Pa Pathian thupina ding a lei tengteng in, Jesu Khrist tuh Toupa ahi chih a puan theihna ding un (Phil.2:11). “Khristian gingtu teng teng in Jesu Khrist tuh i bangkim uah TOUPA in nei ni”
Chih patpat in ah i chi kha maithei, himahleh hiai tuh thil sawm tuakpi hi a ka theihman in, kuapeuhmah in i ngaihtuah khawm ding uhi. Jesu Khrist lou Toupa a i neih uh tampi om ding in gintakhuai hi. I hun piak tampen leh i limsakpen te uh genkhawm le’ng i mobile phone khawng uh le ahi mai diam? Houh ahi taktak tak diam? chih kiveel in, tua dan ding mah ahi diam chih kidong ni.
Na Ngaihtuahna Toupa: Na ngaituahna ah kua a lal pen in kua’n thu a nei pen a? Sum-le-pai bang, inn-le-lou bang, gou-le-gam, gam leh leitang, dinmun leh hihna te’n i lungsim leh ngaituahna tengteng luahdim, Jesu adi’a mun awnlou, a kallak a phawk thawh lel houh I hikha ding kivel ni. Toupa Pathian in Kaleb tungtang hichi’n A gen hi –
1. “Ka sikha Kaleb in bel lungsim dang aput a, a honzuih taktak ziak in amah zaw, a vahawhna gam ah ka pilut di’a a suante’n huai a luah ding uhi” (Nam. 14:24).
Na Zakna Toupa: Na bil dawh unla, Ka kiang ah hong pai un, za unla, huchi’n na hinna uh ahing ding, na kiang uah tangtawn thu ka khung ding (Isai 55:3).
1. Job – Ka bil zakna in Nang k’on za a; himahleh tu’n ka mit in Nang a mu a (Job 42:5)
2. Paul – Huchi’n ginna tuh zakna ziakin a hong om a, huan, zakna tuh Khrist thu kigen ziakin a hong om hi (Rom 10:17)
3. Peter leh Johan – Kou zaw ka thilmuh uh leh ka zakte uh gen lou in ka om thei kei uh, a chi ua (Nasepte 4:20).
Na Muhna Toupa: Etnop teng, muhnop teng, en ding leh muh sawm ding hi lou in, Toupa Pathian deihlam ahi dia’m chih kivel masa thei zel le’ng maw.
1. Job in “Ka mit toh thukhun ka na bawl khinta; bangchi’n nungak ka en thei di’a ?” (Job 31:1) a chih bang in i mit toh thukhun bawl in, gamgi leh lamtang kham in, siang leh siang lou khen in, i muhna ah Jesu pen TOUPA hisak chiat in, lianpen, lalpen, thuneipen hisak chiat ni.
Na Gen Tengteng Toupa: Thu dik leh dik lou, zuau leh tak, i zak leh i theih bangbang gen theih vek mahleh ei Khristiante’n tuh i sung a hon tenchilh Pathian Khasiangthou hungaih ni. A genpa noumau na hi kei ding ua, na Pa uh Kha in noumau ah a gen zaw ding hi (Matt. 10:20).
1. David - “Toupa aw ka kam bul ah vengmi tusak inla; ka muk kongkhak veng in” (Sam 141: 3).
2. David – “Na lei tuh gilou lak ah veng hoih inla, na muk tuh khemna thu gen lou di’n veng hoih in” (Sam 34:13).
3. Jakob – “Lei tuh mei ahi, pumpi hiangte lak a gitlouhna lumpi, pumpi a vek a ninsak a, mihing kisuan sawn dan pian phungpi kang sak in gawtmun mei toh a peh hi” (Jak. 3:6).
Nasep Khempeuh Ah Toupa: Nasep dan chi tampi om thei – sep ding ahihmana sep, hun ngakna a sep, inntekpan tak a, kuhkaltak leh ginom tak a sep banah, phatuamngai tak a sep chih leng om hi.
1. David – Na deihlam seem ding in hon sinsak in, Nang lah ka Pathian na hi ngal a (Sam 143:10)
2. Paul - Huaiziakin hai nuam dah unla, Toupa deihlam bang ahia chih thei zaw un(Eph. 5:17)
3. Jesu - Hon sawlpa deihlam hih ding a hong paisuk ka hizaw ngal a (Jn. 6:38).
Na Kalsuanna Khempeuh Ah: Mun khempeuh ah na hohtheih himahleh Toupa toh na ton theih louhna mun, amah hohtuak louhna munte a na paipih sawm teitei leh Toupa khase mahmah ding hi.
1. Na lampi tengteng ah Amah thei inla, huchi in Ama’n na lampite a pitang ding hi (Pau 3:6)
2. Sepaihte Toupa’n hichi in A chi, “Na lampite uh ngaihtuah un” (Hagg.1:7)
3. Theihsiamna lampi akipan vakmang mi, misite kikhopna ah a khawl ding (Pau.21:16).
Heutu toh ton gige’n bangteng hongtung zong, Na makaipa kiang om na lampi mial zong; Melmate’n honzawl ua, lauhuai a nai chiang, Jesu toh na ton chiang lau ding na nei lou. Chiklaipeuh in mun khempeuh ah - Na ngaituahna, na bil a na zak, na mit a na muh, na kam apan na genkhiak thumalte leh nasep-nabawl khempeuh ah Jesu na Toupa, na Pathian hisak gige in, Amah na koihna bangbang in Ama’n zong hon koihsang thei, hon koihniam thei ding chih muang gige in.
