Mihing apiangkhe zousiah ikhawtheihma apan damsung khualzinna kipan in isih matan khawllou in ihmut sung nangawn paizom ngitnget hi. Khualzin dan bel atuamtuam omtham ding: khenkhatte van tampipi po tultul kawm a zin, khenkhatte lah van chihtham le neilou a zin vavalh pawl leng om. Khenkhatte amazawn ua tangtak a azin lai ua khenkhat leuleu akiim-apaam uh awlmoh tuamtuam nei a pai kualkual leng omzel.
Ahihleh, hiai leitung khualzinna ah nang leh kei bangchi bang in izin a? Khualzinna lampi maam gige lou a, atouhna asukna aphokna alauhhuaina athawmhauhuaina munte leng omthei zel hi. Tua bang munte itot khak chia’n lungkia in ibah mai hiam? Laisiangthou a kimu mi khenkhat apan sinlai laak theih omte sauloulou in enkhawm ni:
Enok: “Huan, Enok Pathian toh a omkhawm ua; huan, a omta kei a; Pathian in a lamang ta ahi” (Genesis 5:24). Laisiangthou a a’ hinkho thu tomchik genkhak a om, ahihhang a aki genkha sun simpha mahmah tuh Enok ahi. Kum 65 aphak a tapa Methusel nei, aban kum 300 sungteng Pathian toh ton a huchi a ton paisuak uh (Pathian in lamang) chi a chiamteh ahi hi! Thawmhau hetlou a khualzin hi mahmah eive hon chisak hi.
Mosi: Sinai tang a ni 40 ava ommang leh Israel te lungkia ua, Aron khut tungtawn in bawngnou lim bawl in ana bia uhi. Pathian heh mahmah in Israel te hihmanthat tum hi. Mosi in amite adia angetsak ban ah maban akalsuan zel nading utoh kisai in “Na ompihna kei toh aton kei ding leh hiai a kipan in kou hon pitou ken…” (Eksodas 33:15) chi in Pathian kiang tangtak in gen giugeu hi. A khualzinna uh lamzanna leh lohchinna dia Pathian ompihna leh tonpihna aloutheilou ahihdan Mosi in theichian mahmah hi.
Kumpipa Hezekia: Kumpipa Hezekia muanmohhuai a china, damkhelou ding ahihdan Pathian in Jawlnei Isai tungtawn a ahilh leh khasetak a kap in damna ngen a, Pathian in athumna dawng in hihdam hi. Hezekia leng kipak petmah in la bang phuak a, a damsung nite a awlawl (pilvangtak) a pai khiankhian tading chi hi. Himahleh a paizelna a pilvangtak a Pathian toh tonkhawm gige khalou ahidi; aziaktuh, amah veh dia Babulon kumpipa’ misawlte bang agou tengteng ana ensak thepthup hi! Hiai tungtang ah Pathian in awilou in Jawlnei Isai tungtawn in sal/tai a, atate (suante) leh agoute Babulon lam a puakmang vek a omding ahihdan genkhum in om hi. (2 Kumpipate 20:1-19; 2 Kronikil 32:24-31; Isai 38:15; 39:1-8). Pathian toh tonkhawmlou a mahni hoihsakdan a pai poisau petmah ahihdan aban lam Laisiangthou sung ah muhtheih in om hi.
Thukhitna: Dotna poimohtak: ka hinkhua khualzinna ah kua toh ka ton a? Kumpi David in tuh anuam leh ahaksa ah leng Pathian toh ton ngiitngeet ahihdan Sam 23 ah chiangtak in gen hi. Tua ban ah, Pathian toh ton dingdan Jawlnei Mika in ana gen chiang mahmah hi: “…..TOUPA’N nang a hon phut bang ahia? Diktak a hih leh hehpihna it leh na Pathian toh kiniamkhiak tak a vakkhawm ahi kei maw?” (Mika 6:8). Hiai mah ahi Pathian in mihing A’siamna san: Amah toh kikhawl/kithuah kawm a vakkhawm/zinkhawm ding. I khualzin lampaina a eikia a ipai chian thawmhauhuai in atawlhuai sek! Himahleh Toupa toh iton chian bel khamuang leh jangkhaitak in ipai zel hi. I tun tupna mun lah Amah bawlsa tangtawn innuam ahi ngal a! Huaiziak in, ileitung khualzinna a hon hih halh leh nuamtuam lel hilou, haksa sa leh bahgawp a i om chiang a hon len a akul hun a hon pua lawm leh heutu muanhuai i Toupa Jesu Khrist toh ton gige le’ng jangkhaitak a zin zou ding hi hang. La in – “Heutu toh ton gige’n bangteng hongtung zong…” (Bl.No. 278) achih dik mahmah hi. Anuam ahaksa a Amah toh tonkhawm a damsung khualzinna a jangkhaitak a malam sawn thei chiat ding in simtute tengteng Pathian in hon ompih in hon vualzawl hen aw.
