“Hiai khovel dan bang in omkei unla; Pathian deihlama hoih leh, lungtuahhuai tak leh hoihkim na theihtel theihna ding un, na lungsim uh a thaka om in hong lamdang zawta un.” - Romte 12:2
Chituamna i chih chiang in, ‘Thildang/Midang toh kibatlouhna’ chi in zong gen theih hi. Khristian khat i hih a, gingtu diktak i hihleh, ginglou mite toh kibatlouh ding chihna hipah hi. I thupi a ‘chituamna’ i chih in, mi kuahiam toh kibat louh bikbek ding chihna lam gen zaw lou in, taksalam leh lungput ah kibatpih om tham in teh, himahleh i gen tuppen ahihleh khovel thilte leh ginglou mite apan Khristian Tuailaite i chituam ding uh leh, i chituam ngam ding uh thu ahizaw hi.Thupil khat in,”Mi chituam hihkhak ding kihta ke’n, mi tengteng toh kibang hihkhak ding kihtazaw in.’ ana chi hi.
1) Joseph:“…Bangchi’n hiai khelhna liantak hih in Pathian tung ah thil ka hihkhial thei dia?” achi hi.- Genesis 39:9
Potiphar in Ishmael sumsin mite lak a kipan in Joseph ana leikhia a, a inn ah nna semtu/suak in pangsak hi. Joseph in a pu’ deihsakna a mu a, a inkuante tung ah heutu in a bawl a, a neih tengteng a khut ah a koihvek hi (Gen 39:4,5). Tua bang a dopsang aahong om ban ah, pianhoih leh melhoih tak (Gen 39:6) ahihna toh, a pu Potiphar’ zi in ana ngaih et a, luppih ding in ana zol sek hi. Himahleh Joseph chituam ngam a, a pu’ zi toh lupkhawm ding chih Pathian mai ah khelhna ahi chih a theihchiang man in, ana utlou a, ana nawlkhin hi.
A ngaihsut tham mahmah khat bel, Joseph i chih Mosi hun ma tham a mi ahi a, Dan thu leh Thupiak chiamte a omma tham ahi. ’Gu ke’n. Angkhawm ke’n’ chihte thupiak a omma tham ahi. Himahleh Joseph in a pu’ zi toh lupkhawm pen angkhawmna/khelhna ahi chih a thei hoih mahmah hi.
2) Ruth:“… Na paina peuh ah ka pai dia; na giahna peuh ah ka giak dia; na chite ka chite ahi ding ua, na Pathian ka Pathian ahi ding.” - Ruth 1:16
Meithai Naomi in a pasal leh a tapate nih a sun khit nung in, a tapate’ zi Orpah leh Ruth toh a khosa uh hi. Naomi in a mou nihte kiang ah a nute uh inn tuak ah pai nawnta di’n a sawl a, a sawl tung in anih un a utkei uh a, “Pai kei n’ung, na chite kiang a na paina ah ka tel sam ding uh.” a chi uhi. Huchi’n Naomi in a sawl teitei ziak in Orpah in a paisan a, himahleh Ruth bel chituam ngam in a paisan nuam hetkei a, Naomi paina peuh a pai ding leh a sihna peuh a si dia mansa ahihdan ana chiam hi.Huchia ginomtak a a pi Naomi a zuih teitei ziak in, lou nna sem a a kuanna ah lou neitu Boaz in ana deihsak a, hun hong paizel in a pi Naomi’ thuhilhte a zuih man in, Boaz toh hong kiteng ua, tapa bang hong nei hi. A tapa’ min Obed ahi a, kumpi David piannapa Jesse suangtu ahi hi.
3) Job:“Na ginomna len chinten lailai na hi hia? Pathian gensia inla, si in” - Job 2:9
Job mi hoihkim leh tang ahi a, Pathian kihta a, hoihlou mudah ahi (Job 1:1). Tua ahihman in, Job tung ah Pathian kisathei petmah a, Setan kiang ah Pathian in Job bangbang a mi hoihkim leh tang, Pathian kihta leitung ah kuamah dang omlou ahihdan ana gen hi. Himahleh Setan bel, Pathian in Job a vualzawl ziak lel ahi chi in pang a, huaiziak in Pathian’ phalna toh Setan in Job ze-etna nei a, Job tate leh a hauhsakna hihsiatsak in om a, huai khit in a taksa tung ah meima pumdim sak in bawl gentheih leh gawt in om hi. A zi nasan in Job kiang ah Pathian gensia dia a sawl inleng Job nungtolhlou hial a, huai nak sang in Job in a zi kiang ah,”Pathian khut ah hoih i mu dia, hoihlou leng i mu kei dia hia?” ana chi hilhial lai hi.
