Laisiangthou ah ‘Johan’ min nei, mi tallang mahmah nih om uhi - Baptistpa Johan leh Nungzui Johan.
- Nungzui Johan leh Jesu kikal gen a omna ah, 'Jesu it a ompa (whom Jesus loved)' ci’n kigen hi. Jn 21: 20 & 24 sim mah in.
- 'It a om' thil nuam tak ahi. Zekhemna tel lou itna diak houh, akua-akua (aneu-alian) in I lunggulh ciat leh san theih mahmah ahi. Mi khat in, "Naupang in ahon ngaih keileh, 'nang' na it dek kei (it lou nasa) cihna ahi" ci hi. 'Itna' i cih kampau a gingkhia kia a teh/ sim hi lou, lungsim sunga om hong langkhia, kisukkhakpih mite'n a theihtheih uh khat ahi.
- Johan dang khat (Baptispa Johan) pen tuh khawvel Hondampa, Jesu Khrist hongpai dek adi'a lamlian sialtu, Jawlnei Isai gen banga, "Toupa lampi bawl unla, gamkeu ah i Pathian adi'n lamlian kilualsak un" (50:3) cih tangkoupa ahi. Taksa mahmah in Jesu Khrist ahon kimupihta e! Baptispa Johan kammal khenkhat: En un, Pathian Belamnou khawvel khelhna lamangpa! (1:29), Amah a lian semsem ding a, kei bel ka kiam semsem ding hi (3:30).
- 'Hampha' vacih pah di lah ‘mulou a gingtate a hampha uh’ cih om zel ve'n. Selah. Johan in hiai cilai: Pathian sawl in Pathian thu a gen hi; Ama'n zaw teh chitchiat in Kha a pe ngal kei a. Pa in Tapa a it a, A khut ah bangkim a vek in a peta hi. Kuapeuh Tapa gingta in khantawna hinna a nei; himahleh, Tapa thu manglou in hinna a nei kei ding a, Pathian hehna a tung ah a om zaw hi, A chi a. (3:34-36)
- 'Teh citciat louh a Kha pia' (t.34) cih tawh kisai Sawltak Paul - Khrist Jesu, khialte hondam di'n khawvel ah a hong pai chih tuh a taksanhuai in a laktuak mahmah hi. A lak ua khialpen ka hi (1 Tim 1:15) ci pa - in, Kha thopna mah tawh hibang in na ci hi:
✓Sa lam thilte deih zaw sihna ahi ngal a, Khalam thil deih bel hinna leh khamuanna ahi (Rom 8: 6)
✓Himahleh, Pathian Kha noumau a a om taktak leh, sa a om na hi kei ua, Kha a om na hi zaw uhi. Ahihhang in kuapeuh Khrist Kha neilou zaw Amah a ahi kei (8:9).
✓Pathian Kha pi a om peuhmahte zaw, Pathian tate ahi ngal ua. Lau a om nawn di'n sikha hihna kha na tang uh ahi ngal kei a; ta hihna kha na tang uh ahi zaw. Abba! Pa! chi a, i kikou chiang in, Kha mahmah in, eimah kha tawh, Pathian tate i hi chih hon theisak hi (8: 14-16)
✓Huchimah bang in, Kha in i hatlouhna ah hon huh zel; bangchi'a thum ding ahia chih i thei ngal kei ua; himahleh Kha in mauna gen vuallouh in hon thum sak zel hi.(8: 26)
✓Huchi'n hiai ka chi ahi, Kha ah om un, huan sa utna tuh na hihtangtung kei ding uhi. Sa in Kha dou a ut nak a, Kha in leng sa dou a ut sam nak ahi; thil hih na tupte uh na hih theihlouhna ding un huaite khawng a kikalh uh ahi ngal a (Gal 5: 16, 17).
✓Kha gah ahihleh itna, kipahna, lemna, thuaktheihna, migitna, hoihna, muanhuaina, nunnemna, kidektheihna khawng ahi zaw uh; huchibang kalh lam in dan thu piak himhim a om kei hi. Huan, Khrist Jesu a hitate'n tuh sa, a lunggulhna leh a duhgawlna tawh a kilhdenta uhi. Kha a hing i hih leh kha mah ah i om ding uhi. Kitoutuah chiat a, kihaza chiat in, i kikoih lian kei ding uhi (Gal 5: 22-26).
- 'It a om' khat I hihleh, hon ittu ' Jesu Khrist' leh kisiikna lampi a honpitu 'Kha Siangthou' poimawhna lian/ gol hinah e! 'Baptispa Johan' bel, Kumpi Herod in a gawl a tansak tanpha in amah a Jesu lian hiaihiai (amah pen neu hiaihiai) ahive. Nungzui Johan leuleu ahihleh tancinhoih a' gelh tawpna lam ah amah min dawk nawnlou zah dong in, neu in, amah ah Jesu lian tialtial hi (21: 20, 24). Maizen. I hinna ah/ uah Jesu lianpen gige leh a nuam awm!
- "(Jesu) it a om ka hi/ Jesu ka it" na ci hia, unau. Na cih leh ahoih e. TOUPA’N thupina tang hen! Ahia, nang lian maw, Amah cih kidothuaipi ahi. “Tu/ tuni” I cih theih lai teng bel sadan & Khadan kisualna khawvel a hing, na hinna-a a vualzou zaw penpen ‘nang a’ gahkhia hisek dan eive. Jesu Khrist' it a om mite hin di bang a hing hi'n na kithei hiam, sanggam?
Kha ah om un, huan sa utna tuh na hihtangtung kei ding uhi. TOUPA'N, A' Thu pansan a saulou i houlimna sathau hong nilhsakta hen!
https://youtu.be/uwIyJ_kp-aA
NOTE: Media Team i/c (Upa Chinsum) in hun paisa in DEW/ Gamchiam ah thugelh ana koih zeuhzeuhta. Tuate laka a koih nanungpen simtheihna link: https://blog.ebccdelhi.org/joseph-kiang-ah-toupa-a-om/
