Huaitak in, angel in a kiang uah, “Laukei unla, ngai un, michih aa diing a thuhoih leh thu kipahhuai lua hon tun ka hi. Tuni in nou aa diing in David khua ah hondampa a piangta, Khrist Toupa ngei.” Luka 2:10,11
Thupatna: EBCC, Delhi Saptuamte tengteng Chandigarh khopi a kipan kei leh ka inkuante’n Khristmas chibai ko’n buk uhi. Dahna leh lungkhamna diing nei ngeiloute mi nuamsa leh mi kipakte hilou uhi. Huai ban ah dah leh lungkham ngeilou ki-om hetlou diing hi. Himahleh Khristmas hun a NUNNOPNA ngah mite tuh a lungkham leh chimoh mahmahte a na telkha uhi. Huaiziak in, tuni a puakgik po keihkuih kawm a kipahna leh NUNNOPNA ngah theih veve hi. Tua i haksatnate apan kipahna i neih diing uh Toupa’n hon deihsak mahmah ahi.
Belamchingte’ hinkhua pansan in Khristmas NUNNOPNA enkhawm le’ng uthuai i sa hi. Belamchingte tuh gamlak a khosa ahi ua, khosaknadan a mi pha zouloute ahi uhi. Gamlak a khosak tuh thawmhauhuai hun tam mahmah diing a, gan toh khosakhawm ahih ziak un, thou/thoukang leh natna hii tam diak diing hi. Huan ah, a hinna ua leng lauh diing tampi om hi. Gamsa lauhuai taktakte, a hinna diing ua lauhhhuai ahih ban ah belamte mangthangsak le uh, a pute uh mai muh diing lauhna toh kidim diing uhi.
Huai ban ah, mite Bethlehem a min khum diing a kalsuan ahihlai un, amaute gamlak a belamte ching a om uh ahihman in, vote zong neilou hi diing uhi (a dikna uh gen thei dia dinmun neilou uh hi diing hi). Hiai bang hun a, angel in “laukei un,” a chih pen amau aa diing in zaak nuam mahmah diing hi. Lauhna toh kidim a omte kiang a, thumal deihhuaizaw omlou hi. Tulel a lauhna leh maban toh kisai a lauhna nei mite, khamuan nuam i Pathian ahihman in NUNNOPNA kinei thei hi.
“Michih aa diing a thuhoih leh thu kipahhuai lua k’on tun hi.” Hiai a thumal “michih” tuh thumal deihhuai mahmah ahi. Tua hunlai a Rome kumpi nuai a kisimpina a tel banloute, Pathian lemgelna a tel ban chih tuh kipahhuai mahmah hi. “Thuhoih leh thu kipahhuai” Belamchingte’n hiai bang thumal za tam hetlou diing uhi. A zak tam mahmah diing ua gintak tuh, muhsitna kampau, hamsiatna kampau, mohsakna kampau chihte za mun diing un gingtakhuai a, itna kampau za mengmeng lou diing uhi. Himahleh thuhoih leh thu kipahhuai za diing a, amaute huailut Pathian min i phat hi.
“Nou aa diing in David khua ah hondampa a piangta, Khrist Toupa ngei.” Belamchingte tuh mi’ zahtak hilou ua, ngaihsang hilou uhi. Huaiziak in, a haksatna uh a genkhiakna diing neilou kia hilou in, amaute pauhialtu diing neiloute hi diing uhi. A haksatna uh gumgotang a, sialpi vuahthuak leh gumtu diing neilou ahih uh gintakhuai hi. Himaheh amaute’ hondampa diing a, Khrist Toupa hong piang tuh kipahhuai mahmah hi.
THUKHITNA: Tuni in, Jesu Khrist leitung a hong piang tuh nang aa diing in thuhoih leh thu kipahhuai ahi diam? Herod aa diing in bel thuse mahmah hi a, lungzinpih hi. Himahleh Toupa’n belamchingte kiang ah thuhoih leh thu kipahhuai tun chih tan kia hilou in, a muh teiteina diing un chiamtehna pia hi. Huai tuh naungek, puan malngat a kituam, gan anpiakna kuang a lum na mu diing uh, chi hi. Belamchingte mimawl ahi ua, amau’ theihsiam theih diing in Jesu kawkmuh in om uhi. Delhi ka hong tun nung in security toh kisai ka theichian sem hi. Mi’ dinmun leh hihna poimohtak neite ut hunhun a va kimuhpih theilou hial hi. Jesu kumpi himahleh leitung kumpi leh mithupite innsung a piang hileh, belamchingte lut zoulou diing ua, mukha lou maimah diing uhi. Tuni a nang leh kei adia chiamtehna hon piak tuh Jesu leitung ah hong piang a, i khelhna ziakte in Kros ah thah in om a, ni thumni in haan apan in thounawn hi. Tua ahihman in kumpi hon gum zou diing Amah lou omlou hi. Tua Jesu, i bitna diing ahihman in, i khelhnate kisik in lal leh hondampa diing in saang ni. Tulel a haksatna i tuahte, lunggimna leh beidotna tuamtuam i tuahte, Jesu i muhna diing a, i lampi tot hileh uthuai ka sa mahmah hi. Huai lah KHRISTMAS NUNNOPNA ahi ngal a.
