Kuate kemtu muahhuai ahi ding ua? Kua te'n Pathian apan in "na hih hoih ahi" chih kammal a za ding ua?
Paul in Ephesate kiang a lai a khakna ah Pathian apan kilakna tungtawn a Khrist thuguk a kiang a theihsak a om ahihdan gen hi. Hiai thuguk ahih leh Juda leh Jentelte pumkhat suahna thu ahi (Eph. 2:11-22). Hiai thuguk puanzakna nasep leh Jesu Khrist pumpi tungtawn a kilemna leh pumkhatna thu huai hun lai a ding in theihsiam haksa thil ahi. Himahleh Jesu mat a a om ding in Nungzuite' thugen tungtawn a khovel a gingtu hong om dingte a thumsakna ah gentute pumkhat a hihna ding un ana thumsak khinta hi (Johan 17:20-26). Paul in hiai Khrist pumpi a pumkhat suahna thu a gen ziak in Juda-te apan soisakna kia leng thuak lou in man uhi (Nas. 21:29).
Tuni a i tangtelna sung ah Paul in Khrist thuguk kemtu muanhuai ahih dan gen hi. Jesu Khrist a ding a sikha kia hilou in sikha muanhuai ahih dan leng kimu thei hi. Jesu in Matthai 25:14-30 sung ah sikha muanhuai gentehna thu a genna ah sikha teng in Pathian apan pahtakna kammal, "sikha hoih leh muanhuai, na hihhoih hi" (Matt. 25:21, 23) chih za veklou uhi. Sikha thum lak a nih in hiai bang pahtakna kammal za uhi. Tua ahih man in gingtu teng in hiai bang kammal kiza veklou thei ahi chih hon ngaihtuah sak hi. 1 Korinte 4:2 na ah Paul Pathian nna i sepna ah kemtu muanhuai hi ding in honhilh hi.
Kuate kemtu muanhuai ahi ua?
- Kemtu Muanhuaite'n Khrist leh Midangte ading in thuak ngap uhi: I Lai Siangthou tangtel Ephesate 3:1na ah Paul in "Hiaiziakin kei Paul, nou Jentelte ziak a Khrist Jesu hentapa in" chi in gelh hi. Paul in Jentelta ziak a Khrist sikha ahihdan gen hi. Jesu Khrist ziak a thuak a ngap kia leng hilou in midangte a ding in thuak ngap hi. A chipih Juda-te a ding kia hilou a simmoh mahmah uh Jentelte ading nangawn in thuak ngap hi. Tuhun a Khristiante lak a mahni nopsak nang ngaihtuah a haksa thuak khak kilau hileng kilawm hi. Hiai bang ngaihdan pen Kemtu Muanhuaite om ding dan hilou hi.
- Kemtu Muanhuaite Pathian ah Kinga mite hi uhi: Ephesate 3:1-7na sung ah Paul in Pathian a muanna thu muhtheih in om hi. Paul in kuamah sikha hilou ahih dan tang 1na ah gen hi. Jesu Khrist kimansak a Khrist sikha ding in kipia hi. Huai kia leng hilou in Pathian kilakna tungtawn in Khrist thuguk theihsak a om pen theihsawm in Pathian thilhih theihna ah kitulut zaw hi (tang 2-6). Tang sagihna ah Pathian hehpihna leh Pathian thilhih theihna tungtawn a thuguk kemtu a pangthei ahihdan theitel mahmah hi. Tuni in, kemtu hi ding a hon bawl Pathian a ahihdan phawk in muanhuai tak a kep di’a hon piakte kem ding in I kichial thakthak hi.
- Kemtu Muanhuaite Thunuailut uhi: Ephesate 3:8 na ah Paul in, "Kei, misiangthou tengteng a neupen sang a neuzaw kiang ah hiai hehpihna piak ahi: Khrist hauhsakna suikhiak vuallouh Jentelte kiang a gen ding in," chi hi. Paul in suang ding chi leh khovel ah suan ding nei tham hi. Philippite 3:4-6na sung ah: "Sapum ah suang ding chile hang kei mahmah in suan ding ka nei sem ding hi. Mi himhim in sapum a suan ding nei a a kitheih leh ke’n ka nei sem hi: A ni giatni a zeksum, Israel chi, Benjamin nam, Hebru mi kholdiak, dan lam a Pharisai; Phatuamngaihna lam chi lehang saptuamte sawi; dan a diktatna lam chi lehang gensiatbei ka hi," chi hi. Himahleh tang 7na leh tang 8na ah: "A hihi hitaleh, thil kei adi’a punna peuhmah Khrist ziak in manna in ka simta hi. Hitaktak hi, ka Toupa theihna manpha ziak in thil tengteng ka tanta hi. Khrist ka tan theihna ding in thil tengteng ninneng bang phet in ka sim hi," chi leuleu hi. Taksa ah suan ding nei mahleh Jesu Khrist theihna ding ahihleh huaite bangmahlou ahihdan thei chiang mahmah hi. Kemtu Muanhuaite Khrist nuai ah kitulut uhi.
- Kemtu Muanhuaite'n Khrist Thuguk mite kiang ah gen uhi: Ephesate 3:8-13na sung ah Pathian apan kilakna tungtawn a a kiang a theihsak a om "Khrist Thuguk" miteng kiang a phuangzak ahihdan muhtheih in om hi. Jesu Khrist hausakna suikhiak vuallouh Jesu Khrist tungtawn a gingtute'n i tan uh hamphathuai ahih dan phawk in gim-le-tawl genlou in miteng kiang ah huai Tanchinhoih gen in kho neu leh kho lian tawn in zin koikoi hi. Kemtu muanhuai i chihte Khirst thuguk amau a ding a kem/ im te hilou uhi. Kemtu Muanhuai in Pathian thuguk mite kiang ah gensawn zaw hi.
Kemtu Muanhuai hiding in Toupa'n hon vualzawl chiat hen!
