mimal poimoh kisakna leh tua mah a hong lohchingsak leh tupte hong tangtunpih; a lehlam ah lah tua mah khoihkhelhkhak ngeingeileh sunglam a kipah gu lauhuai mahmah hon kangtumsak thei lauhuai ahi hi. Hiai ego khahzankhelhkhak in mimal hinkhua a siatna thupitak leh khotang a buaigawpna tan hon tun thei hi.
Hiai ego zatkhelh lauhhuaidan Laisiangthou in hichi bang in vauhilhna hon na pia hi. Paunakte 16:18 ah, “Kisaktheihna siatna ma ah a pai a, huan lungsim ki-uangsak pukna ma a,”’ a na chi a; huai mah I Korinthte 10:12 ah hichi in a na gennawn hi, “Huaiziak in ding a kingaihtuah pilvang hen, huchi lou in zaw a pukkha ding hi.” I saptuam hitaleh khotang hitaleh i kipumkhat theihlouhna ziakte lak ua khat tuh hiai ego zangkhial/ zuikhial kihikha lou ding ahi diam chih ahi.
Huan hiai a ding a a damdawi Laisiangthou mah in a hon gen a om a, huai tuh “Kingaihniamna” kichi ahi. Kingaihniamna tuh ego toh kikalh geih ahi chi le’ng kikhial lou ding hi. Hiai kingaihniamna in midangte muhsitna a neikei a, mahni deihdan leh muhdan kia chi teitei tentun lou in; midangte’ muhdan, geldan, bang zong koppih theihna nei hi. Ego in ‘kei’ chih thupisak mahmah hi. Huaiziak in Toupa Jesu’n Matthai 23:12 ah hichi in na chi hi. “Kuapeuh kiliansak a dai ding, kuapeuh kingaineu pahtawi in a om ding hi.” Huai toh kizawitawn mah in St. Paul in Philipite 2:3,4 ah “Kikhenna ding leh kithupisakna ziak in bangmah hihkei un; lungsim niamlaak in michih in amah sang in midang hoihsazaw hen. Na lak ua kuapeuh in amah a ding kia enlou in, midang’ a leng en sam hen,’ a na chi hi. Hiai Laisiangthou taangte Pathian thuhing dik gigete ahihman un mihing ngaihdan sang in dikzaw leh muanhuaizo thamtham uh hi.
Huaiziak in, tukum i thupi a tangtun taktakna’ng in Laisiangthou’ sinsak bang a kiniamkhiatna poimoh hilou i hi diam? Huchi lou a kiniamkhiat ut khollou lai i hihleh bel i ego mah vak/an pia (feed) lailai kihikha ding hi. Huai tuh kilemna leh kituahna’ng hilou in kikhenna, minsiatna leh vuallelhna i maban ding hikha ding hi. Nipini zat nuam.