4) Daniel leh alawmte:Himahleh Daniel in kumpipa an hiam a dawn uain hiam a kihihnit louh a lungtang in a tum chiltel hi. - Daniel 1:8
Daniel leh a lawmte (Sadrak, Meshak leh Abednego) kumpipa Nebukadnezzar thupiak bang in Kaldai laisiamna leh pau sinsakna ah tel ding in seh in ana om uhi. Tua siamna-pilna sinna hun kum 3 sung in Daniel leh alawmte’n kumpipa an leh uainte a kihihnin nuamlou in, chituam ngam in anteh louhing nek tel zaw uhi. Ni 10 sung tua bang a a etkhiak uleh tuailai kumpipa annete tengteng sang in a mel uh hoihzaw in a kilang a, a sa uh leng a thau zaw hi (Dan 1:15).
Tua ban ah, kumpipa’n dangka-eng milim biak ding thupiak a piak lai in, amaute milim mai ah kun nuamlou bikbek uh a, hangsan tak in meipi kuang zuazua sung ah paihlut tel zaw uhi.
Atung a i gen mi bangzah hiamte’nPathian a ginna uh, a muanna uh leh a kihtakna uh ziak in chituam ngamna nei uh a, huaite mah enton in, ei Khristian tuailaite’n leng i niteng hinkhua ah bangchibang a chituam ngamna hinkhua zang ding i hi ua chih ensuk lai leng i chi hi.
1) Khristian Tuailai Diktatna a Chituam Ngam: Diktatna in nam a tawisang a; himahleh khelhna mi kuapeuh ading in zahlakna ahi. - Paunakte 14:34
Diktatna thu i gen chiang in, i lungsim uah ‘corruption’ hong kilang masapen sek ding in ka gingta hi. I gamsung i etkiimvel chiang in diktatna in mun tang nawnlou bang khop in kisia gawpta in lang hi.Pastor Rawna Kopsiam in a thugenna ah, “Diktatna thu gengente i hua maimah ua, khelhna i hua kei uh.” ana chi hi. Huaiziak mah tak in, I saptuam EBCC in i gamsung ua diktatlouhna in zalentak a vai a hawm ngaikhawk mahmah in, Kum 2015 in Tuailai 1434 Pro Motivation Program, a tangpi a TuailaiPro chi a i theih uh, nasatak in ana zang hi. Seminar tungtawn in bang, Drama tungtawn in bang hiai Tuailai 1434 Pro nasatak in campaign ana kibawl a, tuailai tamtak in “Kei TuailaiPro ka hi.” chi in bang kichiamna ana nei uhi. Tu chiang in TuailaiPro mei kuangpha zounawnlou bang mahleh, kuang den lai ahihlam theithak in, Khristian Tuailaite i omna peuh ah, gingloute dan a omlou a, i siamsinna ah hiam, i nekzonna ah hitaleh, chituam ngam a i om uh a, diktatna i letkip uh kiphamoh hi. A tunglam a in a gentak mah bang in, Joseph in Pathian mai ah khial hih ding a lauh bang in, nu-pa kal ah hiam, i niteng hinkhua ah Pathian mai ah thil hihkhelh ding i lauh ding uh ahi. College examna ah haksa i sak sim lele laithem tawilutlouh ngamna, sepna sum a leitheihna ah leilou ngamna, dikloutaka sumdawn theihna tampite a sumdawnglouh ngamna leh a dangdangte i hihlouh ngam uh poimoh hi.
2) Khristian Tuailai Kuhkalna a Chituam Ngam: “Nang khen ding leh nang zuilou a kiknawn ding in hon kun ke’n...”- Ruth 1:16
Khristian tuailaite, Khristianloute toh i kidanglamna dingte uh lak a khat tuh kuhkalna ahi.Mikuhkal leh mitupguhnei na nana tuh a lohching tangpi uh ahi.Ruth hinkhua i et leh, a tupguhdan chiangtak in a kilang hi. A pi Naomi in a sawlkik dek in a utkei bikbek hi. Tua ban ah Ruth mikuhkal ahihdan a kilatna tuh a pi kiang ah lou ah nasem a hohsak a kingetna in genchiang mahmah hi (Ruth 2:2).Hiai mah ahi ei Khristian tuailaite’n i etton ding uh. I Timothi 3:8 ah,‘Himahleh kuapeuh in amah mite ading a ngaihtuah sakkei a, a ma inkuante kholhouh a ngaihtuahsakkei leh, a ginna a zuausan a, gingloumi sang in a gilou zaw hi.’ ana chi hi.Ruth a tupguhna leh a kuhkalna ziak in deihsakna a tang a, vualzawl in om hi.
