Tuailaite’ Ni a 55 veina hun hoih leh kipahhuai hon musak Pa Pathian kiang ah kipahthu i gen a, simtute tengteng I Toupa Jesu Khrist min in Tuailaite Ni chibai k’on buk hi.
Khovel buai & kinohtak kawmkal ah Tuailaite’ Ni program, offline & online a zang thei di’a I om kipahhuai lua. Hibang apian theihna di’a Committee lunggelte Saptuam heutu (Upa vaihawm) te’n hon theisiam a, Media Team & Worship Team i/c te’n a kisam bangbang kithuahpihna khut taklam honpiak touh uh tuailaite’n nuam kisa in tha kingah mahmah ahi. TOUPA’N thupina tang hen!
October 18, 1965 in Upa N Vungthang makaihna in Hiangtam Lamka ah tuailai bangzahhiam kipawlkhawm in Kristian Tuailai Pawl (KTP) kichi phuhkhiak in om a, huai ni apan Saptuam pumpi in TUAILAITE NI/ BYF DAY chih minvuah in kum teng in kizang tou hi. Hunte hong paitou zel in 2003 in a min Baptist Youth Fellowship (BYF) in khek in om a, huai mah tutan in kizangtou den h’i. Heutu masate’n muhkholhna leh tup-le-ngim kichiantak toh KHRIST LEH SAPTUAM DIN chih thupi a ana zat uh tuni tan in BYF Emblem ah kikoih den lai hi.
Local Saptuam, EBCC Delhi ah March 10, 1994 in Pu N. Tuankhankhup te inn ah Kristian Tuailai Pawl (KTP) phuhkhiak in om a, Pu Vungzamuan Valte in Chairman hihna len hi. Tukum a 26vei I zatna ding uh hita hi. Phuhkhiak ahihlai in tuailai milip 84 vel himah le uh Pathian vualzawlna toh kipung tou zel in, tuchia’n Saptuam a min khum tuailai milip 545 bang kiphata hi. KTP/ BYF ana phutkhia heutu masate leh tutan a tuailaite hon makaih heutute ziak in Toupa min I phat hi.
Tukum Covid 19 buaina in hon nawkziak in deih bang in nna kisem theilou hi. Lockdown hong om apan in nek-le-tak zonna hong buai in adiak in Delhi khopi a Tuailai tamtakte’n haksatna kiphukha hi. Saptuam in amaute huhtheihna di lampi ngaihtuah in Relief Committee chih phuh in om hi. Relief Committee toh pangkhawm in Tuailai sum-le-pai ziak a haksatna tuakte hunkhop panpihna kipia hi. Ban ah, haksatna tuamtuam ziak a lungsim leh khalam a thawmhauna nei tuailai bangzahhiam leng Adviser Pastor Thuamminlian toh kithuah in a innmun uah kiveh thei hi. Banah, heutu masate’n muhkholhna saupi toh ana pat uh PROJECT NEHEMIAH ‘XIIna’, Zodawn Siamsin naupangte panpihna di’a project kipan, sutzop touh theih in om a; Budget leng hunkhop kikoih hi. A poimoh leh a hun bang zel a sepkhiak ding a geel ahi. Lockdown ziak a Area Fellowship sawtkuam tak dinkhawl a a omlai in Solkar in SOP guidelines hon piakte zui kawm in mun bangzahhiam ah sutzop nawn hita hi. Banah, Missions-Tuailai 2020 te sai, Short Video competition, drawing/ painting leh Thugelh kidemna ah leng BYF Delhi kitel hi.
Tutung Covid-19 ziak in Saptuam mipite’n haksatna lam tuamtuam ah i tuak uhi. Adiakin Tuailaite lak ah lungsim a damlouhna, thawmhauna leh khalam dangtakna nei hunkhop om ding a gintakna kinei a, huaite lungsim a thei kawm in tutung Ni’ thupi ding in Matthai 11:28 pansan in JEHOVAH RAPHA/DAMNA PATHIAN chih teelkhiak ahi. Taksa lam damna i poimoh zahzah in lungsim damna leng kipoimoh ahi chih tutung i buaina tungtawn un muhtheih hi. Thupi tungtawn in Panel Discussion on Mental Health, Christians and Role of Church: A Biblical Perspective houlimna leng neih kisawm hi. Tulai khovel khangtou kin mahmah lak ah i hamhaih hun tampi om hi. Mi kiang a i genkhiak louh puakgik tampi pua a hinkhua gimtak mai zang Tuailai (nu-le-pa leh naupangte tanpha) tampi om ngei di’n a gintakhuai. Na hinkhua a lamet bei a na kingaihtuah lai in, na puakgik haksa sa a na tawl lai in, i Toupa Jesu’n ah, “Nou semgim leh puakgik paw tengteng aw, Ka kiang ah hong pai un, Keima’n khawlna K’on pe ding” (Matthai 11: 28) ana chi hi. Damna bukim Jesu kiang ah om hi. Simtute tengteng Toupa’n ‘Ni’ I zatna tungtawn in A’ hoihna tamsem hon musak hen. Tuailaite’ Ni zatnuam!
Tuailaite hun leh ni kipahhuai,
Aw tu in tuang i tung nawnta a;
I hun leh nite a beima ngei in,
Toupa nna i sem diing…
