1. Heutupa, EBCC Delhi pastor len khate laka gamla tungpen na hi. 2010 kum, Delhi na pawtsan nung na kihekzia, USA na lut khakdan tel in, tomkim n'on gen thei dia'm?
DAWNNA: Amasa in EBCC,Delhi a ka hiang poimawh mahmah Media Team te’n hiai bang houlim theihna hun n’on bawl ua, n’on phawk khak uh hampha kisa in ka kipak hi. January 14, 2010 a Delhi nusia a tua ka sinna mun a pai ka hi ua, Pathian thupha tawh tutan sinna zomtou tou lai chihding ka hi. Master of Arts in Marriage and Family Counseling (MAMFC) a pan in, tua ka zawh chiang in Ph. D in Biblical Counseling ka sun zom a, tu in a final stage ah Dissertation ka gelh lel hi.
US tun khak dan pen tuni tan a lamdang ka sak khat ahi den lai. Tomkim a gen in Pathian in lamdang tak in unaunu Loisy Tonsing tawh hon kimutuah sak a, ama’ panlakpihna in Ravi (RZIM) tawh kithuzak kha thei nawn. Pathian in le hon lemsakpih ahi ding ka chi ua, ministry tawh kisai a maban sin ut sin theihna ding kong Pathian in abanban in hon honsak mawk hi. Ravi tawh ka kituah khak chiang un, amahmah in tua ka kaina Southwestern Baptist Theological Seminary, Fort Worth, Texas (huailai a) a President kiang ah mimaltak in honna gensak (recommend) a, huchi’n President tawh tangtak a kithuzak in admission ka ngah uhi. Hiai ka sinna uh tawh kisai, Pathian hon pina anen-aham a gelh ding ka sawm hi- tunung hunlem khat ah.
2. USA lut, Bible sin a va-om thu baihlou ahihlai in, kum 10 bang America a om/ khawsa hita mawk! Tua dana om touh di na ngimdan mah uhia? Ahihleh, Pasian min phat in om hen! Ahihkeileh lah TOUPA' hon pidan/ khawtuahdan hon-gen mah...
DAWNNA: US a maban sin ding a ka kuan san uh bel MAMFC ahi. Ka kuan tung ua bel tutan tan om di’a kingaihtuah lou, banah sawm le sawmlou ka hi uh. Seminary in sin theihna ding Presidential scholarship ka nih un (nupa a) a hon pia uhi. Huchiin ke’n pan masa in, ka zi in a kum nawn in hon zil pan hi - amah sin pen Master of Arts in Christian Education (MACE) ahi. Ke’n master ka zawh hun a ka ji Ching in zou nailou. Huchi ahih thouthou leh angaakna kawma ThM in Pastoral Ministry (kum 2 a zawh ding) zop ding ka sawm chi’a lem theilou…. a school tuam ahihman a a requirement tuam ana hi. Ka professor te’n PhD in Biblical Counseling adi’a qualify na hi…huai apply in honchih chiang ua huai apply in huchi’a PhD sin kha suak. Pathian in poimawh sakna nei ahi di chih ka gintakdan ahi. A tum hilou, hilele hamphatna va tangkha chih di ahi di.
3. EBCC Delhi pawlpi kep khak sunga kipahna, hon kipaksak, lungsim a thaam om di e. Om leh hon-gen mah? "Ka sep sawm hiai.... hihkhe manlou" cih omleh, tua le aw.
DAWNNA: EBCC, Delhi a saptuam kem a sepkhak sung (2006-2010) in mangngilh louh ding thil tampi Pathian in hon tuaksak a, hampha ka kisa uhi. Hon kipaksak leh tha hon guan mahmah tampite lak a khat ahihleh, a chingpen leh siampen hi hetlou, taksa lam a le upa huntawk nailou hial (seppih Upa khenkhatte ading bang a a’ tate vual kihi di) himah le’ng saptuam makaite hi’n mipi hileh deihsakna leh itna tawh n’on kithuahpihna uh manpha kasa lua hi. Pastor khat hihna ziak a mipite apan hichizah itna leh deihsakna ka tan uh tuni tan a tha honpia khat ahi. “Kipahna kim zaw Toupa nasep ahi” chih ana hi-ngei mah e, chih thakthak in om.