3) Khristian Tuailai Ginomna a Chituam Ngam: Sihpha a ginom in om in, huchi in hinna lallukhu k’on pe ding hi. - Kilakna 2:10
Ginomna i chih chiang in Diktatna toh leng hong kinai mahmah hi.Mother Teresa in, “Thil neu chikchikte ah ginom in, ahangbel huaite ah na hatna a kinga hi.” ana chi hi.Laisiangthou ah Talent Gentehna Thu (Matthai 25: 14-30) i sim leh,”Sikha hoih leh muanhuai, na hihhoih e, tawmchik tung ah na muanhuai a, tampi tung ah k’on omsak ding; na pu kipahna ah lut in” chih gelh ahi. Miginom tuh mimuanhuai ahi chih chiangtak in kilang hi. Job ngei leng Pathian a ginna leh a muanna ah a ginom a, huaiziak in a ma a a neihzah lehnih in Pathian in a vualzawl hi (Job 42:10).
4) Khristian Tuailai Siangthouna a Chituam Ngam: Huchi in, deihtakte aw, huai thuchiam i neih ziak un, sa leh kha buahna tengteng ah i kisiangsak ding uh, Pathian laudansiam kawm a siangthouna hih kim in. - II Korinthte 7:1
Tulai khangthakte hun ah noptalna, ut leh dah a mahni nopsakna di zong a gamtatna, nasa mahmah hi.Igamsung, i khosung uah tuailai tamtakte zu leh sa, khamtheih-guihtheih ah kibual pumdim hi.Mun tamtak ah Rehabilitation Centres bang omta hi. New Bazar kiim leh kiang, Tedim Road zul ah i pai leh, lamnawl ah zahtakna nei hetlou in suntanglai e chilou in mi muhtheih in phim a kisun ngam tamtak ki-om hi.La phuaktu in leng, “I gam Khristian gam kichi ngal a… Tangpa, zuapa leh lianu tan in, dawnkhawm zel uh maw houlungtuak in” ana chi hial hi.Laisiangthou ah i etton ding uh hoihtak, Daniel leh alawmte, om uhi.Ginglou mi, i kiim i kiang a teng, te’n Khristian i hihna uh a hon theihna masapen uh tuh i omdan leh khawhei, khamtheih-guihtheih ah kibuallou i hihna apat hi tangpi ahi.Huaiziak in hiaite tengteng Khristian Tuailai i hih leh, i chiin/hih louh ngam ngai ahi.I taksa leh i kha siasakthei thilte hihlouh ngamna pen Khristian tuailai vai tak ahi.Huchi in kuapeuh thil hoih ding thei a hih tuanlou zaw amah ading in khelhna ahi. (Jakob 4:17)
Laisiangthou a mi bangzah hiamte hinkhua pansan in thupi (points) 4 i gen a, huaiteng kia lel hilou in, Khristian i hih leh, Khristianloute toh kibatlouhna dia i niteng hinkhua ah chituam ngamna ding tampi leng omlai hi. Kha a hing i hih leh kha mah ah i om ding uhi (Galatiate 5:25). Huaiziak in, Khristian kichi ngal a gingloute toh kidanglamna i neihlouh uh leh bel i Khristianna ki-etkik thak poimoh mahmah ding hi. Khristian tuailai chituam ngam i hihtheihna ding un:mimal ah, inkuan sung ah leh biakin ah,Laisiangthou pansan a thumna toh hoihtak a kisinsak thak a, pan i lakthak uh kul hi. A tomkim a gen in, Khrist toh kibatna tuh Khristiante a ding in chituamna ahi.Khrist a ka tualaipihte tengteng Khrist toh kibang ngam hinkhua nei a, Khristian tuailaichituam ngam hi ding in Toupa’n hon vualzawl chiat hen aw! Amen.
Hiai article T. Thang Biakmuan in BYF Lamka North Division a article gelh kidemna 2019 a ana gelh ahi.
