Jesu Vualzou a Jerusalem a lutlai a ‘Hosanna! koute hon hondam in’ chi a mipi kikou-te lakah, bang apan hotdam ngai uh hiam chih leh Jesu’n bang apan hondam ding hiam chih thei hetlou a kikou om uhi. Huan ah, mi kikou ziak a va kikou tei a, boruak nuamsak thoh bang leng om ding un ka gingta mahmah hi.
Galatiate 4:4 ah Jesu a hunbi hong kim in numei suan in hongpiang ahihdan i mu hi. Tua dungzui in, Judate leng hondamtu poimoh a kisak pen hun uh ahi. A ziak bel Rome kumpi vaihawmna nuai ah om ua, Khotang ah, Sahkhua ah, Simlei Vai (Politics) Ieh Khosakna (Economically) ah neng niam in om uhi. Hiaite ziak in Rome kumpi nuai a suahtak ding tuh a lunggulh pen uh ahi. Mitampite’n Jesu thil lamdang hihte a muh chiang un kumpi in bawl leng, Rome kumpi nuai apan hon suahtakpih ding in upna liantak nei uhi. Salam mit in na hak ua, Jesu hihna tak ana muchianlou uh ahihman un poi mahmah hi. Johan 18:36 ah Jesu’n “Ka kumpi hihna hiai khovel ahi kei” chi in Pilat dawng hi.
Judate’n Jesu muchianlou uh ahihman in, hondampa ding a kikou uh hinapi, Jesu’n Suahtakna a bawlna Khros phung ah kipalpai maimah uhi. I Kor. 1:23 “Eite’n bel Khrist kilh den thu i gen ua, huai tuh Judate adia pukna, Jentel-te ading in haina ahi.” Jesu hon hondam in chi a kikou tampi te, sawtlou nung a Khros ah kilhlum un chi’n kikou maimah uhi. Salam Suahtakna lunggulhte’n Khros ah Jesu gum ngamlou uhi. Tulai gingtu kichi khenkhatte Judate bang geih a salam kia mitsuan a Jesu na zuikha om mahmah ding in ka gingta hi.
Unau, Jesu bang chi in na mu hiam? Na salam poimohte hon pia theitu, panpih na ngaih chianga hon panpih tuh tan lel khong a koihkhak ding lauhhuai hi. A hihlouh leh Khristian boruak(environment) tan lel khong nuamsa a, gingtu kichi khong i hi kha hia? Jesu’n bel khelhna kolbut na pan hong hondam nuam hi. Himahleh khelhna sung mah a kibual nuam a, pawtsan nuamlou i hih in tuh Jesu i hondampa ding in kisang theilou hi.
Johan 3:19 “Hiai siamlouhna ahi, Vak khovel ah a honga, himahleh mi’n Vaksang in mial a iit jaw uh, a thil hihte uh a gitlouh jiak in” khovel kumpite bang hilou in Jesu kingai niamtak in sabiltungnou tung ah tuang in Jerusalem lut hi. En leng i ki-saktheihna khempeuh suahkhia a kiniamkhiak a’ Jesu nungzui ding leh hondampa a pom ding in ka hon chial hi. Toupan’ hon vualzawl chiat hen.
Palm Sunday zatnuam
