Huchi in hiai thumte, ginna, lametna, itna a om gige ding hi;
huaite a a thupi pen itna ahi (1 Kor. 13:13)
Khristiante tuh Khristian loute toh i kibat louhna ding tampi om hi. Aziak tuh i min a kiphuah khiakna, a nung i zuihpa lungput, omdan, gamtat, paudan leh thugen a, Amah i sut ding uh ahi. Khrist min tam a kiphuak pawlpi sung a member khat i hihna toh i khan ding dan duhthusamhuai chi thum (three point) te gen in kikum leng chi I hi. Tuate i Laisiangthou simna apan hiai anuai a bang in sau lou in sutkhawm leng:-
Ginna A Tunglam Manoh A Khanna
1. Thuhilhna (teaching) huih chi teng in alanglang a a sep leh mut leng theih naupang I hih nawn louh ding uh ahi (Eph.4: 14). Min khat in a gen chiang a muangmoh zel a om louh ding chihna ahi. Uisasiam lou in tuh a ging teng a boh a, a tawl thawn lel a, bangmah a man tuan kei hi.
2. Bangkim a Khrist lupen a nei a, Amah a kibulphuh a i khan ding uh ahi (Eph. 4:15). Huai omdan tuh i duh, i deihte, i inn-le-lou, i nekzonnate tengteng ah Khrist lupen a neih ding leh i tup leh sawm tengteng zong Amah a kibulphuh ahih ding chihna ahi.
3. Ginna a tunglam manoh a khanna leh pichinna ding tuh thumna, Patian thu sutna leh a deihlam nasep. Ginna lou in Amah pahtak lam mi hihvual ahi kei (Heb.11:6).
4. A bullam a kip kei mawk leh tunglam manoh a khangtou pen zong a khan ding zah a khang lou banah, khang ta mahleh leng hong kibullot ding lauhuai mahmah ding hi.
Lametna A Zungkai Di’a Khanna
1. Khrisiante lungsim tawng apan lametna a zungkai dingte I hi. I Toupa Jesu Khrist mahmah leh Pathian i Pa, eite hon itpa leh hehpihna ziak a tangtawn a khamuanna leh lametna hoih honpe Pa’n (2 Thess.2:16), Gingtute han khenlam a lametna hing nei a honbawlte I hih tuh i hamphatna ahi.
2. Lametna kipahhuai, I Pathian thupi leh Hondampa Jesu Khrist thupi a hong kilakna ding, gingtute lamet ahi (Tit.2:13). Toupa Jesu hong kilak chi’a Amah bang a om dingte I hi uh.
3. Tulai gingtu tam takte Jesu Khrist a lametna nei lou bang mai a mahni hinna kila leh ut bangbang a leitung khovel zat sawmna uangtak lak ah i lamet thugin velthak zel le’ng uthuai.
4. Lametna hong bei mawk leh bel hin kichimtakna leh kiningtelna honglian ding ahi. Huaiziakin Jesu Khrist a lametna hing om gige ding in zung kaisak in sat nou zel ni hang.
Itna A, A Pheilam A Khanna
1. Pathian i itna akilatna ding tuh midangte i itna ah ahi. Mi’n “Pathian ka it” chi in a unau haw leh amah zuauthei ahi; a unau a muhsa bawn a it ke’n, Pathian a muh ngeilouhpi bangchi’n a it thei di’a? Pathian mah it in, A thupiakte zui in, A’ thu mang le’ng ei ading a hoihpen hizaw.
2. Midangte it ding tuh Toupa Jesu’ thupiak ahi. Hiai ka thupiak ahi, Ke’n nou kon it bang in noumau leng ki-ittuah un (Jn.15:12) Toupa hon it bang in ki-ittuah leng Jesu nungzui I hihna genlouh a zong mite’n hon theimai ding ua i lak ua tel mite’n lunggulh ding uhi.
3. Innvengte itna atehna ding tuh Nangmah na ki-it bang in na innveng leng na it ding ahi (Mat. 22:39). Kim-le-kiang u-le-nau, innsak-innkhang ki-ittuah chiat leng nuam ding, I biak leh belh Pathian mah zong lungkim ding, vualzawlnna tampi tang lai ding hihang.
4. Itna tuh dan zuih kimna ahi. Ki-ittuahna loungal kuamah bangmah ba kei un; amau mihinpih itpa’n dan a zui kimta hi (Rom 13:8). Itna tel lou in dan zuihkim chih om thei kei a, mihinpihte itna tuh dan zuihkimna ana hizaw a, huaimah leng I Toupa Pathian lungkimna hizaw hi.
Thukhitna:-
Huchiin hiai thumte: Ginna, Lametna, Itna a om gige ding hi. Ginna mit in gal in don leng tungchiang Thangvan vangkhua, mitdel, khebai, piangsual chihte om nawn louhna, I lamet van Kanan gilkial, dangtak, nat-le-sat om louhna, Ittu Pathian in itna toh vai a hawmna gam, gal leh sa a kineihnate, kimuhdah, kituambawl, enna, huatna leh kihazatna chihte om lou in, michihte’n amauteTtanpa phat in nunnuam tawntungta ding uhi. Huaisan mun ah telkha sam ding in na ginna leh lametna na muangngam taktak na hia?? Lauthawng sima na om leh zaw akikhel ma in kibawlpha in, hun hoih in hon ngakngak lou thei ahi, hun haksa manoh lel lel himaithei I hi; kivel in.
