Kum 2019 kumtawp lam in China ah COVID-19 hiipi natna ziakin buaina nasatak hong kipan a, 2020 kum bul in khovel pumpi hon zeel suaka, ei lak leng nasatakin hiai puulnatna in hon pumtuam hi. Hiai puulnatna ziakin Lockdown puankhum in i om ua, nektakzonna ngeina dan a om theilou, haksatna nasatakmai i tuak uhi. Tuchiangin a hiipi bei chihna hilou in ngaihtuahnate tawldam zawdeuhin a om theih simsimta a, himahleh nektakzonna, mihing damtheihna leh ngaihtuahna nasatak a hih nawgkai ahihmanin, lungkham leh mangbang a mailam hinkhua ding lungbuai kipumdim hi. Hiai hun haksatak mai a i dinlai un Pathian in Amah gam nasepna a biktakin kha mangthang matna ah kong thak hon honsak hi’n a muhtheih hi. Nidanga i na chiin tam louh uh online sermon tungtawn a kha mangthang matna nasatak mai in heutute tungtawn in a muhtheih a, Toupa tung ah i kipak mahmah uhi. Hiai online sermon banah panpihna khut zaakna tungtawn in leng kha mangthang matna di’a Pathian in kong hoihtak hon honsak thak ahi diam, i chi hi.
Khopi Saptuamte’n tu hun remchanga la in, panpihna khut zaakna tungtawn in, gingloute lak ah tangthupha tungsakin, hotdamna huang sung ah pilut theih i nei dia’m? Gingtute’n nasep tuamtuam i neihte lak uah a poimoh penpen, kha mangthang mat ding ahi hi. Khopi Saptuamte’n panpihna khut i zaakna uah bawng thum: Saptuam sungmi lak, gingtu pawldang lak leh gingloumite lak, chi in khen lehang Pathian lal gam nak seem a hihkip, puahphat leh kellet in a om thei dia’m chi I hi.
1. Saptuam Sungmi Lak Ah:
Johan 15:11-13. Ke’n nou k’on it bang in noumau leng ki-ittuah un.
Johan 21:15-17. Jesu’n Belamte vaak ding, ching a kep ding kichiantak in gen hi.
Hiai ah, na Belamte vaak in a chih, Saptuam member-te khalam leh Salam gen tuaktuak ahi. Khalam ah vaak a, kep a pichinsak ding i mohpuak ahi. Huai ban ah salam ah leng gilkial leh haksatna a tuah un leng etzui ding gen hi’n a muhtheih hi. Huaiziakin, tua puulnatna ziaka sepna ginataka sunzom thei nawnlou a, khosakna buai, lungkham mangbang a omte lak a panpihna khut i zaaknate’n Salam panpihna tan a khawllou in khalam hinkhua sukha ding tan a Saptuam in kal i suantouh lai poimoh hi.
2. Gingtu Saptuam Dangte Lak Ah:
Mathai 22: 39 Nangmah na ki-it bang in, na innveng leng na it ding ahi.
Paunakte 3:27-29 (BI) I hih theih ahih nakleh, i khut a thilhihtheihna a omlai in, i innveng kiang ah zingchiang in hong hohnawn inla k’on pe ding chi het kei ni.
Nasepte 4:32-35. Lungsim mun khat leh ngaihtuahna mun khat in a om ua, kuamah in a thil neih uh kei a ahi a chi kei ua, thilteng a kikop ua, kuamah tasam in a om kei uh.
1 John 2:9-10 (BI). Kuapeuh, vaak a om kichi napi a, a sanggam a muhdah leh mial a omlai ahi. Ama’ sanggam it mi peuhmah, vaak-a nungta ahi a, amah kipalpaisak ding amah ah bangmah a om kei hi.
Galatiate 6:2, 9-10. Puakgikte kidawntuah chiat un, hichi bang a na hih chiang un, Khrist dan zuite na hi ding uh. Nna hoih sep chimtak kei ni, i lungkiat kei a i tawpsan kei leh a huntak in a gah i mu ngei ding hi. Huaiziak in, hunlem i muh hunhun in mi tengteng tung ah nna hoih sem ni, adiak in ginna a innkuanpihte tung ah hi kholdiak hen.
1 Korinthte 3:1-9. ...Mi khat in “Paul pawl ka hi,” midang in, “kei zaw Apollos pawl ka hi” ...Ke’n ka suan a, Apollos in tui in a vaak a, Pathian in a khangsak hi. A khangsakpa Pathian loungal, a suanpa leh tui a vaakpa bangmah ahi kei. ...A suanpa leh tui a vaakpa pumkhat ahi ua, amau sepgim bangzel in, kipahman a mu tuaktuak ding uhi.
