...himahleh Kha Siangthou natung ua a hongtun chiang in thilhihtheihna na nei ding uh, huchi’n Jerusalem ah, Judia leh Samaria gamteng leh kawlmong pha in ka theihpihte na hi ding uh achi hi (Nasepte 1:8)
Computer khawng a prominent tak a "powered by" chih kigelh namu ding uhi. Huai khawl I chi hia paisaktu leh nasep theihna dia thahatna (energy) petu genna ahi. Gari a powered tu tuh petrol or diesel ahi.
Gingtute naa honsemsaktu leh nasem di’a thahatna honpetu tuh "Kha Siangthou" ahi chih i tangtel ah I mu hi. “Jerusalem nusekei unla k’on thuchiam ngak kinken un” chiin Jesu’n, van a laktouh a a om ma in A nungzuite ana vaikhakta hi. Jesu’ thuchiam a ngaak lai un bang lungput a nei di uah aw chihbang ngaihtuah in om a, lamen tak lah ginlelhna khenkhat nei di un gintakhuai hi. "Ka tanchinhoih uh thu kia a nakiang uh hongtung lou in thilhihtheihna leh Kha Siangthou leh nakpi a theihchetna toh a hong tungzaw hi" (1 Thes 1:15).
Khasiangthou nasep tamlou I en lai ding:-
Khelh kiphawkna leh pianthakna honpia: Mikhial I hihdan hon kiphawksak tuh Pathian Kha Siangthou ahi. Mihingte pianpih tuh dik kisakna ahi. Eden huan a theigah a nek lai un Adam in Evi ngoh in, Evi in gul ngoh hi. Mahni kisiamtan sawmna, mahni dik kisakna tuh mihing a om khelhna ahi. Penticost ni a khelhna kiphawk a sut (pierce) bang a nasa di’a nasemtu Kha Siangthou ahi (Nas.2:37). Huai khelh kiphawkna tungtawn in mi sangthum in pianthakna ngah uhi (Nas.2:41). Huan, piangthak I hihdan hontheisak tuh Kha Siangthou ahi (Romete 8:16).“Amah a hongtun chiang in khelhna, diktatna leh vaihawmna thu ah khovel khial ahihdan a theisak ding,” Jesu’n achi hi (Johan 16:8)
Hansanna honpia hi: Lau leh ling kawm a Jerusalem pindan sungnung pen a kikhum nungzuite tuh mipi mai a dingkhia in "Jesu, na kilhlup uh Pathianin a kaithouta, huai theihpihte ka hi uh, nou, noute ngeingei in Jesu na khailum uh” chiin lau a taisepa Peter tuh Kha Siangthou a dim in hangsantak in thugen hi.
Khamuanpa leh sinsaktu: Jesu’n a nungzuite kiang ah Pa in khamuanpa, Kha Siangthou ka min in honsawl ding a bangkim a hon sinsak ding (Johan 14:26a) ana chi hi. Nang hon khamuanpa leh sinsaktu in Kha Siangthou na neita hia?
Gingtute hon sungluah: Jesu hondampa a I pom khit chiang in Kha Siangthou in hon sungluah ahi. “Pathian temple na hih uh leh Pathian kha noumau sung ah a teeng gige chih na theikei ua hia…” (1 Kor 3:16). Pathian Kha Siangthou tenkhum hihlam I kithei hia, i hinkhua huai I sung a teeng Kha Siangthou in hon thunun hi’n I thei hia??
Kha thilpiakte theihchetna: Mihingte’n kha thilpiak tuamtuam Pathian apan I tante, Esk. pilna, theihna theihkakna, ginna, hihdamtheihna, thillamdang-hihtheihna theisaktu tuh Kha Siangthou ahi (1 Kor.12:7-11).
Hichituk Kha Siangthou in gingtute honthuam ahihmanin tu, hun nanung leh buaina lak ah lungkham mangbang in omkei ni, Amah kithunun sak in pitu in zangni chi'n I kihasuan hi. Toupa’n thugelh simtute hon vualzawl hen!
