Hiai Laisiangthou tuh i Toupa Jesu akimat ding nitak a nungzuite toh ankuang umkhawmna a neih khit ua, Gethsimani huan a A thumna kammal ahi. Toupa Jesu Siampu’ thumna kichi in seh thum in kikhen hi:- Johan 17: 1-5, Amahmah ading a thumna; 17: 6-19, Nungzuite ading a thumna; 17:20-26, Leitung pumpi pumkhat a suahna di’a thumna.
Gingtute tuh a kipumkhat thei dingte I hi – I pa uh akibang ahihman in (Jn. 1:12) I man uh zong pasal a hi’n numei a hitaleh atamzaw om lou, akikim I hi uh (1 Kor. 6:20). Heutu (rabbi) leh tou khat a neikhawmte hihang (Mat. 23:8). Pitu Khasiangthou khat in a honpite zong I hi lai uhi (Jn. 16:13). Lampi khat a paidan kibang a ton khawmte I hi (2 Kor. 5:7). Gou leh gamh luah khawm dingte mah leng I hi sawnsawn lai uh (Rom 8:17). Jesu Khrist pumpi hiangte I hi vek lai uhi (Kol. 1:18).
GAL KIBANG: Tuate banah, I gal, i melmapa Setan akibang; galpa douna ding galvan zong, numei aa, pasal aa om tuam lou, Khanamsau Pathian thu i zat khawm ding, aneu-alian in i zat khawm theih ding, a ki-fit lou omlou, neu lua, lian lua, gik lua, zaang lua chih om lou hi. Melma khat galvan kibang a dou khawm dingte I kipumkhat kei leh melmapa’n zoh nop hon sa law kha ding ahihman in panla thak zelzel ni.
LOUMA KIBANG: Khristian gingtute tengteng louma tuh Piangthak nai lou leh Pathian thu za nai lou tengteng ahimai uhi. Gingtu teng hatdan, awlmohdan, siam dan, sepdan kibang kim keimah leh louma khat a pangkhawmte I hihman un a kisimmoh thei ding om lou leh a kithupisak tuam ding leng kuamah om tuan lou, a seem tamtam in gah tam at ding, a seem tawm in gah tawm la ding ahimai hi. Amun ah na kuan theih kei leh, lou neipa’n honphut kei, nang toh kituak panna ding zong om ahi.
BUHCHI KIBANG: I buhchi ding tuh Gospel/ Tanchin Hoih, Jesu Khrist tatna thu, Laisiangthou bu sawmguk-le-guk sung ah a dim tak in om kiikeih hi. Kua kiang hiam a vazon tawm ding leh na valei tawm ding ahih louh man in na ngap zah leh nang toh kituak, na pawi (sowing the seed) thei gige chih thei in.
LOU NEIPA KIBANG: Gingtute kibatna tampite lak a khat nawn tuh lou neipa khat nuai a seem khawmte I hi uhi. Hia khovel gam tengteng tuh Pathian louma, nam chih pau chih, mivom-mikang, azawng-ahau, a pil leh mawlte Pathian’ siam, a khutsuak, a it mahmahte I hihman ua i zak kim ding ua A deihthu tuh TANCHIN HOIH ahi.
Kibatna tampi neite I kipumkhat theihna ding in:-
KI-ITTUAHNA NEIH KUL: Itna in khelhna khempeuh khuhmang zou a, itna sung ah migitna, lungduaina, kiniamkhiakna, thuaktheihna, nunnemna leh dohzohna chihte om in, hazatna, huaihamna, enna, muhdahna, hehna, thangpaihna chihte om lou hi. Huaiziakin, gingtute kipumkhat theihna ding in khat-le-khat ki-ittuahna mah poimoh pen ding hi. Ki-ittuahna puan bang zawng khawm ni.
TANGPI LUNGSIM NEIH KUL: Kipawlna khat peuh ah kei thu, kei deih, kei ut, kei duh, kei zak, kei muh chihte leh “Ka”/ “Kei” chih khawng kizang tam kei henla, midangte thu, midangte deih, midangte ut, midangte duh, midangte zak leh midangte muh koppih thei ding in kibawl lem ngap phot phot le’ng, mite’n zong ei a hong koppih theih hun uh hong om ding a, kipumkhat himai ding hi.
KIZAHTAK TUAHNA NEIH KUL: Na thupisim louh mi khat na zahtak kei ding a, hon thupisim lou mi khat mah in (nang) zong hon zahtak kei lai ding hi. Mi i neu muh leh min zong hon neu muh, I thupi sim leh min zong hon thupi sim dng hi. A taktak in siamdan kibang lou, hoih dan leng kibang lou, hoihna lam nei chiat, I hih mah bang ua hoih louhna lam nei chiat leng I hivek nawn uhi.
Huaiziakin, ei muh dan, ei zak dan, ei theih dan chiang a thukhen sawm pah lou in, min bang achi muh ua, bang achi zak ua, bang achi theih ua, chihte ngaak kawm in khawdak zek phot le’ng, khial tam lou deuh ding, midangte toh kipumkhat thei zaw deuh ding hihang. Toupa Jesu thumna mah bang in eimah ading kia a thum lou in, Gingtute ading leh leitung pumpi ading a zong a thum di’a Toupa’n hon lamette ei Khristian gingtute I hi uh. Gingtu masate lungsim mun khat leh phatuamngai tak a a thum zel bang ua om ding in Toupa’n misiangthoute hon vualzawl hen!