Poimawh kasak leh tuni tan a poimawh kasak lai, gen leng ka gen khak zel khat ahihleh, Delhi phualpi a kumpi nasemte, siamsin naupangte, inn nupite kuapeuh, Delhi a I om sung Jesu Khrist sik-le-taang/ palai (ambassador) I hi chih kitheihtelna tawh hunzat ding ahi. Ei om napi a Pathian in missionary dang hon sawl di’a ngaihtuah lou in, ei mahmah missionary I hi chih kitheih ding deihhuai kasa. Missionary I hih theihna, ahihkeileh, Vaite/Hindu te lak a Jesu Khrist’ vaak I taansak theihna hunlem tamlua. Pathian in Joseph ziak in a heutupa Potifar innsung a vualzawl chih Bible a I sim bang in, I innluahnate, I siamsinpihte, office a I seppihte - eite tungtawn in Pathian in vualzawl leh uthuai hina tel e!
Anihna ah, khawpi a khawsakna ah ‘innkuan kikepna’ a poimawhna uang seem hi. I saptuam in family equipping lam ki-uangbawl zoulou deuh abang ka sa a, Khristian innkuan bawlna leh tundingna nasep, a sep ding dan, innkuan sung chiat a nu-le-pate spiritual leader hihna lam a thopna piak chihte awlmawhhuai hi’n ka thei.
4. Delhi khawng, formally or informally, urban ministry i neihna mun ahi. Texas (USA) lamte paipih strategy for urban missions, Delhi lamte etton theih leh etton di'a hoih nasak om di e... personal evangelism lam la, a pibawl thou uhia?
DAWNNA: Texas state ahihleh, akigendan in Bible belt achih un a uapkhak state khat ahi. Hiai state ah 90% bang Christian kichi uhi. Tua lak ah 64% di khawng Protestant evangelicals dan a chiamteh ahi. Roman Catholic le tam mahmah. Atangpi a gen in, eilam tawh teh in mission nasepna/evangelism I chih lunglut mahmah uhi. A sepna mun uah, a innvengte lak uah, a siamsinna munte uah, amau circle sung chiat a ahihtheih bangbang ua theihpihna nna seem uh ahi. Witnessing bawltheihna ding hunlem zong uh. Men’s Bible study/Women’s Bible study group tuamtuam a hahbawl ua, huan, abiik a siamna neite amau area of expertise tawh kituak a zatdan a siam uh. Kou membership lakna biak inn a Men’s Ministry bang ah a kallak teng in Men’s barbecue/steak night chihdan prog bawl un, tua hun a tel di’n Khristian hinailou a theihte uh/a lawmte uh/seppihte khawng chial in, Pastor hiam thugen siam khat thugen in a zang ua, lawhching thei mahmah. Siamsinte hi’n gingtu mimal hileh hunlem kibawl a, kuamah sawl hiam, sum piak ngailou a evangelism hih uh ahi a, etton taak mahmah uh ahi.
5. South East Asia gam a Khristian kibehlap kindan leh European/ North America lam kiamdan kigen sek tawh kisai na muhdan, leh (India) mission agency te'n thei le uh cih sim bang om hia...
DAWNNA: Hiailam thu a tuamdeuh a study ka na bawl khollouh ziak in ka thei saukei. Ahi a, India gamsung a tanchinhoih genna tawh kisai tutan ah saptuam tuamtuam hi’n mission agency tuamtuam hileh, mizawng leh namniamte lak kingim masa deuh ahi. Huaile tutan tan ah hoih. Huchih kawmkawm in caste system in daai akaihkhum Indian society gospel tawh I phutvang theihna ding in tuh mi laisiam leh a namsang lamte I engage ngai hi’n ka thei. Nam niam (lower caste) lamte’n a namsang lamte lawhzou or impact zou ngeilou di bang ahi. Huaiziakin, a namsang leh a laisiam lamte engage thei di mi laisiamte kipan le, a niamlamte luhsuah bel haksa lou di chih chu ka gintak vedan ahi.
6. EBC Saptuam in thupiak gol (Matt 28:18-20) sepkhiakna a pan samna a neih tawh kisai na muhdan tangpi - Hoihsak & kipahpih, banah hici zaw-lai leh kigahsuah seem thei di hivaw na cih. Omleh.
