Apaisa kha 3/4 sung in gam danga Tangthupha khuavak vapuak di’a kal suankhia EBC pawlpi tuailai 10 phial phata hi. TOUPA phat in om hen!! A lemtang hunhun a kuankhe thei di’a training la lel tua zah khawng mah om hidan in thu kiza hi. Hiai tuailai, Pathian adi’a kipekhete tuh (Covid hipi ziakin tup bangin nei thei kei mahle’ng) Missions-Tuailai huzap a kipekhia ahi uh kichi hi. Praise the Lord!!
Hiai pen, a piilpi in halhthakna hong tung kei mahleh, Pathian Kha hon vehna ahi i chilou theikei hi.
Ka ngaihtuahna ah i society a siatna leh namvaite a kingeihlouhna om in hichi vingveng mahle’ng, Pathian in zaw hon-it lua ahi, honzang nuam ahi, chih muhtheih in om a, kipahhuai ka sa hi. Tutunga kuankhe nanung unau nihte Prayer Cell khat a a hun zatna uah Rs.8,000 dongkhia in huhna pia uh ahi chih thu kiza hi. Praise the Lord!! Hiai a kuankhete EBCC, Delhi inle thumna leh thilpiak toh khakhe thei zel i hihman in manpha i sa mahmah a, nasa taka tha pe ding in ka um hi.
Hiai a kuankhete kipiakna (commitment) thupi ka sak luat nawn khat ahi. Nungak kuankhete laka khat, a pa toh ka houlimna uah hichi’n gen hi - Ka tanu in a training centre apan hon phone a, “Mahni kuan utna mun teel di a chi ua, Cambodia ka va teel” honchi a..
“Bawi, gam thawveng zawdeuh ale Pathian thu gen theih thou lou hia, huai gam khawng mi huham dan news a kizaza a” ka chihleh hichi’n hondawnga: “Pa dama honmu nawn di’n kikoih dah aw. Hilehle, Pathian in hiai leitung a kimu nawn di A chihleh hong kimusak di’a, A chih ke’h van-gam ah kimu ni, honchi” a chih ka thei gige hi. Hiai a kuante a gendan un a banghiam chia sih-le-man a tuah uh leh DNA tungtawna identify theihna di’n a samzang uh pia uhi. Huan sih-le-man a tuah uh leh agam a vui di or mahni gama puak di chih teel di pia ua, a tamzaw in a sepna gama vui di teel chi uhi.
Hiai a unaute’n hinkhaw manpha ana teel ua TOUPA ngaih in le manpha ngei di’n i um hi. Pathian itna apan kua’n ahia honkhen thei ding (Rome-te 8:38)? Laukha aw, sem zom in, ka lak uah hongteeng in!!
