Suty zangkhin sepnalam zuan a kuannawn, nisim 11 Jan 2021 ni in lenna phual (T-3, IGI International Airport, New Delhi) ah ka lenna ding lamzuan in ka pai hi. Lenna phual lun mahmah khat ahihtoh, social distancing neih ding kichilai hinapiin mipi hunkhoptak mahni lenna ding buaipih in ki om vingveng hi. Lenna kidohna kongkhak lam manoh a ka paileh, minih (nupa hi ding un ngaihtuah ing) kilawm huntawk, smart tak leh feltak a ki chei ka ma ah pai ua, ka makhelh toh kiton in hiai nupate' kihouna zakha chitchiat ing. A pasal in, “ Imphal omna India sung hia, a pua?”, chiin dong a, azi'n, “Assam a om ahi", chiin dawng mawk hi. Hiai kazakphet in, ka lungtang hon deng pah a, ki nungleh-hei a hilhchet bang ka ut mahmah. Ahihhangin, tua tegel hilhchetna piak lam sangin ngaihtuahna lampituamtak ah piilut in ka om a, lungsim a Aw ging daitheilou tuh hiai ahi.
- Pawlam kilatna (Outer appearance) kia buaipih mihingte I hihkhak ding lauhhuai mahmah hi. Sunglam a takna omlou leh ahawmvuak I hihkhak leh pawlam bangchiteng in kizutmam le’ng le, eimah sunglam a pan nektak, laktak leh zattak bangmah pawt theilou ding hitah. Matthai 23:25-28 ah Jesu'n Laigelhmite leh Pharisaite kiangah, nou leh kuang polam hahsianga asunga lepgukna leh kidektheihlouhna a dim. Han polam nuhngou a kilawmtak a lang, asung lah misi guhte leh nin chitenga dim, chiin ana dem hi. Gingtu hinkhua ah leng khovel a sa a I omsungin pawlam kilawmna khemnate'n hon nawk zel, himahleh gingtu diktak kibulphuhna ding zaw sunglam a takna ahi. Sam 51:6 ah, Ngai in, sunggil lam ah takna na deih naknak a, huchiin a kimulou lamah pilna na hon theisak ding hi, na chi hi. Sunggillam a takna amasapen a koih ding ahihdan I mu, hileh ahon piak behlap ding tuh, akimulou lam a pilna ahi. Mellatdan leh pawlam latdan a pilchilua leh felchilua chihte sang in, akimulou lam lungtang sunggil ah takna piibawl in Pathian Khasiangthou luahdimsak le hang, huai tuh pilna bukim ana hizaw hi. Amasa ding nanunkhak theih, thamlou in nelhsiah theih hitah e, chi in sunglam a takna mah tup in neipeuh le'ng, adang poimoh bangkim Ama'n hon pe behlaplai ding hi.
- Ngaihtuahna a hong lutnawn dangkhat tuh, Matthai 15:14 ah Jesu mah in, mittaw in mittaw mah a pi leh kokhuk ah a ke khawm ding uh, ana chinawn hi. Gamlapi vagenlouh inleng mahni innsung tek ah enle hang, innsung makai leh papen/nupen dinmun ah tate’ khalam hinkhua a mapii dingin ka khalam mit avak kul hi. Khalam mitmialpi toh tate makaih tuh mitdelh leh mitdelh kipii chihna suak hi. Atunga nupa kihoulimte apat in, atheichian zawsam omlou in ki hilhkhelh theih leh kipiikhelh theih hitah chih hon musak. Tate' nekding thu-hing leh la-hing te muam zoulou leh tulhzoulou, thamlou in, eimah a suakkhia leh luangkhia thutak/tuihing naak (source) a omlouh khak ding kivelchian kul in poimoh hi. Apoimohpen ah Pathian leh keimah kizopna suangphum (foundation) ka bawlphat leh kipsak kul a, theihna bukim neikei mah leng Pathian a ka kingak zahzah in Ama'n theihna, pilna leh makaihtheihna Kha hon pe ding, chih muanngam ngai ahi. Khalam mitvakna Pathian kiangah a om a, Amah a ka kituklut peuhleh mitvakna leh nnavakna hon pe dia, ei a kipan nekding luangkhesak behlap lai ding hi. Tua ding in kipumpiakna bukim michih in neile'ng I lampi totdingte ah kipalpuklou in kalsuan theiphet ding hi hang.
Simtu deihtakte, I niteng hinkhua a I tuah bangkim ah Toupa’ Aw zong le hang, ahon theihsaknop thute zathei ding in I bilte hon navaksak ngei ding hi. ...TOUPA thutheihsak tuh a muanhuai a, mi mawl a pilsak zelzel hi. Sam:19:7b
NOTE: Thugelh Tomkim honpetu Lt Col. Pa Songlianthuam @Thuampi in DEW/ GC adi thugelh ana pe zeuhzeuhta. Lungdam hang. A thugelh piak nanungpen sim theihna
link: https://blog.ebccdelhi.org/kihouna-tungtawna-houpihna/
