Tulai minautangte i niteng hun zat dan uh nuamsa hetkei mah leng, nasem a gimtak leh tawl tak a om lou,nek-le-dawn lah ngawl lou nuam mahmah ahihna khat om hi. Nidang, hun dang a tawl tak leh manlah tak a i omlai tu in i lehngaih nawn zel uhi. I ut dandan a om, i utna munmun pha thei leh i ut lamlam seem thei a i om chiang a leng tawl kisa lua, lungkim thei loute, kipak theiloute leh soisel leh phun lam ching zawte; i buai ding leh I taksap ding gam vaihawmtute’n zong hon venpih ban ahihna uah hampha mahmah hizaw I hi. Abanah, eikia buai hilou in, khovel gam khangtou leh thupite zong buai hi.
Buaina i tuah chiang in Khristian hihlam khawng i mangngilh tuan louh ding leh ginna lam a zong i dinkip semsem ding ahi. Hiai hun tuh melmapa’n taksap leh I poimohte pansan a khemna leh zolna thang (trap) lauhuai a kam/siah hun ahihman in pilvan hun hizaw hi. Jakob 4:7-9 sung thute pansan in sau lou genkhawm le’ng chi I hi:-
PATHIAN THUTHU IN OM UN: Buaina khawng paulam a ei ut dandan a om khak ding lauhuai hi. Buai hun, thawven hun, kipah hun, dah hun I tuah khempeuh Toupa theih louh om lou. I dinmun leh hihna leng a theichian pen Toupa mah ahihman in PATHIAN thuthu a om di’a hasotna mah mang/ zui le’ng tawldam pen, bitpen ding hihang.
DIABOL DOU UN: Khristian, piangthak,Jesu nungzui di’a I kipiak nung sang Toupa Jesu melmapa tuh ei melma a hong hita. Hiai melmapa diabol bel i Toupa Jesu’n leng a na zohsa ahihman in kihtakhuai lou hi, aziak tuh “Diabol dou un, a hon taimang san ding” chih ahihman in. Zolbawl lou ding, kingapthoh sak lou ding, hon taimang san leh bel hong kikngam nawn vet lou ding a bawl theih ahi.
PATHIAN NAIH UN: Niteng a i naih sek uh kua ahia ? Kua kiang ah, bangbang gen in houlim I pan sek a,ahihkeileh buaina ziak in kua kiang ah tai in kua i naih sek ua? Pathian in hon gamlat lua, Pathian le naih ban lou, maingap lou, nellou khawng houh I hikha uhia? Ei hih ding leh Pathian hih ding Laisiangthou a i muh tuh, “Pathian naih un, Ama’n ahon naih ding” chih ahihman in Pathian toh kal (I kikal) bawlna ding in en i naih masak kuul chihna ahi.
NA LUNGTANG UH HIHSIANGTHOU UN: Lungtang tuh mihinna kingakna leh gamtat khohei hon thununtu, hon paukhesaktu, hon kalsuan saktu leh hon semkhesaktu ahihmanin a sianthou ngai hi.Lungtang siangthou lou apan bel thu siangthou, nasep hoih,omdan hoih tatdan siangthou om ngeilou ahihmanin, Toupa deihna bang in I lungtang, niteng a hih siangthou ding poimoh gige hi.
TOUPA MITMUH IN KINGAINEU UN: Kingaihneu tuh thil kilawm, mi toh kituahna,kilemna zong hi ahi.Himahleh mihingte’n haksa I sak mahmah uh khat ahi. I Laisiangthou tangteelna in hon genna tuh, “Toupa mitmuh in” chih ahihman in ngapthohhuai deuh suak hi.Aziak tuh Toupa bel nak let lua, nak thupi lua, a’ mai a kisathei tak kihimah mah lou ahih chi’a. Huai ban a, athanophuai diakna tuh ahon ditnawnna ding, “huchi in a hon hihlian ding” chih ahi.Toupa’n mi a tawisang, ahihlette bel midangte’n nengniam zoulou, neusak zoulou banah dem zou lou chih ahi. Niteng Khristian hinkhua ah- Pathian thuthu a om in, Diabol dou in, Pathian naih gige in lungtang hihsiangthou in Toupa muh in kingaineu leng I Toupa’n HON HIHLIAN DING ahihmanin Toupa min I phat uhi.