Ei Saptuam member kia hilou, pawl tuam i innveng’ Saptuam dangte toh kideihsaktuah, panpihngaite kipanpihtuah a, ki-ittuah ding I hihdan hon-gen hi. Hichibang a ki-ittuah a kideihsaktuahin om lehang, ei gingtute kikar ah ki-itna om di’a, kal suankhawm a pankhawm ding, Toupa’ hon deihna ahi hi. Gingtute kikar a kideidanna, kipanpih utlouhna, ki-elna, mihing in gamgi bawl a kikhen tiltel a, a pawl a pawl a kikhenna, ei Saptuam mi hiloupi i kichihnate uh Pathian deihlam ahi het kei hi. Gingtute pangkhawm a, khat in a suan, khat in tui nih ding, huaite Pathian in khangsak a, gah suang ding ahihdan hon mu chiangsak mahmah hi.
Sam 103:10 – “I khelhnate bang in i tung uah ahih kei a, i thulimlouhnate bang in a honthuk sam kei hi.” Pathian i tung uah a hoih mahmah mai a, huaiziakin e’n leng mi’n ei tung a a honhih bang hihlou in, Toupan i tung a thil hoih a honhih bang in midangte tung ah hih sawm ni. Vualzawlna kichi Pathian a kipan himahleh a hong luankhiat taktakna pen mihing leh mihing kikar khawng ahi tangpi sek hi. Khrist a hotdam mite’n, midang toh kiteh a, gingtu Saptuam pawl dangte’n leng ahihsam ua chi a, ahihloute toh kiteh mawk hilou in, Jesu Khrist in ei adi’a thil hoih hon hihsakte i et a, tua thil hoihte midangte tung a i hih a, Jesu hon itna i latsak a, kha mangthang mat ding, gingtute mohpuak ahi hi.
3. Gingloute Lak Ah:
Paunakte 19: 27. Genthei leh lungkham a omte panpihna pete’n Toupa leitawisak ahihmanin, hiai a a panpihnate Toupa’n, a dinkik nawn ding a chi lai hi.
Mathai 28: 19. Kuan unla, namchih apan nungzuite bawl un, Pa, Tapa leh Khasiangthou min in Baptist un.
Pathian in kilchih leh nam chih lak a pai a, gingloute lak a Tanchinhoih gen a, hotdamna huangsung a pilut ding in ei a Saptuamte hon deihna ahi hi. Gingloumi COVID-19 ziaka nektakzonna mumal nei nawnlou, haksatna tuaka lungkhamna leh thawmhauna in a pumtuam mi tampi om ding hi. I omna khopi ah sakhua tuamtuam Hindu, Muslim, Buddhist, etc tampi omte mitsuan a sut vengveng kawm in, panpihna khut vazaak lehang, tangthupha puanzakna di’a kong thak gah phatak suang ding, Pathian in honsak ana hikhathei hi. Hiai hun, Jesu Khrist a hotdamna chii tuhna di’a hun hoihtak di’n i zangkha thei dia’m?
Gingtu Saptuam Pawl Leh Pawl Dang Kibatlouhna:
Tua COVID-19 ziakin panpihngaite panpihna (relief hawmkhiakna) lam ah, Government, NGO, Civil Organisation, Khotlang a pawl tuamtuam, leh Committee kibawl thak tuamtuamte’n awlmoh in, nasatak in haksa leh kialte panpihna nasep a sem ua, amaute mohpuakna mit a muhtheih taksa a haksatna panpihna tan ahi hi. Huai ban ah, hiai pawl khenkhat in, inn kizom hilhel bang, nou kou member hilou, kou tribe hilou, kou pawl hilou chi peuh a kikhen a relief thil hawm bang kitaikan thei pawl om hi. Gingtu Saptuamte’n i kalsuanna uah, Saptuam member leh member louh kikar khenlou a, nou-kou mi hilou chihte hihlou a, huai banah salam poimoh tan kia a bei thei ahihet kei chih i phawk thak semsem uh poimoh hi. Gingtu Saptuamten salam gilkialna leh haksatna tan a i khutzaak i khawl khak zenzen leh Khovel pawl dangte toh i kibatlouhna om hetlou ding a, phetlou a Pathian tuppen tangtawn hinna sem khalou suakthei i hi.
