Huai suangphum tuh Jesu Khrist ahi. [1 Korinte:3:11]
Tulai khovel ah siamna, pilna, hauhna sang semsem, vanzat thupi semsem, himahleh innkuan dengdel semsem hi! Lai Siangthou Pathian in suangphum ding a tuate na gel khalou ahihziak a hipen mai ding. Himahleh tulai a innkuante'n sum-le-pai, nek-le-dawn, neih-le-lam, sepna hoih chihte khawng mah buaipih masakpen a nei a, Jesu khrist toh kizopna ngaihsak manlou semsem ding I bang a, suangphum kip neilou insawng thupitak toh kibang semsem ding I bang hi. A thupi zoh peuhleh a a kingakna muanhuai lou semsem!
Tulai khovel ah siamna, pilna, hauhna sang semsem, vanzat thupi semsem, himahleh innkuan dengdel semsem hi! Lai Siangthou Pathian in suangphum ding a tuate na gel khalou ahihziak a hipen mai ding. Himahleh tulai a innkuante'n sum-le-pai, nek-le-dawn, neih-le-lam, sepna hoih chihte khawng mah buaipih masakpen a nei a, Jesu khrist toh kizopna ngaihsak manlou semsem ding I bang a, suangphum kip neilou insawng thupitak toh kibang semsem ding I bang hi. A thupi zoh peuhleh a a kingakna muanhuai lou semsem!
Innkuan kisia in saptuam leh gamsung siatna a hon tun a, tua siatnate ziak a buaina in hon nawk lellel hi. Kholak program a dam ding ikisa a, program bawl in i hahkat mahmah uhi. Himahleh, kholak a kipan I innsung uh I tunkik chiang in, melma'n ana nuaigawp khin manta hilou hia!
Matthai bung 7 ah, I Toupa' gentehna inn chi nih I muthei hi. Tua innte ahihleh, pawlam latdan leh etdan mai ah, a hoihdan, kilawmdan leh thupidan kilamdang lou, telzawk pen ding theihlouh khop a thupituak hikha ding uhi. Himahleh kilamdanna khat nei uhi. Huai tuh muhtheihlouh a kingakna ahi.
Inn khatna tuh “suangpi” tung a kinga leh kilam inn ahi. Hiai bang inn tuh vuah hong zu in, tui hong khang in, huihpi hong hat mahleh a kichim kei. Huihpi leh vuahpi a thuakzou a, tuilian a nangzou hi. Inn nihna ahihleh, “piaunel” tung a kinga ahihman in, vuahpi lah zoulou, tuikhang lah nang zoulou, huihpi zong nang zou tuanlou in, kichim sedimdem a – “a nak siat mahmah” a chi hi. Hiai in, innkuan bawlna ah, a kimulou, a kingakna poimohlua ahihdan hon musak hi. Na innkuan, bang a kinga ahi a? Suangpi tung ah maw, ahihkeileh, piaunel tung ah?
Ahihleh, suangpi tung a inn kilam bang chihna hiam? I Toupa Jesu'n, a thugen za a zuite suangpi tung a innlam bang in teh ahi. Innkuan bit, chidam leh lohching i neih theihna di'n, Jesu Khrist a poimohpen hi. Tua Jesu na neih kei leh, piaunel tung a innlam na hiding hi. Bangchi tuk in na innkuan etlawm, thupi leh khangtou in kilang mahleh, piaunel tung a innlam na hihman in, khatvei tei hong kilang thouthou ding hi. Jesu sinsakna thugen manglou mi tuh ama' hinna leng
kisia in, a inkuan leng kisia in kichim in, kisedimdem ding hi.
Tuabang siatgawpna apan suahtak theihna lampi a om a, tua tuh Jesu Khrist ahi. Amah ahi, akip tawntung innkuan suangphum. Bangchibang a tua suangphum kip a kilam thei ding? Jesu mahmah in a gen, “Hiai ka thugente za a zui mi peuhmah, mipil suangpi tung a innlam mi” ahi, a chi hi.
Za (hear) - za napi a ngeikhe hetlou, chih om thei hi. Thildang banghiam hihkawm a mi thugen ngaihkhiak kichi haksapi ahi. Awlmoh deuh mai a thilkhat hihlai, zite nangawn in hon houpih chiang un zong, a dik a tang in kizatheilou a, “he” “aw” peuh ichi a, lah bangmah thei hetlou khawng I na hi hi. Tua mah bang in, thildang awlmoh zawk leh itzawk nei kawm in Toupa aw kiza taktak ngeilou ding hi. I zak theihna ding in, Lai Siangthou simna leh thumna toh ngaihkhiak kinken ngai hi. Hiai “za” thumal tuh "to attend to, consider what is or has been said, to understand, perceive the sense of what is said” chih ahi.
Zui – Toupa thugen zak/ngaihkhiak kia hilou, I zak (leh theihsiam) bangbang semkhia gingtu hih ding ahi. Jakob in, “ngaikhete kia hilou in, thuzuite hong hizaw un” a chi hi (Jak. 1:22). Tulai in zuihlouh thuhoih tuahsawn a tam hi. A gelhte'n leng a zuih uh hituanlou, a simte'n leng zui tuanbiik lou, a khaksawnte'n leng hoihsa hitop mai, zui tuan biiklou!! Thuhoih leh Pathian thu tuh khaksawn ding leh sim ding kia hilou in, “ZUIH DING” ahi. “Bible ka sim, Toupa aw ka ngaikhia” kichi mahle hang, I zuih tuan keileh ei leh ei kikhem ihi lailai hi. D.L. Moody in, “The Bible was not given to increase our knowledge, but to change our lives,” achi, kichi hi. Zuih ding tupna ziak a Bible thu sim or theihsawm nahihkei leh, na theihna in kisaktheihna a tun lel ding hi (I Kor. 8:1). Kisaktheihna lah Pathian' dou khelhna kihhuai ahizel si a! (Jak. 4:6). Bible study siam, sinsak leng siam mahmah na hi maithei, himahleh tua ah bukim nai zenzen lou hi. Na sinsak bangbang na zuih kei leh khelhna ahilailai hi. Haward Hendricks in, “interpretation without application is abortion” na chi hial hi.
Huaiziak in, tulai hun a I poimohpen zaw, Toupa thu za a zuihna ahi. Tua bang mi, bitna daikai ding Toupa'n a zong hi (Ezek. 22:30). Toupa' aw ngaikhiakna, tua ding a mimal a Toupa toh kizopna (biakna) limsakna leh A thugen zuihna (thumanna) tuh innkuan bitna suangphumna tuihual leh tuilian in na innsung a nawk hang in, innkuan mimal chiat a Toupa thugen za a zui innkuan na hih nak uleh, lunglau ken! Toupa na bitna ahi ding hi. Nang leh na inkuan kia hilou in, saptuam leh minam bitna dia zang ding hilai hi. Huaiziak in, Khrist suangpi kip tung ah kilam ni, mundang piaunel tumtheihna hi!
Photo by rawpixel.com on pexels.com
