Khovel a hinkhua i zatlai un, mimal a i ki-etchian ua, ki-etthak zel poimoh ahi chih i theih uh kul hi. I gam uh leh tua i khang uh (generation) i et chiangin lungzinhuai petmah hi. Mitamtakte’n thilhoihlou omte i gen chiang in “khovel paidan ahi,” chi in ngaikhawk lou in, limsak ngeilou uhi. Bible in a gen bangin khovel zaw hoihlam manoh a pai zaw hilou mah ahi. I Pathian thu in hun hong omzel ding ah khovel siatgawp ding kia a gen a, huai bangmah in siatna lam manoh hi (2 Timothy 3 sim in). Himahleh theih ding khat bel, khovel in siatna lam manoh mahleh ei Khrist a omte khovel zui a, siatna lam manoh ding i hi uh chih hi zenzen lou ahi. Huai nak sang in Khrist enton a, Amah a khanglian dingte i hizaw uhi.
I khang uh kipahna dan theilou leh mahni angsung di kia ngaihtuah mi in kidimta hi. Hinkhua a phun den, lungkim louhna a dim, i hamphatnate uh thei theilou khang i hi uhi. Neih bangbang leh neih dandan a lungkim mai sawmlou a, vualzawlna simseng louh a tante uh en a, huaite sim a kipah nak sang a, neihlouhte sim a, ngaihtuah a, Pathian’ mitmuh a phun kitam mahmah hi. Tua Pathian vualzawlna i tante ua kipahna leh lungkimna neilou a i omna uh leh neihlouh thilte enlah a, i ngaihtuahnate uh kha Pathian’ ma-a i phunna uh ana hisek ahi. Hiai bang a phun hat leh kipahna dan theilou khang in bangchituk in hon vualzawltu i Pathian lungsim i nasak di’a?
Mihingte kiduh-am deuhdeuh a, mahni angsung ding kia khual kitam deuhdeuh hi. Khat nei pa’n duham takin nih deih beh a, huai bang mah in nih neipa’n thum nei leng ka lungkim ding chi in, thum a deih beh sek hi. Himahleh i theih di’a hoih ka sak tuh, tua na neihte a na lungkim a, na lungsim a kipah keileh za (100) neihbeh lechin leng na lung a kim thei tuan kei ding hi. Khovel duhamna leh khovel etlahna in a hinkhua uh a zohte’n bangzah a tam khovel thilte nei mah uleh leng lungkimna ngeilou ding uhi. Pathian thei a, A vualzawlnate manphat dan theisiamte tantawk a lungkimte ahi uhi.
Maban (future) ding mihing bawltheih leh mihing khuta om bang a ngaihtuah a, maban ding ngaihtuahna leh ta leh naute khualna paulam a zang a, duham tak a khovel thilte delh kitam law mahmahta hi. Mihingte maban pen Pathian khut kia ah om a, mihing in ei hinkhua leh maban dingah bangmah thuneihna kineilou hi. Tua neih-le-lam (wealth/ possession) i neih lelte leng Pathian, lei leh van siamtu’n honpiak ahi chih theih ding ahi. Pathian in honpe ut kei leh bang chituk in naa sem lele, bangmah i muh leh i neih ding om tuanlou ding hi. Alehlam ah, Toupa’n a vualzawl utte bangmah/ kuamah in daal (block) theilou zel hi.
A tunga i gen bangin, maban dinga lungkhamna leh lungngaihna in tua Pathian vualzawlna i tante ua lungkim zohlouhna honpia hi. Tulai khangthakte (new generation) Toupa a kipahna dan theilou in kidim a, mi’n Toupa a kipahna a neihlouh chiang in duhamna in pumdim a, a gamtat khohei uh khaatna (bitterness) in dim sek hi. Sam gelhtu in, “Naupang ka na hi a, tu in tek ka hong hita a, himahleh mi diktat limsaklouh a a omlam ka mu ngeikei a, a suante khutdoh leng ka mu ngei sam kei hi” chi’n ana gelh hi (Sam 37:25). Huaiziakin, maban ding pen ei mawk lungkham in bangmah phattuamna hon tunlou ding a; huai sangin bangkim tunga thuneitu i Pathian deih bang in omphot lehang, ei kia hilou i suante tanpha taisan lou di’a, tasam a hon koihlou ding hi.