Puan-Inn Kek Ni:
Khopi Saptuamte hiai dotnate kidong lehang: Ei Saptuamte’n COVID-19 ziaka haksatna tuakte lak ah panpihna khut i zaak khata uhia? I zaak khaktak uhleh kuate lak ah? Ei Saptuam member teng lak kia kibuaipih i hi kha uhia? Hiai ahihleh ei-le-ei kia kibuaipih a, i laamtual i innsung kia hisakden tel ding i hi dua’m? Gingtu/ Saptuam dangte lak ah leng khut i zaak kha theita uhia? Gingtu dangte toh pangkhawm a Pathian lalgam bawlpha di’n kisa ni uh. Gingloumite lak ah panpihna khut i zaak kha uhia? I zaak khaktak uhleh Pathian lal gam kek dia kisingsa lel i hi ua, kha mangthang man a Khrist lalgam keklian ding in kalsuan beh lai ni uh.
Awle panpihna i na hihkhakte uh, (Saptuam sungmi, gingtu pawl dang) thilpiak toh deihsakna thuchahte (message/ gelh thoh/ phone a houpih) kizui ding hiven, a bohzuina poimoh mahmah mai. Hiai i bohzuina uah, khalam a hotdamna kitheitelsa ahih uh leh, Pathian toh kinaihsemna, Pathian thupi semna ding in aw. Khalam hotdamna kichianlou a om khak zenzen leh khalam hotdamna kichiantak a neih theihna d’ua, kalsuan zom poimoh mahmah ding. Huai banah, gingtu Saptuam pawl dangte lak ah, a khalam vai uh bohzui a, khalam leh salam a kinaihsem a kalsuan touh ding. Gingtu Saptuam pawl dangte toh kitanauna bawl hoih sem a maban a Khalam nnasepna ah nak zawsem a kal suankhawmna di’a, kalbi poimohtak hithei hi. Hiai nasepna tungtawn in gingtu pawl tuamtuamte kikar ah nna semkhawm a kal suankhawmna di’a chii (seed) tuhna hoihtak hithei hi. Khopi a Gingtu Saptuamte’n Jesu’n eite khentuam neilou a hon itna tungtawn in, “kou pawl… nou pawl” chia mihing in gamgi i na bawl khak sek pen uh khentam in, pangkhawm a kal suankhawmna in zangthei le a uthuai mahmah mai. Khopi a om Saptuamte adiakin ei Zomi (Gangte, Paite, Simte, Thangkhal, Vaiphei, Zou etc) te’n kal suankhawm lehang, khopi ah leng Toupa lalgam kekna ah masawn mahmah di’n a lamethuai hi. Tua tan a khollou lai in ei unau Zosuante’n (Kuki, Hmar, Mizo, Zomi) semkhawm in kal suankhawm lehang bangzahta in ahoih in a etlawm in ma i sawn ding uah aw. Tua dana gingtu Saptuamte kal suankhawm a i om chiang in Pathian puan-inn a bawl hoih, a puahpha, a etlawmsak kihi mahmah ding hi. Khopi a Saptuamte kal suankhawmna in i innlam (Lamka zaang) ah gahhoihtak suang thei lai hi. Gingtu Saptuam pawl tuamtuamte pankhawmna tungtawn a Pathian lam a harhthakna (revival) ei Zosuante lak i gam ah hong tungthei hi. (Gingtute lak a pawl kikhenna a nasat luat ziak a i gam ah, Pathian apat harhthakna dal a om hikha nilouh thei hi!)
Gingloumite lak ah, panpihna khut i zaakkhak theih leh hoihlua a bohzuina poimoh mahmah. I na hihkhak naikei lehleng hotdamna thu tangkou theihna di’a, ei khopi Saptuamte adi’a kong hoihtak hong kihong hikhathei ahihna ah, ngaih poimoh tuak mahmah hi. Panpih ding zong in, panpih theih ding i muhte, a kha uh hotdam ahihtheihna di’a bohzui thei lai le. Gingloumite hotdam a om a, kha mangthang mat ahih chiangin Pathian lalgam keklian kihi ding hi.
Nna hoih sep a pat a baihlam tukin a bohzuina baihlam khollou thei hi. Bohzuina om louhna ah gahsuahna taktak om thei khollou. Gingtu Saptuamte’n kha mangthang matna ding in panpihna khut i zaakte uh hoihtaka lungke hetlou a, Pathian hatna muang a bohzui poimoh mahmah hi.
Puulnatna ziak a khopi Saptuamte’n panpihna/ relief khut i zaakte uh tungtawn in, Saptuam mite lak ah salam kipahna leh khalam kitheihchianna, gingtu pawl dangte toh khalam leh salam a kinaihsem a Pathian gam nasepna ah kal suan khopna banah, gingloumite lak ah Jesu nungzui ding bawlna di’n, Pathian in vanzat poimohtak di’n hon zatsakleh aw, i chi ahi. TOUPA aw, k’on ngen uhi….
…..
*Thugelh hon petu, EBCC Central Delhi pawlpi a TBSUC member, Publication (C-Dew) & Media incharge lenlel ahi. Lungdam lua hang.
