Jesu’n, A nungzuite toh hun A zatkhawmna mun poimohtak tuh Jerusalema “inndan tungnung” ahi. Bible a Tanchinhoihte’n hiai muna thilhih tuamtuamte leh hiaimun poimohnate hiai bang in gen uhi (Bible telsuite’n anuaia mun kigente munkikhat hi dingin suut uhi):
(a) Jesu’n, Anungzuite’ khe A silsakna mun (Johan 13:4-11)
(b) Nitak Ankuang nanung A umpihna mun (Luka 12:13)
(c) A thohnawn nunga nungzuite kianga Akilakna mun (Marka 16:14, Luka 24:33 & Johan 20:19)
(d) Van, A kahnunga sawltakte omkhawmna mun (Nasepte 1:13)
(e) Sawltak di’a Mathia teeltuamna mun (Nasepte 1:15)
(f) Pentekost ni a Kha Siangthou piaka aomna mun uh (Nasepte 2:1-4)
Tulai pau in genle, a ki-quarantined na uh chile’ng I genkhial kholkei ding. Khovel leh gamsung vaihawmtute akipan ki-quarantined na mun, A nungzuite toh Jesu’n hun sehtuam leh hun tuam liauliau A zatna di’a quarantined zelna mun ahi. Huai hunlai a gamvaihawmte’ laka kipan buktuamna (quarantined) mun ahih kawmkawm in Jesu’n A nungzuite sinsakna tuamtuam apiakna mun leng ahi.
Nasepte 1:3 ah, Sihna tunga vualzoua Athohnawnnung ni 40 hial sawm-le-khatte’ kianga Akilakzohin, Jesu Van ah pitouhin om hi. Sawm-le-khatte’ kianga A Thupiak nanungte Nasepte 1:4-8 ah kimu hi. Abiikin, Jerusalem khua paisanlou a Pa thilchiam ngaak ding, chihleh ahun leh ani Pa kia loungal in theilou ahihdante genlang nuamdiak I hi.
1. Paisan kei un. Jesu’n Anungzuite’ kianga Jerusalem khua paisanlou di’a A genbangin, Van a Akahsan nungin sawltakte tuh lungsim munkhata omin, phatuamngaitaka thumin a omnilouh uhi. Pathianin A Thuchiam atangtun ngeiding chih Jesu hilhna panin za ua, ginglellou in ahongtunding ngaakin omnilouh uhi. Om nilouh theihdan khat tuh bangmah hihloua gumgaw-tanga thuchiam hongtungding ngaka om maimai theih ahi. Himahleh, phatuamngaitakin thumin mimal khat-le-khat kihihhattuahin omnilouh uhi. Heutu leh Zuihpen’ paisansa tuh mihing lamah mahni aituam nnate gel a hunpaisa a anasepnate uh sutzopnawn mai bangleng thilhitheitak ahi. Ahihhangin, Jesu’n A thohnawnna ding A genkholh banga nithumni a Thounawn ngei amit ua amuh un A thuchiam pelloua tangtun ding ahi chih atakin ana chiankhinta uhi.
Eite’n leng Khalama I paisanlouh ding leh omkipna ding tuh ginglelloua Amaha kibulphuhna kip ahi. Salam mahmah ah leng I bitzawkna ding in I paisanlouh ding uh mahni innsungkepna leh Khrista kibulphuhna dik tuh alampi omsun ahi. Tulai diakdiak adi’n, eimah innsungtek ah bitna om hipen in kilang in, mahni innsungchiat ngaipoimoha kaihhuaiding tuh I mohpuakna leh alampi omsun hileuleu hi. Ahuchihlaiin, mahni innsunga omtheihdan lamtampi omsawnnawn hi. Paw-lama hii-leng hongven ding gumgawtang ngak a om maimai, ahihkeileh mailam dinmun ding leh innsungkuante’ Khalam dinmun bawlphatna hun a zat, chihte ahi. Sawltakte’n lungsim munkhata oma, phatuamngaitaka thuma angak nilouh bang un, lungsim munkhat ah I omthei na uhia? Phatuamngaitakin I thum thei uhia? I bitna innsung pawtkhiaksan lou in I om nilouh zou na uhia? Sawm-le-khatte’n thupiak ana zuiloua, phatuamngaitaka panglou uh hileh Kha Siangthou piak hun mansuahkha thei dinmun ahi uh. I ai-tuam nnate awlmohziak leh paisanlouh ding I paisan khaknakte uh ziaka, I tan di’a kilawmte na-ngawnleng mansuahnak I hikha ding uh. I hoihna dinga Pathianin Aseh tangthei dingin I omna ding muna omin I ngak nilouh ding uh ahi. A houpihna Aw zapha dingin Alampite pialsanlouin ngakzoutak leh lamentakin thum gige kawm in ngakchiat le, A hon zatna ding lampi a kalsangzaw suanthei ding I hi.