Tantawk a lungkimlou, mi duhamte ziaka innsung, gamsung leh i saptuam sungte uah siatna nasatak tung khinta hi. Khenkhat in a neihlouhte uh a neih theihna ding un guk thoh ua, a khente a neih uh deihkhoplou in tamseem a neihtheihna ding un nekguk kipan ua, lam tuamtuam a diklou pipi a sum-le-pai muh sawm leh mutu kitam law mahmah hi. Khenkhat in mi neihsa laksak, a tamzaw a neihna ding ahihnak leh tualthah (murder) tanpha leng poisalou ki-omta hi. Innsung ah duham luatnate ziakin kiphunsanna, kinaknate tung sek a, huaite’n innsung nopna ding teng suse khin in innkuan kisiatna leh kikhenna bang om hi. Huai kia hilou in, nu-le-pa leh tate tantawk a lungkimna neilou a, mahni kingaisia (depress) a, mahni kithat (suicide) leng tam mahmah hi. Hiai bang mite’n Pathian a neih masak kei uleh khovel pumpi nei mah uleh leng lungkimna diktak nei tuanlou ding uhi. Lungkimna diktak Pathian akipan ahi ngal a.
Mihing khat in kipahna dan a theihlouh chiangin amau sanga haksa zawte leng a panpih thei kei ua, mikhial, hoihna neilou a Toupa’n ka khelhnate Ahehpihna vang a hon ngaidam ahi chih kitheiloute’n a mihinpih uh itna taktak toh a enthei kei uhi. Mahni maban di kia ngaihtuah a, innsak-innkhang a genthei liangvaite, gilkial leh dangtak te mubanlou mi kitam mahmah hi. Ke’n ka ne dia, kei ka hing di’a, ke’n ka nei ding chih lunggelna in mi tamtakte lungsim luahta hi. Ka sepsuahsa, ka lohkhiaksa hive’n, mi adi’a nasem lah hilou ing a chih lunggel nei a, Pathian a petu leh vualzawltu ahih theiphalou, Pathian in midangte a dinga vualzawlna hi dinga a vualzawl ahihlam kitheilou mi kidimta hi.
Upa naikei mahle’ng ei singtangmite lak a pi-le-pute tawndan hoih i na zuih uh tamtak ka theihkhak a om hi. Huaite lak a khat tuh, khosung khat ah kua hiam in sa (gamsa) bang honmat chiangin, sa man pen in a sa amah kia a tang veklou in, kho mipite a kuanthei teng kuan in, sa vakipaw nainai sek hi. Tam kei mahleh a sa kihawm dialdial sek hi. Tu khanga chu hiai bang tawndan hoih muh ding leh theih ding vang mahmahta hi. Sum muh theihna ding kia mite’n ngaihtuahta bang hi. Hiai kia hilou in, singtang gamte ah meh huan (kitchen garden) kinei sek a, huangvulh gantate apan venna ding loungal daai (fencing) leng kikai ngeilou hi. Meithai tagah, mi haksa kua hiam in, “Na huan uah meh ding neu khat ka la thei diam?” achih khakleh, aneitu in a thawn in phaltak la sak sek hi. Tu khang ah, kuahiam khat in hiai bang in ngen kha leh, ama’n di zah gen toh kithuah pahpahta hi. Hiai a kon gen utpen tak chu, vualzawlna i tante uh ziak a Toupa a kipak a, a neiloute panpih sang a, mahni angma sial a, duham mi kidimgawpta hi. Khovel hong changkang a, sum-le-pai, inn-le-lou nei a, mihausa i tam seemseem leh ki-itna tawma, tasam mi tam seemseem houh ahizaw diam chih bang ngaihtuah tham mahmah khat ahi (Nasepte 4:31-35 sim in).
Na hamphatna, Toupa hon vualzawlnate lungsim taktaka ngaihtuahin na sim ngei hia? Ahihkeileh nang a omlou leh na neihlouh, mi hinkhua a om, mi neihte kia en a, lungkimlou a, hinkhua a kipahna dan theilou a om, phunphun a, ahihkeileh kingaisia bang na hi hia leh? Etsakna khat gen zual ni. Tuni a bike a tai thei dia Pathian in hon vualzawl leh lungkim in. Nang bang a “bike bek nei le’ng” chi a thuum mi tampi om ding ahi. Siksakol (cycle) a tai na hihleh, kua hiamkhat “cycle bek nei leng aw” chi a, khe a pai mi om ding ahi. Khe a pai na hihleh kuahiam khat khe a pai theilou khat in “khe bek in pai thei le’ng zaw” chi a thuum om ding ahi. Tuni a buh leh meh na dohkan (table) a a omtheih a, na nektheih leh kipakin, suansam mi tampi khovel a om ahi. Amaute’n meh lim leng lamen ngamlou a, buh kia bek nei le’ng chi a gilkial lua tampi om ahi. Huaiziakin tantawk a lungkim leh lungawi dan i zil ding ua, Toupa ah i kipak ding uh ahi, A vualzawlna simseng louhte ziakin. Tua ding in simtute, TOUPA’N hon vualzawl hen!
“Lungkimna toh kithuah Pathian limsakna tuh punna thupitak ahi.” –1 Timothi 6:6