DAWNNA: EBC saptuam in “Thupiak Gol” (The Great Commission) sepsuahna ah tuni tan hihtheih tawk in I na pang ua, kipah huai lua ahi. Tulai in hiai missionary nasepna leh I gam a social issue tuamtuamte hong kimeekmat sim a bang a, huai pen lauhuai ahi. Missionary nasepna gah in I social issue-te hon hetkha ding (effect) ahi a, akibangdan a ngaih ding bel hilou hi’n ka thei. Liberal leh protestant evangelical te kibatlouhna hiai issue bang le ahi. A kipahhuai mahmah khat ahihleh Karbi Anglong Field bang amau kitoudelh thei di’a pichingta. Thupi lua. A field a I sawlkhiakte tawh kisai bel “phathuai lua uh ahi” chih louh genbeh ding tam ka theikei…
Ahi a, kei etna dan a awlmawhhuai kasak khenkhat: India gamsung leh pua a missionary nasem di’a I sawlkhiakte uh kia missionary dan a koih law zawzen in, ei a sawlkhete/innmun a omte missionary lungsim pu zoulou dekdek I hi de aw? Mission Field apan khawnga nasep gah report hong om zel, ei’ inn mun a tua dan report ding tamlou/omlou adia’m? Ei inn mun a le khamangthang omlou hituan samlou a. I gam, adiak in Lamka bang en le… Biakinnte pungpung, ahihhanga a betu taktak punglou khat I dia’m? Bangziak pentak a tangthupha in I hinna/innkuan/ khawtang khek lou ahi di?
Kumpipa David in Pathian temple lam ding a lunggulh a, himahleh tualthat/sisan suahmi ahihziak in Pathian in Temple lamtu ding in A deih kei a, a tapa Solomon in honlam hi. A Biakna inn ding a lamtu ding lel le Pathian deihteel mahmah… tuni a Biakinn a Pathian bia tampite ah Pathian akipak in a lungtung taktak na dia’m? Aguuk a khelhna I bawl tuamtuamte taisan loupi a Biakna Pathian adi’n a pomtaak mah dia’m? Kisiik a kiheina (repentance) telloupi a Biakna a namtui dia’m? A temple lamtu ding lel tawh kisai a Pathian huchi zahta a A ngenteel leh a sung a betu di te tawh kisai in “Toupa Toupa “ achi na peuhte tung ah akipak mah dia’m? Sermon suak dek. Sorry!!!!
7. Covid-19 hiipi len ma leh len nung America bouruak le a kidang zou sam di maw. Hiipi douna & hiipi apan kivenna di'a pan a laakdan uh ei lamte theih di'a hoih pipi om di e. Om leh, hon-gen mah...
DAWNNA: Covid-19 hiipi in US bangle naak nuai mahmah inchin, tulel a a thuak tam pen gam ahi kha ding in ka ging. India khawng tawh teh a a gam vaihawmte ading a buaihuai mahmah ding a ka theih bel mimal malte’n amau zalenna (right to freedom) conscious law mahmah unchin, kuamah force theih di hilou ahi. A langkhat a a ettonhuai mahmah bel- a natna vei di’a akigintak uleh bel amau-le-amau kituam koih uh, amau inn a kikhum geih mai uh (self-quarantined). Eilam dan a khawtang kipawlkhawmna pawlpite panlakna ding omlou, kia phetlou khawtang pawlpi le om lou! Etton louhna di le om in, ettonna di’a hoih le om veve ahipen.
8. Covid-19 leh Bible Thu ana entuah law di hicin a; muhthak-theihthak, Toupa' houpihna na don om di e. Om leh, n'on gen dia'm?
DAWNNA: Covid-19 tawh kisai bel gendan tuamtuam tampi petmah om eimah ve. I Bible, adiak in Thukhun Lui hun lai in leng Israel te lak ah hiipi a gawtna bang ana omtham a, huan, Aiguptate lak a gawtna chi 10te lak ah le khat ahi. Tuabang hun chiang inle a kikep dingdante uh Pathian mah in ana hilh a, quarantine chih thumal ana kizang kei mahleh ana hihthou uh abang. Hiai Covid-19 ngei le Pathian hon gawtna ahidia’m chih tawh kisai bang le gen-le-sak omtham. Ke’n bel athukzaw a ana suut tuanlou ka hi a, Pathian hon gawtna hi thei, hilou thei.
