Deihtakte aw phu kila kei unla, Pathian hehna awnzaw un, “Phulak himhim keimah laak diing ahi, ke’n ka thuk na diing, Toupa’n a chi,” chih gelh ahi. Romte 12:19
Kovel khantouhna leh changkan hi zahtalai ah, i gam chia i kisaktheihpih mahmah mun galphual hong suak maimah a, poi petmah hi. Hibang hunte ah, i lungsim ngaihsutna zong kizang siamlou in buaihuai mahmah hi. Hih buaina pen khatveitei hong veng diing ahi chih theihdan khat in kithei mahleh bangteng hon sukha in a suse dia chih kithei lou ahihna in hon lungngai, lungkham leh mangbangsak thei hi.
Thiltuahte ziak a dinmun dengdel leh lauhuaitak a om i hihlai in, hamphatna mahmah zong nei veve hi hang. Tua bel tuni May 7, Missionary Day i chih ahi. Kumdang bang in i program bawtte hong zat theihkei mahleh, a NI i chiamteh theilai lungdamhuai hi. Hiai ni Pathian in ei minamte aa diing a Kha leh Sa a suahtakna thu a hong puaktun ni ahi. Tuaman in bangchi bang haksatna leh lauhna, gaalpi in hon tuam mahleh Jesu Khris gingtute i hih in, Lametna lian leh thupitak hon neisak a tua man in i khamuang hi. Huai mah ahi kovel in a theihtheih louh gingtute ni neih, Halleluijah. Pathian’ hehpihna kiching mahmah in eite zong hon makaihtou zel in, tua tangthupha ei kiang a hong kipuak mah, en zong midangte pesawn leh va puaksawn theihna hamphatna i tankhak thupi in lamdang mahmah hi. Hiai tuh vualzawlna thuahnih chi le’ng kikhial lou diing hi. Pathain phat in om hen aw! Tua tangthupha pesawn zeel thei diing in leh Pathian’ itna mong neilou midangte kiang a gensawn thei zel diing in, leh hiai mohpuakna pen hamphatna a la in theihtawpsuah in pangtou zel ni, ei meet/punna diing mah hi ahi.
Nam a leng gentak loute himah lehang zong, hiai Pathian hing bia leh a tate i hih man in ginglou mite huat leh enghou leh soisakna bang i thuakkha ua i hamphatna uh gen zoh vual hilou hi, tua in Nasepte a Sawltak Peter-te lawmta in Jesu min a thuakkhak uh hamphathuai a sak uh bang hon phawksak hi. Tua bang ahihlai in Pathian’ deihlouhdan a hiai gimthuakna leh gaal i beihkhak uh lauhuai mahmah hi. Pathian’ theihlouh a thiltung bangmah omlou, tua i dinmun bang zong thei hi, tua bang ahihman in ama’ deihdan leh lungtunna bang a hiai sawina leh i maituah diing poimoh mahmah ahi. I taang teel a i muh bang in, Pathian tuh hehna, thangpaihna, gawtna leh phulakna i ot diing uh ahi. Pathian’ sep diing e’n na sepsak bang hi le’ng, ama’ hih bang a e’n hih zouloukha thei diing hi hang. Tua ahihman in Pathian ngak in, thuak hamham ni. Ama’ tung ah kinga ni. Tua hileh ama’n ei adia hoih penpen hon pe diing hi.
I thilhtuah haksa hi, lungzinhuai hi, thangpaihhuai hi, himahleh Pathian ngak in ama’ khut muanhuai a kinga in; hehna, thangpaihna leh gawtna Pathian awn ni.
