Ama’n ahon limsak gige ziakin na mangbatna tengteng uh Amah tung ah nga vek un (1 Pet 5:7).
Leitung ah buaina tuak ngei lou, lungkhamna tuak ngei lou, haksatna tuak ngei lou kuamah om lou ding hi. Tulaitak a nang tuah buaina leh haksatnate, nang ma a midangte’n ana tuahsa uh, nang nung a midangte’n hon tuah lai ding uh zong hi ding hi. Midang na hilh ngam louh buaina, midang hon dawn thei om lou puakgik na neihte hon kitheihmohbawl ngei lou, hon limsak gige JESU kiang gen in, Amah hakkol nuam a, a puak leng zang hi (Mt.11:28).
A. Ze-Etna Na Tuahte Jesu Kiang Gen In:
Khem leh ze-et a om, Honpa ka ngai, Ka puakgikte hon dawnthei Amah; Jesu kiang gen ning, Jesu kiang gen ning, Ka buai leh lungkhamna hondawn ding.
1. Khristian tengteng tung ah ze-etna hong tung zelzel ding hi. Hiai tuh ginna a hon suhat ding leh ginna mah a thuk zawsem a zungkai ding a, kiptak, muanhuai tak a i din theihna ding ahi.
Ze-etna tuh khemna ahikei. Mei a dangka-eng haltui a om tuh a sianna ding ahi (1 Pet.1:7).
2. Laisiangthou in hon taihilhna, “Deihtakte aw na tung ua ze-etna thupitak hong tung nou mau ze-etna ding a hong tung ahi, thillamdang na tung ua tung bang in lamdang sa kei un” (1 Pet.4:12). Ze-etna tuh i siangthouna ding bang, i kuhkalna ding leh i ginomna ding ahi.
3. Pathian in tupnei a hon tunsak ahi. Sawina himhim thuak lai in kipahhuai in a lang kei a, khasiathuai tak in a lang zaw hi, thuak nung in tuh huchi a sawi zawt a omte adi’n gah khamuanhuai tak, diktatna tak a suah sak zel hi (Heb.12:11). Pathian thiltup theih sawm ni.
B. Buaina Na Tuahte Jesu Kiang Gen In:
Ka buainate teng Jesu kiang gen ning, Amah lawm migi leh hehpihsiam; Amah ngen leng Ama’n hon honkhia ding, Ka buainate beisak pah ding hi. Jesu hilh kithamat tuak lua hi.
1. Tulai khovel i tenna uh tuh buaina adim ahi – Mipite lak ah buaina om, Nasepna ah buaina om, saptuam ah buaina leh i tenna i innsung mahmah ah leng buaina hong giaklut thei zel hi.
2. Mi tampite’n i tuah buaina sukvengna ding in Doctor kiang a pai bang, Ukilte kiang a pai bang leh Police station khawng a zot lai un, Nang zaw na buainate JESU KIANG GEN IN.
3. Jesu’n bel, “Nou semgim leh puakgik paw tengteng aw, ka kiang ah hong pai un, keiman khawlna k’on pe ding hi” (Mat 11:28) chi in niteng in honsam gige, na zot hunhun in na tawldam ding hi. Haksatnate a bei vek ding hilou in Ama’n hondawn ding hizaw hi.
C. Khemna Na Tuahte Jesu Kiang Gen In
Khovel in khial ding in kei honzol hi! Khial ding a khem in ka lung tang om! Jesu kiang gen leng a hon panpih di’a, Leitung in kei a hon zou kei ding.
1. I sihnipna lam ah khemna i tuak sek uhi. Huai omdan tuh i duhlam, i deihlam, i utlam, i muhnop leh zaknop lamte genna ahi. Huaite mah melmapa Setan in thei lua ahihman in hon khempuk sek hi. Huaiziakin pilvang ni, “diabol dou un a hontai mang san ding” chih ahi.
2. Jesu’n na hat louhnate thei hi. Siampu lianpen i hatlouh lam hon theihpih pha lou nei I hi kei ua, eimah bang a lam tuamtuam a khemna tuaksa, khelh bel khial lou nei I hi zaw (Heb.4:15).
3. Jesun i tuah khemnate, i hat louh nate, I kizen louhnate leh i fellouhnate a thei louh om lou hi. Huaiziakin Amah kiang gen peuh leng Ama’n hon panpih ding hi. Amah ngei in khemna tuak a ana thuak tak ziakin khemna tuakte a panpih thei hi (Heb.2:18).
Thukhitna: Buaina, ze-etna leh khemna i tuah te honthei a hon gal-et mailou a lainatna toh hon thuakpih, hon limsak gige leh i puakgikte hondawn ding a honchiam Toupa Pathian i neih man in gingtute hampha hina maizen hang e!! Ka lungkhamna teng Jesu kiang gen ning, Hiai puakgikte kei kia’n paw zou keng; Ka mangbatna ah a hon panpih ding, Ama’n a it A tate kem hi.