2. Ahun leh ani Pathian kia’n athei: Sawltakte’n, Toupa tu in hia Israelte’ kianga gam na piaknawn ding? Chih in dong ua, salam thila dong uh ahikha ding. Ahihhangin, Pathian Lalgam tunding nawn di’a A hong painawn ding thugen ahizaw hi. Kilaakna:3:3 ah hichi’n chi hi, “Huaiziak in, na muhdan leh na zakdan theigige in; kem inla, kisik in. Huchia na kiven keileh, guta bang in ka hong pai dia, bangchik hun in ahia nang k'on phawn ding chih na theikei ding”. Mihing in atheihlouh ahihhanga amah adi’a hun poimoh mahmah nih om hi – asih ding hun leh Jesu hong painawn ding hun. Anih in peltheilou tuaktuak hi. Jesu hong painawn ding kholdiak, asih leh ahin in leng kuapeuhin tuak ngeingei ding hilai hi. Jesu hong painawn ding Pa loungal kuama’n theilou a, guta bang in kiginlouh laitak in hongtung ding hi. Tuamah bangin mihing hinna beiding hun Pa loungal kuama’n theiloua, guta bang in hongtung ding hi. Sihna in hong gumang ding hiam, ahihkeileh Jesu Khrist in. Gukmang in I om ding ua, Jesu Khrist gukmang ah I telkha diam? Ahihkeileh, tangtawn sihna gukmangna ah.
Khalam leh salam dinmun dotna tampite dawngthei ding in hun hoih leh hunpha, tulel a lockdown leh quarantine hun, piak I hi uhi. Sawltakte’n Kha Siangthou piak chiama aom uh ngaka hun azatlai un, ahunhoih uh amawkna in zangbei mailou uhi. I gensa ahunzatdante uh chihlouh maban anasepna ua phatuamding in, sawltaklaka simtel ding alak ua mi teelna hun in zang uhi. Taksa in Jesu’n hiai kiteelna ah va ompihkei mahleh, athilhihding uh thumna a Pathian dong masa in, ai-san in teel uhi. Heutu dinmun awngta pen kituha kiselbuai inleng aomkei ua, huainaksangin, ahihpeuhpeuh uah Toupa dong in, alak uah telsak uhi. Ei gingtute’n leng Toupa I ngakna ah, lungsim munkhatpu in phatuamngaitakin I ginna ah I omnilouh uhiam, kivelthak chiatni hang. Sawltakte’n amaulama kisakkholna ding omte anazoh ua, lungsim kihawngtak toh angak ziak un Kha Siangthou piak in a-om uhi.
Thukhitna :Khovel hiipi leng, kial thuthang leh kidouthuthangte’ ziaka khovel paidan khekdanglamin omzel mahleh, I ginna lingsak kei ni, hiaite aom ding him ahi. Hiipite, kial thuthang leh kidouthuthangte hong venga khovel paidan ngeina (I chihsek uh) ahong omkiknawn ngeiding chih kia lamenin I lametna tengteng huaikia a ngalou in, Jesu Khrist ah I lametna bukim nga chiat zaw ni hang. Eite’ etdana khovel ngeina I chihte banga angeina a ahong omnawn leh, huaite A honpiak behlap ahi chithei di’n, I Khalam nuntakna ding masuanpen in neizaw ni hang. Tuabanga Amaha omte’ adi’n koimunpeuha I om in zong, A Kha Siangthou vehna chiklaipeuhin tangthei gige hi hang. Hiipite, kial thuthang leh kidouthuthangte lamangthei Pathian ahi, Ama’ theihpihloua thiltung bangmah aomkei a, Amah kialou kuama’n abeiding hun le ni theilou hi. I tuahlelte’ ziaka Pathian naihsemna leh Amah toh kituahnahuna I zat khakleh hampha penpente I hi di’a, Ama’ thupiaka hiite hong beichiangin, A vualzawl nawnsawnna ahi, I chi behlap theilai ding uh. Hiite, kialte leh kidounate omzel mahleh omdenlou ding hi. Ahihhangin, mihinga di’a khatvei sih setdet di’a seh ahi a, ahunlai a Pathian toh kituahna I neikeileh KIKHELNI omding ahi.
Pathian itte, Ama'n a seh banga A sapte’ adi'n, a hoihna ding un bangkim in Asepsak chiat chih i thei hi. Romte 8:28
Van Laukha Siangthou hon ngai ung..... No’ng hihhalh nawnkei di’a hia, Toupa Aw... chi in Amah kiang’h thum le’ng, Hong hihhalhnawn ngeingei ding ahi. Simtu deihthohtakte, A’ Kha Siangthou in hong pumluah chiatta hen aw!
