….Himahleh khasiangthou natung ua ahongtun chiangin thilhihtheihna nanei ding uh, huchiin Jerusalem ah, Judia leh Samaria gam teng leh kawlmong phain ka theihpihte nahi ding uh. (Nasepte 1:8)
Hiaia thilhihtheihna (power) kigen tuh Toupa Jesun thillamdang hihtheihna (miracle) aneihte hithou mahleh ei gingtuten Jesu mina haksatnate i maituah nadia Khasiangthou thopna hi din uphuai hi. Huaite tamlou i en ding:-
Hangsanna: Nungzuite hinkhua a pan Khasiangthou a tan zoh ua thopna a ngah uh thupi pen tuh “hangsanna” ahi. Pentecost day a’ a thugenna ah Peter in huai mi Pathian vaihawm bang in na mansak ua, nou migiloute khut in Khros a kilhden in na hihlumta uhi (Nas.2:23) chi’n Judate mai ah hangsan tak in thugen hi. Jesu matsak a’ a omlai a hiai na mi gen uh ka theikei chi pa’n hichi bang a’ hangsanna a neih tuh khasiangthou nasep ahi.
Khelh kiphawkna leh pianthakna: Khasiangthou nasep thupi mahmah Laisiangthou ah i muh tuh “khelh kiphawkna leh pianthakna” ahi. Peter in Pentecost day a hangsantak a’ a thugenna tungtawn in mite khelh kiphokna thupitak nei in a lungtang uh sutbang hong hi chih ahi (Nas. 2:37). Huchi’n huai khelh kiphawkna tungtawn mah in pianthakna ngah uhi. La in “i khelhnate hontheisak din, khasiang kia i deihpen” a chih bang in i khelhna hon kiphawksak thei leh hotdamna kitheihtelna (assurance) i ngahna tuh khasiangthou nasep ahi (Rom 8:16)Khamuanpa: Jesu’n a nungzuite kiang ah “Khamuanpa kon nutsiat a, keimah khamuanna konpia hi,, na lungtang uh hihmangbat in omkei hen, lauleng laukei hen“ (Johan 14:27) a chi hi. Hiai khovel a lungkhamna leh mangbatna i tuah hun a khamuanna hon pethei hiai Khasiangthou ahi. Bangchi ngahding? Laisiangthou mah in Pa kianga ngen ding in honchi hi. Thumna pansan in i ngah thei ding hi. Hiai tuh sih khamuanna leng ahi.
Sinsakpa: Khasiangthou tuh sinsakpa (teacher) ahi. I hinkhua ah a sia a pha hon lamhilhtu ahi. Bang chiding chia hamhaih tak a i om hun in Amah ngenleng i lampi honhilh dinga i paikhial keiding hi. “Khamuanpa khasiangthou, Pa in ka min a honsawl ding in bangkim a hon sinsak ding a, na kiang ua kagen tengteng nou a honthei khesak nawn ding hi” (Johan 14:26).
Khasiang tuh gingtute sungten khum - dwelts in believers and fill them (1 Kor.3:16) ahihman in thil bangkim a’ hon makaihtu ahihman in gingtute i hampha petmah hi. Hiai Khasiangthou nei in kipisak ni. Simtute Toupan hon vualzawl hen!!
