Thumapi: Ei gingtute adi’a poimohpen tuh hotdam hih kitheihtelna (assurance of salvation) ahi. Tu khang (generation) a atamzawte Khristian innsung apan pianga khangkhia I hi uhi. Himahleh hotdamna pen mimal toh Pathian kal ahihmanin amin a Khristian I hihna in hon hondam theilou a, pianthakna poimoh hi.
Bangziaka poimoh: Jesu mahmah in “Toupa Toupa honchi napeuh van-gam ah alut kei di’a, Ka pa vana om deihlam hihte kia alut ding” (Matt. 7:21) a chi. Jesu mah in Nikodem kiangah, Kuapeuh tui leh kha a a pianthak keileh Pathian gam ah a lut kei hi (Johan 3:5) a chi hi. A minpu a Khristian I hihna in van-gam hontun lou ding a Jesu Khris lal leh hondampa di’a sanga kitheichian/ ki-nga mite ahi Pathian gama lut ding. Tuabang kitheihchetna na neita hiam!!
Hotdam hih kitheihtelna banga: Hotdam hih kitheihna tuh Amah (Jesu) a muanna leh kingak ngamna ahi. Gendan tuam in gen Jesu, ka khelhna pua in Khros ah “kei sik-le-tang in” ana sita hi”. Ka khelhman leibat (huaituh khalam sihna) man honna piaksakta hi chih poma kingate ahi. Gintakna chihleh pomkipna kibanglou ahi, i gintaka ikingak ngamna huaimah tuh pomkipna ahi. Kentuh risk lakna chiin le kagen hi. Aziak tuh Jesu adia i hinna i latkhiak chianga ei ututa omthei nawnlou a Jesu adia ihin ngaita ahihmanin risk lakna zong chihtheih hi. “Mi tengteng sihsika Khris asihna pen, ahingte amaua dia ahin nonlouh ua a sihsik ua si a thounawn ading a ahin zawkna ding uh ahi” (2 Korinte 5:15).
Bangchi saan ding: Hotdam hih kitheihtelna di’a poimoh masapen tuh mikhial hih kipkhawkna ahi. Pianken a hoihna mihingin kinei chiat hi, himahleh Laisiangthou in mi tengteng “mikhial” honchi hi (Romete 3:23, 5:12), i hoihna pen le Pathian ngaih in puanse kihhuai lel bang ahi (Isai 64:6). “Na pianthak theihna ding un na khelhna uh kisiik un” chi’n Peter in Pentecost ni in thu a gena huchi’n mite’n a khelhna uh sut banga na sa in pianthakna a ngah uhi
Piankhakna tuh Kha Siangthou nasep ahi: Laa in, “I khelhnate hontheisak ding’n Khasiang kia i deihpen” a chih bangin leh hotdamna hon kitheichiansak tuh Kha Siangthou nasep ahi; “kha mahmah in eimah kha toh Pathian tate I hi chih hon theisak” (Romete 8:16).
Thukhitna: Unau, hotdam ka hita chih na kitheichianna maw? Ginna tungtawna Jesu hondampa a sangin Amah ah na kinga-kip na maw? Ahihke’h Khristian innsung a khangkhia, pianken a hoihnate leh saptuam a na kizatnasate, na thilpiakte ziaka ana kimuang kha na hi di e!! Chialpi mite gen bangin, a’ ni leh kha poimohpen hikei mahleh; ka luplai in, jankim in, sun a ka nasepna munah Laisiangthou, tang, huai sermon, huai laa tungtawnin hotdam ka hih ka kitheichian… chih gen theih nanei hia? Tua bang na neih keileh kimuang khial hikha ding hiteh!! TOUPA’N I thugelh saulou hon zatsakta hen!
