Htp Upa M Darneingam Tawh Houlimna

Thumapi: EBCC Complex Dedication & Ground Breaking Program, Bhalswa (Burari’ kiang, Delhi) ah Aug. 28, 2021 @ 2:00 PM in neih ana hita hi. Ebenezer! Hunzek zatna et/ ngaih theihna link: https://www.youtube.com/watch?v=zx4fJPxKo40.  Hiai ni Laipi piakkhiakna (Documents Handover) hun zang leh a zing Aug 29, 2021 @2:00PM a Thutak ankuang luina hun zang Upa M Darneingam, Chairman P&FSC, EBC HQ leh DEW/ Gamchiam saite houlimna, a nuai ah aw. TOUPA thupha!

1. Heutute, tutung Delhi n'ong zinsan uh - EBCC Complex Dedication & Ground Breaking Program - zou hita mai maw. TOUPA hoih hi. Hunzek 03 zat a omte etkik in bang ci na sa uh? Joint Building Committee tawh kisaina, vaisaina ah bang khawng in hon kipaksak a.

DAWNNA: Hunzek 3 te I etkik chiang in Toupa’n hoihna leh ompihna tang I hi I chi llou thei kei hi. Ei bawlsa program dan tangtung leh chih tuh, mihing ngaihtuah leh deihpen ahi. Himahleh Pathian in ahun, ani leh bangkim neitu Amah banah Amah lou-a bangmah hihthei ahihloudan honsinsak hi in ka thei.

Joint Building Committee te fel ka sak banah mahni naa poimawhte taisan a Pathian naa a masapen a koih a, a kipumpiaknate uh thupi ka sa.

2. Tutung Delhi vai adi'a nana kithawina uh hun sawt kuam paita akipan ahi ngei di. Tua sung in Khalam-salam ah muh thak, theih thak (TOUPA hon houpihna) cih bang om hiam.. omleh hon-gen in.

DAWNNA: India Capital ban a Hindu kulmutte munpi chihtheih mun a Pathian biakna di mun kilawm leh thawveng Pathian in ahonpiak thupi ka sa. Amah I lungkimsak leh thilteng hih thei vek ahi chih  ka muchian seemesem. Hiai program adi I thumnate ataka hon tangtunsak Toupa I phat lou theikei hi. Kei mimal toh kisai ah C.K Khai lagelh, “Maipha” kei hinkhuah ah tangtung hih in ka thei.

3. Nipini (29 Aug), 2:00 PM - Na thugen un honchawm in saptuamte tha guan hi. DEW/ GC simtute theih di'n tua ni a na thugen tomkim hia'h n'on taklang thak thei dia'm?

DAWNNA: Kumpi David in Pathian Biakin bawl ut law mahmah, himahleh Pathian in amah bawl di lem salou. E’n baihlam taka Biakin bawl thei di dinmun a om chih tuh hampha lua I hi. Biakin bawltheihna hamphatna, hamphatpihlou ah I om khak di lauhuai ka sa. I hamphatpih theihna tuh thumna, I tha, I sum leh adangdang hithei ahi chih manghilh kei ni [Sermon ngaihtheihna link: https://www.youtube.com/watch?v=b2YH9MrvS5Q&t=0s].   

4. EBC Pawlpi ah 'Khawpi saptuam' bangzah a dingta ngut? Tuate lak ah mun-le-mual tawh khawsa, koi tualsung saptuamte bang ahi ua? (Ground breaking bawl ni omtheih leh, WC). Maban ah ngim simsim, pipeline a om om hiam?

DAWNNA: North East bial simlouh in Khopi Saptuam 7 om ahi. Amaute: Delhi ah  1 + 1 (hita di), Bengaluru, Kolkatta, Chandigarh, Mumbai, Chennai ahi. Tua te laka mun-le-mual neihna mun Bengaluru leh Delhi ah ahi. Tu-le-tu ah pipeline ah hiai a om chih chet di omlou.

5. Mun-le-mual neihna di'n, adeuh khol in khawpi ah, sai di neneuh om. Lungkiakhuai a.k.l. kisikhuai phut khak hun leh mun bang om hiam? Omleh tuate bangci'n na pal mualsuah zel ua - Experience sharing, nou heutute apan zak nophuai e.