A hon theihsak mahmah hia ka theih khenkhat: Khatna ah, Biakna leh Phatna taktak bang hi hiam chih honlak hi’n ka thei. Biakna leh Phatna tatak pen I niteng lifestyle ding ana hizaw a, paikhawm a biakna (corporate worship) pen akiu khat (just a part of it) hizaw. Nihna ah, hiai leitung I tenna mun pen hamse thuak leitung hi a, I tangtawn mun hi nailou, I munkip hi nailou ahihna hon telsak. Zin leh leeng I hihna leitung ahi chih hon theisak. Thumna ah, mihingte hinna dengdel mahmah ahihna honglang. Banah, a zawng leh ahau I kibatna honglang mahmah in ka thei… kilauthawng chiat. Lina ah, innkuan poimawhna hong kilang mahmah. Ngana ah, leitung hinkhua ah anuam lua hiam abaihlam lua ana omlou hitah e chih hon theisak. A kivenbitna ding a inn chiat a om ding, khut sil mun ding, mai khoih louh ding chihte khawng sum tampi sen ngailou a kikep theih ahihlai in, ana baihlam liai lou mawk! Inn a om di chihbang haksa sak a sa ngen kihi mawk…nop I sakdan pente lah ei adi’a ana hoihpen gige lou zel chihte hon ngaihtuahsak.
9. Hiipi dou a pan la kawma a venzawh (post covid-19) hun di et kawm le ngai hiveh aw maw. Lamka zaang a heutute (Saptuam & khawtang) in thei le uh na cih point bangzah hia'm n'on gen dia'm? Mipi ai-awh MLA & MDC te'n la...
DAWNNA: Mihing hinkhua ah hatsatna/hun haksa (crisis) I chihte Pathian’ vanzat ahihtheih zahzah in Setan’ vanzat leng hithei veve hi. Mipite kilungam in kipatau pahpah sek mah ahi. Huaiziak mah in, hibang haksat hun chiang in makaitu (salam leh khalam) hoih leh hoihlou kilat hun hisek ahi. Hiai bang hasatnate mipite’n a tuahdan uhiam a dawn dan uh (response) makaite makaihna ah kinga lian mahmah hi. Hiaibang hunte ah mipite’n khamuanna thu I chi hiam, lam-etna pethei thupuak, thukipahhuai makaite apan lam-en uhi. Adiakin, khalam a kikepna ah a hing gige Pathian’ Thutak a kibulphuh lam-etna thu leh khamuanna thute a I kihanthawn hun ahi. Pathian in haksatna tuaklou di’a hon sam hilou in, haksatna lak a leng hon ompihden ding a honchiam ana hizaw.
Maban ah leng hiaibang hun haksa I tuak tou zel maithei a, tu a I tuah lellel apan maban panlak ding dan geelkhol theile hoih mahmah ding hi. Haksat hun a a koilam lam a apoimawh leh akitasam gige tuh kithuzaktuahna (communication) ahi. I MLA/MDC te tawh kisai in, tu I buai sung in amau lam apan hanthawnna thu I chi hiam, a panlakna dan uh mipite khamuan thei ding thu tawm mahmah hi’n kana thei.
10. "Khawtang hinkhua siatna, kiakniamna leh tate etkolna/ innkuan ki-etkolna kikhenthei hilou" kici sek tawh kisai, na khankhiakna (Pastor) innsung a na zilte hon gen mah.
DAWNNA: Sociologists hi’n, theologian te hi’n research bawltute hileh kuapeuh in a nial louh uh tuh: Innkuan dinna mun sanga sangzaw ah khawtang om ngeilou ahi chih ahi. Huai omdan bel - khawtang chidam leh hoih a omna ding in innkuan chidam leh hoih poimawh masa ahi. Khawtang hinkhua in I innkuan hinkhua lak ahi (society is the barometer of a family) kichi ahi. Tuabang mah in saptuam le hi thou.
Vangphathuai tak in, Pathian a’ itna uh a’ niteng hinkhua ua ana hinpih nulehpa kana nei kha a, hampha kakisa mahmah. Government nna (job) seem thei ding a hamphatna piak ahihlai in ka pa’n saptuam tungtawna Pathian nasepna a na teel zaw hi. Huai apan in, ka pa’n sum-le-pai deihna hiam, khawsak nopzawkna ding lunggulhna tawh na seem ahikei chih ka theitel hi. Tua deihteelna ana bawl pen ka hinkhua a hon sinsaktu thupipen ahi. Ka pianna Nu mah le laisiam ahihlouh hang in Pathian in a koihna (Nu hihna) ah muanhuai mahmah a, a pasal nung ahihtheih tan in thuapzou mahmah hi. Class III ka hihlai vel hi’n ka thei a, exam di’a kisa zinglam baihtak a thou a phutuan de a lai sim di’a kakisak lai in ka Nu ahong thou a, thumna hong neihsak a, tuni tan in ka theiden lai hi. Atung a ka gen thil nihte khawng sanga sinsakna thupi zaw koimah ah ka mu kei hi.
