Nitak a (TOUPA houpihna) message mulou, tuzing thoh nung in hiai teng message lungsim a hong lut bangbang ka hon gelh nilouh leh hong zekai sim, hon thon khia zok theilou ka hi. Na hinkhua kivel detdet kawm in na sim lechin TOUPA ompihna na tanlam phawkkhia mahmah ding na hi.
Hiai khovel i khualzinna uah khatveivei thawmhau leh tawltak a i om hun uh om chiat ding in ka gingta. TOUPA ompihna leh huhna i nget hang TOUPA’N thawm neilou in dai vengveng sek hi.
Khat veivei lah Emau lampi a paite banga TOUPA toh tonkhawm khawm hinapi in i meltheih hetlouh hun uh zong tam mahmah ding in ka gingta.
Hun khat bangtanhiam TOUPA’N na kianga hon ompih hi a na theihtheih dan om napi chau leh bahtak a na omlai tak a TOUPA thawm om nawn lou na saklai tak khawng nang thawm nei zoulou nawnlou in TOUPA’ thawm pen nang aa sa nilouh na hi maithei.
Mi khat leng sehnel tunga gim leh tawl taka a pai lai in awl a anunglam a hon et kikleh a paina ah amah’ khekhap kia hilou in amah toh ton a pai gige khekhap dang khat mu hi. “Aw haw, kei kia di ka kisakleh TOUPA’N lamtawn a hon tonpih eive,” chi in khamuang mahmah hi.
Hun bangtan hian hong pai zel zoh in bah kisa mahmah mai a a nunglam hon etkik nawn leh minih khekhap omlou in mikhat khekhap kia mu in heh mahmah in TOUPA kiang complain hon bawl hi.
“TOUPA aw ka khualzin na ah kei kia hilou in n’on ompih chih ka thei. Himahleh gim leh bah taka ka om hun a bang di’a hon nusia na hiam?” a chihleh TOUPA’N hiai bang in dawng hi:
“Ka ta aw nunglam na et masak lai a mi nih khekhap na muhte kha i nih a i khekhap ahi. Bah mahmah a na om lai a nunglam en a khekhap khat chauh na muh kha, nang khekhap hilou in Kei khekhap ahi. Na bah mahmah a pai zou ding in tha na neihlouh ziakin K’on pua a lei sik kha nawnlou na hi” chi.
Khatvei vei lah TOUPA thawm dai vengveng chi a thawmhau taka i om lai in, Ama’n i malam ah mun khat hun haksa zaw i tuah ding thei in tua mun ah hon na ngak ahizaw.
Natna thuaklou ding a na thum lai in TOUPA’N Amah thupina tamsem na hinkhua a hong kilat theihna ding in Damdoi-inn ah hon na ngaak ahizaw.
Sadrak, Mesak leh Abednego te leng meipi sa mahmah amau mihinna in a thuak zohlouhna ding mun ah a na ngaak a, tua mun ah meipi sa mahmah leh zong TOUPA toh a om khawm chiang un meipisa in omzia nei vetlou hi.
Danial leng sahangte mai a pang zoulou ding ahi chih thei in tua sahang kulh sungah na ngaak khinkhian hi.
Abrahamte pata leng maw Moriah tang zuana apai lai ua, nang bang a lungkham lua teisam uh ahi. Chiamnuih gena nuinui lou hial ding uh ahi. Lam tawn in Abraham lah a tapa si ding hita chih ngaihtuah in khitui luang mahmah ding hi. A tapa in lah tutung ka pa’n belamnou keng hetlou mawk, koi a laksawm ei de aw chih a lungsim in ngaihtuahtuah ding hi. Pathian in lah Moriah tang tung ah na ngaak khinkhian maimah.
Lazar ahihleh a malam a na ngaaklou in ni li a liam nung in hankhuk tan ah nung delh kik thouthou hi. Unau, a kul ahihleh nang a ding in TOUPA’N ni leh kha zong vanlai zawl ah khawlsak ding hi. Tu eilawi hun in zong hankhuk tan a leng a delh kik mi omtham uh ahi.
Nang a ding a hoihzaw TOUPA’N thei ahihman in nang adi’a ni leh kha khawlsak a kul keileh zong, Cross lek a khaikang a ompa bang in paradise ah hon na ngaak ding hi.
I hinkhua uah khatveivei TOUPA toh ton hun om a, khatvei lah TOUPA’N hon taisanta i saklai in a haksa zaw sem mun ah hon hondam ding in hon na ngaak hi. Ahihkeileh TOUPA’N hon khonung delh hiam, hon makhelh hiam in han khuksung tan dong ah hong delh lai ding hi. A hang maw Ama’n hon itlua mahmah ana hi. TOUPA’N thugelh tungtawn in A’ aw khum hon zasakta hen!