DAWNNA: Tunitan in lungkiak-huai/ kisiik-huai chih di om hi’n ka theikei. Ei, EBC pawlpite hamphatna mahmah khat hia ka muh, Khopi saptuam a om India kumpi nasem heutu muanhuai leh officer bangzahhiam omte Pathian limsak banah saptuam ah hihna nei ana hi tangpi uhi. Banghiam thil sai di te baihlam taka, amaute tawna saifel pahpah in a om a; buaina tuahtheihte, amau zar a tuaklou a lamzang sek hihang. Tutan in, Khopi saptuam ah mun-le-mual thu a om chiang in study theih tan study bawl masak, tua nunga leikhiak ahia, buaina ahihkeileh lungkiak-huai chih di om in ka thei kei. Thumna tampi leh ngaihtuahna tampi toh kal I suan zel leh mavang zel ding I hi chih kei mimal muhdan ahi.

6. Jesu Khrist Suangpi tunga lamtouh tualsung saptuamte, betu saptuam apan theihpihtu saptuam (from worshipping church to witnessing church) hi di'a lamet I hi. Tua dana et in EBC tualsung saptuam te na muhdan tangpi banga? Heutute'n mipite bangci paipih le'ng hoih banah a hing saptuam hi seem di I hi ua le?

DAWNNA:  Saptuam hing I chih tuh Khrist suangpi  tunga kilam saptuam ahi. Thudang  tampi leh ngaihdan tampi genlou in ei EBC te I dinsan uh, I tuppi pen leh koilam nawt a pai sawm I hia chih te mangngilh kei leng.

• Vision Statement: Pathian Biakna leh A Thupiak zuihna tungtawn a Amah thupina piak ding. Evangelical Baptist Convention in Khrist batna leh A Thupiak Thupi zuihna a kilangkhia, Pathian bekhawm pawlpi hih ding a mengmuhna ahi.
• Mission Statement: Gingtute kithuahkhawm a, Khrist itna sung a khat-le-khat kilamtou ding, Tanchin Hoih gen a, mihinpihte tung a nna hoih sem ding. Evangelical Baptist Convention in Tualsung Saptuamte Biakna leh Nasepna a piching a hih theihna ding leh leitung a nasep ding Pathian in A piak Missions, Evangelism, leh Nna hoih sem ding a thopna leh kithuahpihna piak a tup ahi.
• Ngaih Poimoh Pen (Core Value): Kha mangthangte Khrist khebul a pi Saptuam nasep ding pipen ahi. Evangelical Baptist Convention in mihinpihte tung a nnahoih sep, genthei tagahte panpih, a poimoh bang a neih leh lam kaihkhop a lunglut a, himahleh, khamangthang matna leh mission sang a sep ding poimoh zaw a om kei chih a gingta (conviction) hi.

Local saptuam I omnate uh atangpi et in a hoih uh. Hoih bukim chih bel huihkhua a laaktouh I hih chiang a ompan di ahi. Local saptuam hatna hi atangpi in Saptuam sunga om Committee-te ah kinga ahih ziakin, makai heutu kichiten Saptuam CORE value mah taisanlou in, Saptuam Vision Statement mah ngim gige in, “Saptuam milip missionary I hi” chih theisak zel in ei mahmah in leng theihchian le’ng a hing saptuam I hi semsem ding hi.

Ka Laisiangthou deih:  Toupa na Pathian tuh na lungtang tengteng in, na kha tengteng in, na lungsim tengteng in na it ding ahi. Nou n’on it uleh, ka thupiakte na zui ding uhi (Matt 22:37, John 14:15). Ka la deih : PNL 403 – “Jesu neih hinna nuam”.

7. Heutute lak ah senior lawitak na hita hi. Sepna/ dinmun tuamtuam lette leh innkuan khawsa na paipih dan (work-life balance) saulou n'on gen thei dia'm?

DAWNNA: Sikhate aw, Khrist thumang bang in laudansiam leh lingkawm in lungtang khat in sa dan a na pute uh thumang un: Mihing hih kipakte maimah bang a mitmei kia venglou in, Khrist sikha bang a lungtang a Pathian deihlam hihzaw in (Eph. 6:5-6).

Leitung khosakna ah buai louh hun omlou, hun piak haksa, sum-le-pai kidaih chih omlou, leh adg. dg. gen di bei lou. Himahleh, I lungtang in a tup/ ngap leh hithei vek ahi. Pathian in A Tapa tang neihsun itlou a kei ahonpiak leh ke’n bang di’a bangkim pelou di? Nekzonna a I neih I sepnate Amah honpiak ahia, huaiziakin bangkim Amah amasapen leh Amah khut a bangkim I ngak chianga work-life balance zaw hong ommai ahi. Tutan TOUPA’N honpi…