Pawl giat (cl-viii) ka pass zoh apan innlum nusia in khualgam a khosak ka pan hi. Hiai hun sung a ka lau pen khat tuh sungkuante sih thu a gal a zak khak ding ahi, khatvei tei hong tangtung ngei ding chih lah theihsa hi a. July 26, 2021 zan kim lak in ka nun hon omlouh santa ahi chih thu ka za petmah hi.
Ka nu tangthu hichia tawpta ding ahihchiang in, zan a aluang delh a ka pai lai ua, lenna sung a ka lungsim a hong suak khen khat gelh khia in... Program sung a gen bang le ka ut dek sim na a, hun kibichilh khak ding lauh toh, kam a i gen chia lah a kinehnou baih a..
Ka nu hi mi damthei lou leh zawngkhal den khat ahi. Ka khotheih tung apan inle chik mah a ka nu chi dam vilvel a om lam ka thei ngei kholkei hi. Mi nek bang nethei lou a, a lim a al nei lengle ne ngam lou a kidawm leh gen thei tak a hinkhua zang den khat ahi. Sungna nei den ahihziak in khe li nei sa bang a ne thei kei a, meh kan na tawm a nek ngamlouh hun om hi. Vegetarian diktak a hipen mai. A zawngkhal den mah ahihziak ahi dia, natna thuak bang kuhkal in thuak zou mahmah a, phun chiak leh genhak in omlou hi, huai mah kou le granted a lakha sek ka hizomah uhi. Max Hospital, Delhi a a ki-at lai a doctor pan, she has a strong will power achih ka mangngilh thei hetkei hi, dik le ka sa mahmah.
Khatvei ka khote uh nupi khat Delhi a hong zin lai in hiai hon chi a - na nu le pa kiten dek lai a, na pa kha, hiai mi damthei loupi toh kiten a zi inla a sihsan pah dia chi ka hi uh chih a hon genkha hi.
Midam thei tak leh hatlai mahmah i theih tampi te bang le si phut phut sek ua, himahleh ka nu mi zawngkhal tak himahleh sihsual a adamlouh hun chiang bang in leng lamdang tak in hong damsuah zel a, Bible a mihing damsung kum kigen kum 70 bang pel tou thei chih ka ngaihtuah chiang in, Hezekia tangthu ka lungsim ah honglut sek hi. Pathian in Hezekia damsung kum 15 in a behlap sak a, himahleh ka nu damsung, kum 15 mun thum sang a leng tamzaw a hon behlap sak ahi chih ka theih ziak in Pathian min ka phat hi.
Pathian in nu tel lou a, khosuak zoulou ding ka hi uh chih hon thei a, ka nu damsung kum bang leng hon behlap saksak ana hi maimah hi.
Hatlou leh zawngkhal tak himah leh ka nun thumna manphat dan a thei a, atate ading in thum gige hi. Naupang neuchik ka hih lai in zing khovak ma a thou in, a nung a hon pua a biakinn ah thum ding in hon hohpih zel hi. Damlou a lupna ngak ahihkei nakleh zingkal biakinn ah hoh ngai poimoh petmah hi. Lou ka kuan chiang un, loubuk a sun ann ne ngeilou a, (adik tak a bel a sung hatlouh ziak a ann khing khauhpi khawng a nek zoh louh ziak ahi lim hi). Himahleh kou sun ann ne a ka om kal un amah lou nawl gamlak zul khawng a va pai a, thumna hun va zang zel ahih dan ka thei mahmah uhi. Innlum nusia a khual gam a ka om khiak kum 20 bang pha thei ahita, himah leh koi mun peuh a om leng le thawmhau leh lungleng in ka om ngei kholkei, ka nu thumna in hong lungmuang sak a, hon ching den ahi chih ka theih khiakna a sawt naikei hi. Ka kihou na nung pen tan uale kou adia ni 1 a 2 vei thum gige ahihdan hon hilh hi. "Chik lai peuh ale si dia kiman ka hi, hilele sih zaw ka ut nai hial kei nou adin ka thum nuam lai" hon chisek a..
Tu'n kou adia vualzawlna nak leh ka bitna kulhpi uh lak sak a om ka hita uh chih theihna in hon thawmhau sak mahmah hi.
Ka nu hun na nung, Delhi a ki-enkol a hong om sung leh hospital khawng ka ompih sung khawng ua na thuak leh tawl kisa khawng a a hong thum hithit chiang in ka hehpih mahmah a, nat le sat thuak nawnlou ding in a Toupa kiang ah tawldam thei ta mai leh ka chih nop hial hun om a, langkhat lam ah lah hon nuse mai ding in ka phal thei kei zel hi.
Kei hong ki dong hileh hunta chi ngeilou ding ka hihziak a Pathian in hun a sak bang vaihawm ana hi a.. Ka nu'n a hun nanung a na thuak a gim le tawl tak a sawtpi a koih louh khawng kipahhuai ka sa hi.
Vualzawlna leh siam sinna kong a lohchinna ka ngah hun chiang un ka nu a kipak tham a, hilele huai tengteng a sang hon deih sak zawk khat a om gige hi, huai tuh tangtawn hinna ahi.
Ka nu la deih mahmah khat, neulai khawng a leng ama zak khop a asak hial hial zel kon tel ding -
Pathian Ngaih La 377
Kim Louh Ding Zaw Na Sang
Pastor Thawngkham
Toupa ka damlai hun leh ni mual liam jeljel te,
Theihlouhkal in mualliam in hong thak jel;
Na sat van Salem khawpi thak tual nuam a,
K'ong tun hun ding nite hongnai sak hi.
Na vualjawlna hun leh ni ka tanpihte leh,
Nunnop zaila ka oihpih te;
Na mangtutphah mai a pahtawina zaila,
Oih hun chiang in,
Kim louh ding zaw Toupa, laiah na sa'ng.
Khawvel buaina meipi jing leh tui kihawt kal ah,
Toupa'n eid'n hunte hon thaksak lai;
Tanglai Kanan a Na mite Na pi bang,
Hon pi jel in Toupa hon jui jel ning.
Lawmvual lungtuak it leh ngaih, nu-le-pa itte aw,
Unau sangtampi'n mual hon liamsan nung;
Toupa'n eidia hunte hon thaksak lai in,
Toupa leh A gam di'n hunte zang ni.
