Huan, Ua-in kham in om kei un, huai ah tuh kideklouhna a om ngal a; KHA A DIM in om zaw un (Eph. 5:18)
Pa’ thuchiam bangngei a Kha Siangthou hong tunna thu Nasepte 2:1-3 ah I mu hi (Jn.14:16). Lamdangtak zaw ahi ding, huai Kha Siangthou nungzuite tung a hongtu, mit mahmah a mute leh a thawmging zate’n a khiakna thei zoulou a,“ua-in thak kham ahi uh” chi a khenkhat in a nuihsan hial uh (Nas. 2:12-13). Kha Siangthou nasepdan tuh a lamdang mah ahi. Mihing ngaihtuahna a suikhiak zoh vual ding leng ahi kei hi. Huih nung bang a a paina lam theihzui zoh ding ahi kei (Jn.3:8). Huchi hinapi in lah Kha a Dim ding a sawl in I om veve hi.
A ziak bel, Sandeep Poonen in a gen bang in (The Spirit-Filled Life, 2017), Kha a dimna tungtawn in khelhna gu apan I suakta thei a, huchimah bang in, Kha a dimna tungtawn in khelhna thilhihtheihna apan leng I suakta thei hi. Huan, Kha a dimna tungtawn mah in khelhna omna apan I suakta thei lai hi. Huaiziak in Kha a Dim a I om a poimoh hi.
Covid-19 hiipi ziak leh khaupe honpi ziak a khovel maban ding mumal lou tak a omlai in gingtute tuh KHA A DIM hinkhua zang ding a phutluih in I om hi. Huai tuh Kha Siangthou thunun sipsip hinkhua genna ahi. Aihleh, bangchi’n KHA A DIM hinkhua I zang thei dia?
1. Jesu Khrist hondampa di’a sang masa in (Jn.3:16-18; 1Kor.12:13)
2. Kha Siangthou lungkhamsak lou in (Eph.4:30)
3. Khrist batna nei a ginna a kalsuan in (Rom.8:29)
4. Khalam thilte kia a kibual in (Gal.5:16; Rom.8:13)
5. Khelhna nasep khempeuh tawpsan in (1Pet.2:24; 1Jn.3:6)
6. Pathian thilhihtheihna kia a kinga in (Mk.10:27; Jn.11:40)
7. Pathian thupiakte zuihna tungtawn in (1Sam.15:22; Jn.15:10)
Pentikos Ni a Kha Siangthou in nungzuite hinna A thunun mahbang in, Kha Siangthou thunun hinkhua zang a Kha a Dim gige thei ding in Khrist gingtu mun chih a omte Toupa’n hon ompih chiat hen aw!
….
*Rev V Nenglian in EBCC Delhi ah saptuam kemtu Pastor hihna kum 2010-2016 sung lenkha hi. A tanchin kimzaw link kipia ah theihtheih di: https://ebccdelhi.org/who-are-we/meet-the-pastor.html
