"Na sapum khawnvak tuh na mit ahi; na mit a chim leh na sapum leng a vek in a vak suak nak hi; a chim keileh bel na sapum leng a mial vek nak hi. Huchi'n, na sung a vak om tuh mial a na hi kha ding e pilvang in (Luka 11:34-35).
Innkuan sung kituak thei lou, nupa kal kituak thei lou, khawtang kituak thei lou, committee sung kituak thei lou, i mihinpihte toh kituak thei lou, pangkhawm thei lou, ei ngaihdan/ deihdan toh kituak a paikha lou peuhmahte lah mi gilou, mi hoihlou, a diklou a koih vek, moh hisak vek mai... Ei kia dik kisa gige mai... Khristian gingtu piangthak ka hi lah kichi vek...
Piangthak ngen kituak lou, piangthak diktatlou ngen, sepna peuh a poisak nei lou a khosa ngen. Piangthak, setan deihdan zui a pai. Piangthak, hinkhua a lahkhiak ding bangmah nei lou. Tua bang gingtu Khristian hinkhua a i na omkhak theihna pen uh zaw khalam mitmial, khalam mittaw, sa mit kia vak, salam mit a hak, sa deihdan lampi zui a paipailai i na hih zawk khak ziak ua, tua bang hinkhua a hing kihi zaw hi. Romte 8:5 in, "Sa daan a omte'n salam thilte a lunggulh nak uh; Kha daan a omte'n bel Khalam thilte a lunggulh nak uhi," a chi hi.
Mitmial nih tuh kipel thei lou ua, kiphukha buk sek uhi. Himahleh, a mit vakzaw khat a na omleh tuh mitmial pen in a phutkhak dekleh a mitvak pen a na kihem a, kiphukha ngei lou uhi. Mi mitvak in tuh en kelkul kawm a mei-am a sat ding thei a hih man in a khe in sik ngei lou hi. Himahleh, mitmial khat in tuh mei-am a sat ding lam thei mahleh mu lou a hih ziak in sikkha hi.
Unau, gingtu hinkhua zong tua mah bang ahi. Khalam mittaw/ mitmial tuaktuak mi nih kituak thei lou in kinana mahle uh khalam mitvak khat leh khalam mitmial khat kituak lou, kinana chihte om thei taktak lou hi. Himahleh, khalam mitmialte'n bel mu lou a hih man un mi hoihlou, a gilou a chih teng mah uh toh a mit vakzaw sam a om louh ziak un, kinana mai ua, kuamah toh kituak thei lou uhi. Khalam mitmialte'n khelhna, setan deihdante pen muchian lou a hih ziak un, khalam mitvakte'n setan deihdan lampi ahi chi ua a zuih nop louh teng uh, a sep ut louhte uh, amau bel dik/ siangthoudan in thei ua, semsem thei uhi.
Theihchetna khat a neih uh om pawl om mahleh huaite leng genlem in, kithei lousak in gamtang teitei mai uhi. Huaiziak in, gingtu hinkhua ah khalam mit a vak ngai a, i lamhaih louhna ding in i khalam mit chiimtak toh i paina ding lampi et ngai hi.
Na khalam mit vakleh bel mi hoihlou, a ginalou mi khat pen a lungtang thununtu, a nung a setan pen mu ding chin a, huai setan pen mudah ding chin a, a mihing sapum pen it ding hi zaw teh.
A sapum na itleh na kianga kipan a setan in a pimang ding phal lou ding chin a, a mihing pen mudah ngei lou ding hizaw na hi. Na khalam mit a vakleh migilou khat pen a lungtang thununtu setan muchian ding chin a, a kampau sia, a gamtat hoihlouhna pen a gamtangsakpa setan na muh ziak a a gitlouhna pen gilou mah a thukkik lou ding chin a, setan kipahna ding na bawl nop louh ziak a nang kidek ding chin a, kina lou ding hi zaw uteh. Na khalam mit a vakleh na lungtang apan khelhna hong suakte, ngaihtuahna gilou hong suakte, gahkhe lou a that pahpah ding chin a, setan deihdan a khelhna gahkhesak nawn lou ding hi zaw teh.
HUAIZIAK IN, I GINGTU HINKHUA UH A DIK THEIH LOUHNA ZIAK UH ZAW I KHALAM MIT UH A MIAL ZIAK A NA HI ZAW HI!
…
NOTE: Thugelh hon petu, Pa Ginkhanmuan, 2002 kum in pawlpi ZRO/ ZRA ah na lut a, 2004 in ji nei hi. Vualzawlna tanu 4 piak in om uh. Pawlpi a seem toutou lai hong piangthak a, huai in a hinkhua kheng hi. Tutung minam pawlpi nih a hongphak leh ama’n, a seppih a lawmte’ khalam dinmun it leh vei ahihman in, gup ding hiam paih ding hiam nei theilou a kithei in, a vek ua a it ziak in kua pawl mah zomlou in Pawlpi ana khawlsan phot hi (Sam 34:14, Matt. 5:9). Tu in, Jesu hon itna thu gen in innkuan chialpi khawng bawl in hinkhua zangtou lellel. TOUPA’N thugelh manpha leh gahsuah seem in hon zatsak hen aw!