Ministry tawh kisai ka Pa’n “amun-amual hiam a hamphatna lam hilou in a nna ( job) ahi ka teel” achi sek. Nna/Vaai khat pepeuh ah a mawhpawtu/ akisaipih deuh mi om tuam chiat ahi chih honhilh hi. Pastoral ministry bangle relationship tawh kisai ahi chih ka zilkhiak ahi. Relationship a lawhsamte ministry a lawhching lua chih om theilou. Leitung khawsakna ah ahithei tan a bat neih louh ding chih ahon sinsak poimawh mahmah khat ahi. Leitung khawsakna ah sum pen a poimawh masa pen ahi kei chih kana experienced khat ahi. Hiai bang ki-etkolna nuai a ana khangkhia ka hi a, hampha ka kisa. Bukimlouhna leh hoihlouhna (weakness) bel tampi om veve…kigen manlou phot ahi.
11. America a na zil/ theihthak omte le hongen mah dih; innkuan cidam, leh khawtang nuam cihte lunggulhhuai lua...
DAWNNA: Sinkhiak kup ding bel tampi a om a, hilele tamlou hon kum leng. America a saptuam structure kha localized ahi a, local saptuam in amau a autonomy nei, eilam dan a headquarter chih omlou. Huaiziakin, saptuam kipidan, kivaipuak dante tampitak ettonhuai mahmah ka sak om hi. Pastor-te thugen di’a kisakkholna leh a plan dante uh eilam Pastor te adi’a etton taak ka sak mahmah khat ahi nawn. A mite atangpi in a hounop (polite) ua, “kipak (thank you)” chih bang, “poi ka sa/ hon ngaidam in (I’m sorry)” chihte a zang tam ua, kihoupih anuam. Gintakthu gen, Zeldim thubawl (speculations) a hahbawl kei ua, eilam tawh kibatlouhna khat ahi di. Khristmas hun khawng innkuan-innkuan in a zangkhawm ua, eilam dan a mipi kipunkhawm chih omlou…Pathianni/ Nipini a tukha ahihkei ngalleh. Nasepna khatpeuh a kipahpih ua, a thawn a kihuh hiam a thawn chih a tam kei. Vaai khat peuhpeuh ah Police hi’n Court hitaleh, ahahzat ua, eilam dan a inndongta a kihoulem chih dante om thei di hilou. Ei lamte’n I phak louhna khat ua ka theih ahihleh, a sinna chiangchiang ua dottheih or dottaak mawk uh ahi. A sinna chiangchiang theitel mahmah uh. Laisim a taima mahmah ua, laigelh le a taima un ka thei. Issue khat pepeuh tawh kisai simdi laibu/ research material neizou uh ahi.
12. Na lungtupte TOUPA'N hon lawhcingsak hitaleh, tuban kum 5 in koi ah, bang seem di'n na kingaihsun? I kidot neneuhte banah, simtute vaikhah nop dang bang na nei? Kipak e. Hong damthei lua un!
DAWNNA: Pathian in damna hon piak leh tuban kum 5 in bel eilak a kizat ding ka kilamen. Assignment ahihleh heutute khut a kinga ahi a, amau hon koihna bangbang lungkim leh kilawp a sepding chih thupukna ahi. Kei lunglutna biik bel –Kitenna leh innkuan bawlna (Marriage and Family) tawh kisai seminar/training (for example- marriage enrichment seminar, etc) khawng kihahbawl henla, huan, counseling training/seminar for lay leaders or local churches lam khawng sai theih bangbang in kisai leh uthuai sa ing. A biblical role of husbands and fathers as spiritual leaders in the family bang le burning issue khat hi’n ka ngaihtuah. Kou le kipak ung. Saptuamte’n TOUPA hoihna ana tang toutou un!
…..
#Rev Khamkhanchin Ngaihte’ tanchin masa lam, link kipia ah: https://ebccdelhi.org/who-are-we/meet-the-pastor.html Tulel in, a tapa Np. Jamthiansiam Ngaihte in Pawl 12 zoukhia (graduated), tanu Np. Manbiaksang in Class 8 zoukhia, banah, aji (Nu Niangzaching) in USA a tun nung un MACE course zou bok hi. Saptuam membership laakna: Travis Avenue Baptist Church, Texas. Huai kawm in Pastor Chin, pawlpite’ deihna bang in Zomite lak ah part time pastor in kizang lel. TOUPA’N, Pastor Chin & innkuan pi in khawtuah zom zelta hen!
