Khemna himhim i ut lam bang, i duh lam bang leh i deih lamte pansan in a hong pai nuam mahmah sek hi. A hong latdan ah leng khemna a bang kei mahmah a, theih khelh baihlam in pilvan haksa mahmah sek hi. Huaiziakin puksiat a thoh zoh nawn louh theih ahi. Huai tan i tun ma ua panlak pahpah ding, nel bawl louh ding, melmapa maingap ding a leng om tup louh ding ahi. Laisiangthou in “Diabol dou un a hon taimang san ding” chi a hon hilh thu kipahhuai zui zel ni.
HUN LEMTANG: Khemtu melmapa’n hun lemtang a zongzong sek a, ngamthohhuai a hon sak hunhun a hon bohphut mai ding ahi. Toupa Jesu mahmah leng ni sawmli leh zan sawmli an a ngolh nung a tangho a khem a om pan ahi. A sa adi’a poimoh, gilkial damna ding, a thahatna ding, a bahna leh chauhna teng apan halhna thak neihna ding. Hiai hun in silh-le-ten hiam, inn-le-lou hiam, neih-le-lam bangteng sang in tanghou/ an a poimoh pen laitak ahi. Himahleh Toupa Jesu’n bel, “Mihing tanghou kia in a hing kei” chi in dawng hi. Hiai tuh eite’n leng I tuah theih uh khemna ahi. Kam neihna ding, sepna muhna ding, nekzonna, inn-le-lou, khosakna hoihna zawkna ding suanlam in ina boh pah kha nak uhi. Mihing tanghou kia in a hing kei, chih tan kia ahi kei a, aban a hon gen behlai tuh “Pathian kam a thu pawtte in a hing zaw ding” chih gelh ahi. Hiai tak ahi I puksiat nakna uh - Pathian kam a thupawtte, I hinna ding zaw pen nelhsiah khanak I hi kha ding uh.
DINMUN LEH HIHNA:- Dinmun leh mohpuakna I gen chiang in thuneihna toh zong a ton khawm gige sek hi. Hiai tengteng in a kentel nawnte tuh khovel thupina, lalna leh thilhih theihna leng ahilai hi. Hiai teng kigawm tuh thupina, minletna ahi tou lai hi. Diabol in Toupa Jesu kiang ah, “Khupboh in honbia in, huai tengteng ka honpe ding” a chih lai in, Toupa Jesu’n, “Setan hiai akipan paimang in, Toupa na Pathian na biak ding a Amah nna kia na sep ding ahi, chih gelh ahi” chi in a dawng hi. Hiai bang khemna nang leng na tuak ngeita maithei hiai bang hun in bang dawnna na pezel a le. Eh!!! tulai a hat-hat, a bawl theithei zuih ding, amau toh kilem kei leng khosakna leh maban kise thei ding peuh chi a, khukdin sukpah ngaungau ngen houh I hi kha hia, kiveel chiat ni. Hon khem sawmte’n i khem nopna ding lam tak a na zongzong ahihman un thei mahmah ding uhi. Huai tuh uthuai pipi bang, deihhuai pipi bang, limtuak taktak, nopchi mahmah leh duhhuai limchi taktak zong hontah kha ding hi. Thang (Trap) kamte’n zong zu leh va in a duh mahmahte uh antah a zang in thang kam zel mah uh ahi. Huai thang bohkha peuhmah in antah a duhzah uh neman lou in awk pah zel uhi.
SAPUM KAHIANGTE: Mit a muhnop, bil a zaknop hon suse thei leh na hinna hon supoi theite theigige na pi a na et thouthou a, na ngaih thouthou leh huai thang (trap) ah na awkta chihna ahi. Huchi bang zel in nek-le-dawn a nuamtalna, numei-pasal kal a thangtatna, sum-le-pai a duh-amna, huaihamna leh huchi bang thil tengteng melmapa setan thang antah ahi, huai a awk khate’n peksuah nawn haksa sa thei mahmah uhi. Kiveng inla limsak in na melmapa, humpinelkai humham bang in nek theih ding zong in a vakvak chih mangngilh het ke’n. Pathian khut a mi a puk peuhmah leh a suakta uhi. Khemna chiteng na tuah chiang a na dinkip theihna ding in Pathian galvan bukim Pathian thu zang thei ding in Pathian ah om inla, A’ aw za ban gige ding in kinai unla, na buaina leh haksatna hon phawkpih theih ding in Amah bel gige in.
