IHMUT: Mihingte a ding in a hun hun a hoih taka ihmut tuh damtheihna ahi. Damtheihna tuh hauhsakna ahi nawn. Ihmut ding zah i ihmut khaklouh chiang in luna bang, om nuam lou, ankam lim lou leh a dang dang damtheihna su poithei hi. Kum tawm leh tam dung zui in ihmut i poimoh zah kibang lou hi. Naungekte dakkal tampi ihmut a poimoh lai un pichingte bel dak kal giat khong hun lel uhi. Himahleh mi a hong upat chiang in sawt deuh ihmut, dakkal tamzaw deuh hong poimoh nawn hi. Damlou leng hoih tak a hong ihmut theih chiang un a tawl uh dam hi. Chidam, na gimtak a sem, hoih tak a ihmu theite bel a zingchiang in tha ngeipu in hattak in nasem zou nawn zel mai uhi. Mun khat peuh ah ihmut theih himahleh lupna tung hilou khawng leh ihmut hun hilou a ihmu khate bel lusu kichi hi. Lusuk khak chih zong a poina tam mahmah hi. Abraham a lusuk khakman in a suante migam ah kum zali val bang saltan loh uhi. Paul thugen lai a mi khat a lusuk khak man in tohlet a kia in si hi. A hun lou leh a kilawm het louh na mun a lusuk khak tuh zahlak huai, vang kiamna, mite muh neuna tanpha tun theihna himok ahihman in kidop tuak lua, kikep luat ding hi.
KHANLOH HUN: Nitak lup hun, ihmut hun ahihmah bang in, jing khua hong vak a, ni a hong suah chiang in khanloh hun hong hinawn hi. Tulai in khopi khong ah sun leh zan nasep khol hun kibang lou, ihmut hun, annek hun kibang lou tam hi. Leitung kho hun, jing leh nitak, sun leh zan, kholum khovot, nipi phalbi chihte a gam a tuam ding zui bang, leitung kihei pen in ni a doh khak dan ahong kilamdan man in lang khat lamte sun pen lang khat lamte a ding in zan na hi zel hi. Tuate ziak a buailou in KHANLOH HUN mah a khanglou ding Laisiangthou in hon deih hi. Khanloh hun a i khanloh khak kei leh bel “Khangma” chihna hi. I khangmat khak chiang in hun kinung delh a poimoh loupi in nakpitakin kibuai mah mah hi. I buailuat chiang in kihehbaih a kilem louhna nengneng hong tung nuam mahmah hi. Khanloh hun a i khanloh a sep ding om bang bang muang tak leh kinoh hehu lou a i sep chiang in i thadam, i lungsim leh ngaihtuahna zong tawldam, midangte toh kal zong chidam kuamah toh kihehsuah chih bang omlou zaw deuh hi. Tua i gen tengteng salam toh kisai deuh ngen ahi, khalam a khanlohna lou toh Pathian kiang kitung theilou ding ahihman in poimoh petmah hi.
MIAL NUAI A THIL HIHTE PAIHKHIAK HUN HITA: Hun omdan theih leh huai toh kituak a gamtat tuh lohchinna ahi. Pathian deih louh nasep, thugen ,kampau leh om dante teng teng paihkhiak hun hita ahi. Sawltak Paul in Rome khua a saptuamte a laikhak ah hichi’n na gen hi. Huan, hiai hih un, a hunte theisiam unla, ihmutna akipan khanloh hun mahmah ta ahihdan thei un. I gintak tunglai sang un i hotdamna lah a nai zaw ta ngal a. Zan a bei dekdek ta a, sun a hong hipahta ding, Huaiziak in mialnuai a thil hihte paikhia ni in, vak galthuam in kithuam zaw ta ni. Mialnuai a thilhih paih khiak ding a sinsak leh hilh a i omte uh.
ZUDAWN BUAI LEH ZUKHAM A OMNA: Hiai bang ching miten bel Pathian launa leh a deihdan bang ahia chi a ngaihtuah khalou. Melmapa setan kol a tang, zahmoh thu ginalou gen leng poisa lou, mi toh kinak kisel poisa lou, mihinpihte nangawn itlou chih na ahi. Hichibang thilte tawpsan ta un, huaite ah bualnawn kei un, ahun toh kituak in gamta unla, tangtawn thilte kia lamen in Pathian khut muanhuai len zaw un. Zudawn na mun ah nopna leh kipahna sang in kinakna leh buaina tamzaw hi. Kisiatna, kinakna, kilemlouhnate i pumpelh theihna ding in zudawn buai leh zukham a omlouh ding chih ahi. Khovel et a kilawmna leh noptuak chihten kilawm lohna leh noplouhna tun zaw uhi.
THANGHUAI TAKA GAMTA LOU IN: Numei pasal kal a thangtatna, hiai tuh Pathian in a huat mahmahte lak a khat ahi. Huaiziak in khopi minthang, neih leh lam, nek leh dawn a kitoudelh Sodom leh Gomora mulkim hetlou in Pathian in mei leh kat in na hal tum hi. Tuni tanpha in leng hiai khopite hong ding suah nawnta chi a muh ding omlou in koih den ta hi. Inkuan leng Pathian hon siam sak ahihman in ama deihdan toh i kituah kei leh bel ding suah zou nawnlou ding a hon bawl thei ahi.
Toupa Jesu Khrist in kithuam zaw unla, sa utna hoih loute semsuah ding lemtanna kibawl kei un. Hiai tuh tuni hun a dia i thukhupna leh zohna hong hita henla ihmu khanloh hun in khanglou chiat ta ni.
