Kha a dimna leh Kha kipisakna I chihte a kiton helhel ahi. Ephesate 5:18-24 sung ah (a) Zu (Ua-in) kham a omlouh diing (b) Kha a luahdim a omzawk di, chihleh (c) Kha a dimna di'a kalbi tot di kigen pawl khat om hi. Hibang in I taklang thei hi.
✓Phatna laate, Pasian late leh Khalam laate a kihoupih;
✓ TOUPA ma a laasak, lungsung a gingkilawm bawl;
✓Thilbangkim ah, i TOUPA Jesu Khrist min a Pa Pasian kianga kipahthu gen a om gige;
✓ Pasian zahtak a launa hang a kiniamkhiaktuah tek in.
Kha a dimna thupoimawh, Jesu Khrist - mahni Lal & Hondampa a sang, Khrist Kha neita mite a di'a gelh ahi. Rome-te 8:9 ah, "Pasian Kha noute sung a teeng taktak ahihleh, pianken khelhna sauk a om nahi kei ua, Khauk a om na hi zaw uhi," na chi chet hi. Abanah, "Mi kuapeuh Khrist Kha neilou lah Khrist aa ahi kei" na chi leuleu hi. Huai Khrist Kha na neita hia, sanggam?
Laa tampi ana phuak, lungsung a ging kilawm a bawlsek, Kumpipa David in Vanglian TOUPA kiang ah, "Na tung a ka khelhlouh na diing a ka lungsung a Na Thu kemhi'ng" (Sam 119:11) na chi. Sawltak Paul in KhaSiangthou theihsak in, "...Kha ah om un, huan sa utna tuh na hih tangtung kei diing uhi. Sa in Khadou a utnak a, Kha in leng sadou a ut samnak ahi; thilhih natupte uh nahih theihlouhna diing un huaite khawng a kikalh uh ahi ngal a” na chi (Gal 5: 16-17). A gen chiang soksok e maw.
Lockdown, Amah tawh kinaih seem a hun I zat di lametna tawh TOUPA’N hunlem hon bawlsak zaw na hi di hiveh aw. March 24, 2020 apan tukikal sung hun bangchi'n na zangliam a, unau? Tuhun akipan May 3, 2020 sung zat di nageldan TOUPA'N hon dong leh bangchi’n na dawng di’a? Kha a dim nadi'n, Kha a pi hih na di'n Amah tawh (24 x 7), asun-azan A’ Thu leh Laa ngaihsut/ suutsuut banah HOULIMNA a neihkisam hi (Sam 1:2). Tuadan a hinkhua I zat leh bel, a gahsuah ngeingei di om hiveh aw -
1na ah: “Amah zaw tuiluang kiang a sing suan, a hun a gahzel, a nah leng kaaingeilou bang ahi a; a thilhih peuhmah tuh a lamzang zel diing hi” (Sam 1:3). 2na: “Khagah ahihleh, itna, kipahna, lemna, thuaktheihna, migitna, hoihna, muanhuaina, nunnemna, kidektheihna khawng ahi zaw uh; huchibang kalh lam in danthupiak himhim a om kei hi. Huan, Khrist Jesu a hitate'n tuh sa, a lunggulhna leh a duhgawlna tawh a kilhden ta uhi" (Gal 5: 22-24). Hallelujah!
TOUPA’N A’ Thu pansan a saulou I kikupte sathau hong nilhsakta hen!
