Pathian in Mosi thakhen ding in Joshua a sep hi. Joshua in a nasep patchil in ‘hat tak leh hangtak’ a om ding in a hilh hi.
Pathian in Joshua hihhat in hangsan sak thei hi. Himahleh Aman huchih sawm lou in Joshua pen ‘hattak leh hangtak’ a om ding in a hilhzaw hi. Bangziak ahi di?
Hiai thu ka ngaihsut lai in lungsim ah Samson leh kumpi Saul hong kilang hi. Samson pen a pianma apan piang ding ahihdan genkholh hi a, amah panlakna tel het lou in hatna thupi leh tungtuan mahmah piak ahi hi. Tua a thilpiak tan pen, bangtan hiam a phatuam in zang mah leh a hitheihna tan (potential) tung lou hial hi.
Saul a leng amah kilametna tellou hial in kumpi ding a thaunilh in om a, haksatna bangpi tuak lou in tua dinmun hon len hi. Hinapi in, Pathian ah ginom kuitung lou a, phet lou in a maban ding dawizawl khawng va dong maimah hi.
Alehlam ah, belam ching hinkhua apan in kumpi ding in David thaunilh in om a. Himahleh tua dinmun a luahkkipma in kum 10 vel mahmah gal dou in leh melmate’ gam tanpha a galtai in haksatna tampi palsak masak in om hi. Tuazoh in kumpi hihna hon len hi. Hihkhelh khawng hon nei tou zilzel mah leh, ‘Pathian lungsim bangpu’ chih in om a, a lalgam leng tangtawn a bei ngei lou ding a hihkip in om hilhial hi.
Lohchinnate leh lohsapnate khawng a poimoh lailai in huaite’ sang a poimohzaw tuh ginomna leh muanhuaina tungtawn a Amah zuihna, Amah thumanna ahi hi.
Aigupta apan Israel-te pikhe ding a sawl a om lai in Mosi a kilawp kei hial hi. Paulam bangzah hiam a neihte lak ah ‘mi dang awk ka hi’ chih a tel hi. Pathian in “Mi’ kam bawl kua ahia? Pautheilote, bengngongte, muhnate, mittawte kua bawl ahia? Kei Toupan ka bawl ahi kei maw?’ chi in a sal hi. Huchi ahih ziak in ka hon dangnal sak ding chi mai leh Mosi’ etna pan in, a buaina veng mai din ngaihsut huai hi.
Hilele Pathian in hucchih lou hi. Mosi dang-awk dangnal pen Pathian in bangmah loh het lou hi. Hinapi in Mosi panpih kisam hi chih phawk in panpihtu ding in a sanggampa Aron, thugen siam, a pia hi. Aron pen Mosi sang a upa zaw ahihman in, Mosi pianma apan in a panpihtu ding omkhinta hi, chihna ahi.
Elija leng Kerith gam aluita a va kibu mang ding a hilh a ka om lai in Pathian in ‘nang hon vak ding in vaak thu ka peta’ achi hi.
Panpihtu ding sepkhol khinta chih pen a lungmuan huai mahmah thu ahi. Vanglian Pathian in hon piak hihtheihnate theihkhiakna leh midangte’ kiang a huhtheihna ana koihkholhsate muhsuah ding tuh kalsuanna manpha mahmah khat ahi hi.
Kua leh koi apan panpihna hong pai ding hiam chihpen amite’ bildoh ding, ginna a kalsuanna ding vai ahi hi.
Lamet louh pi in chairman, TBSUC hihna len ding a mohpuakna piak in ka om a, Pathian in committee member-te’ tungtawn a mohpuakna hon pia hi a ngai in hiai mohpuakna ka na sangta hi.
Pathian in a deih bang sem ding in mite thuam a, ataksap uh huhna pe ding in mite mah leng koihkholhsa in nei hi, chih phawkna in nakpi tak in hon khamuang sak hi.
Tukum sung a saptuam thupi ‘Stewardship’ ana hih khelkhel bang leng gennei lua sa ingh.
Tualam a michih in kalsuanna leh masawnna nei thei ding in tangtawn Toupan hon ompih in hon ompihna hon phawksak chiat hen aw!
