(Sutzopna) | January 19, 2020 | Nipini @8.30PM T-2, HHA (Pa Songlianthuam’ sauliim)
Dotna: Nu-le-pa laa siam lou (laa mi lou), tate laa siam chih om thei dia’m?
Pastor Biakson: Saupi a dawn theih dotna khat na hondong ua. Tate laa siamna di’n nu-le-pa laa siam hih ngai di’n ka gingta kei. Tate ah tuh lunglutna I instill I chi hiam, I piak theih ahi a, huai ei mimal in I bawlsak a thumna mahmah toh lankhe tou a, kitawsawn a tumging lam bang lasak lam bang I ngaih poimohpih chiang in hong piang ding hi. Tulai a lasiam taktakte Ningmuanching chihte khawng, a nu leh pa’n lunglutpih uh eivo’i. Innsung a zalentak a apoimoh uh le hihsak uh; laa lam a lunglutna uh, a unau ua lasiam, music tumthei vek uh ahi. A sanggamte bang un leng naupang chik a music bawlthei uh eive. Huchia a naunu Chinghoih pen bang in laa ahonsakte bang le, a unau ua music a bawl uh. Huaiziak a amaute khah nakpi tak a tawsawn uh hive aw. Amau a talent om Pathian in a piak hichia seelsak (hide) lou unchin pholhsak uh. Huai khah poimoh mahmah ka sa.
Pathian in purpose neilou a mi talent pelou di, lasak lunglut ahih ua leh huai in khah purpose nei hi ding. Huai banah a talent uh I hekmit khaksak leh amau future le hekmit sak I hihkhak ding lauhuai hi. Huaiziak in I tate’n bang talent nei uh a, bang lunglutna nei uh a chihte I muhsuahpih teitei a, I tawsawn di uh poimoh ka sa. Tulai khovel innlam bang, Delhi le hithou, I ngaihtuah chiang in kam zon kichi laisiam pipi a point a kidem uh hita, degree point (Esk. 95.6, 95.4, etc.) a kidem uh hita inchin, kam zonmuh chih khawng haksa gawpta. Mahni a dinsuah theihnaPathian hon piaksa, skill leh talent te zang in nekzong thei chiat le huai kankan a bit omlou maw. Kuama’n suhsak theilou hilai eive. Huai lam I hahbawl hun uh hongtung ahi de aw ka chi a, huai hih poimoh ka sa. Hiai teng ka hon gen paisuak a, genbeh lai le. Kei le ka nu-le-pa hon zonsak hi in ka thei chiahkei a, huai sang in a credit ka piaksek tuh ka nuneu ahi (tua Kangkap a headmistress semlel). “Laa sathei hivechin aw Biak, laa kizil aw” chisek. Nidang in zah a zahkai khat ka hi a, inn khawng a laa sa hauhau sek, mi lak a kisa ngamlou ahihchia maw! Huai kha hon zak chianga, “Na aw dik ahi, sa zel in” hong chi. Kei a utlou (pengphi) lam a pang hita.
Special number di khawng laa hon zilsak nopnop zel. Hanship a omlai bang kou neuchik ka hilai ua, Vungthiankim te le om uh. Vungthiankim, Khammuansang chihte khawng toh la hon zilpih, kou sa napnap zel. Theihlouh kal a huaite’n honna kheh khiakhia I chi hiam ah honna dom toutou inchin. Ka hon sakkhiak taktak kipatna dan le ‘Zomi Idol’ kichi tulai a thang-a-thang pen huailai a le omta hive aw. Huai lai a ka Pu Siam (Upa V Paukhansiam) te sai mah hinchin, ka Nu Kim in hon pidok taget… “(Lasak kidemna ah) tel aw” chi, keilah utlou. Laa sak di le theilou. Hilehle ka Nu Kim’ thu manna a vatel kei vo’i. Vatel ing a, audition round ah music tellou a laa khat - Jesu Migi Hong Paukhia In (Biakna Laate number 90na) va sa. Second round a le huai mah sa, laa dang le thei tuanlou khop a hichia sim-a-simple a va-om chihleh Top 20 tan vatung. Top 20 ah laa kheng ing a, Jesu Kia In Kros Paw Ding Hiam chih laa (Biakna Laate number 103na) va sa nawn, huai le ka pu - ka nu’ pa (Pastor Tualzam) hon teelsak hi zawmahlai ahi. “Hiai laa hoih, va sa aw” honchi inchin, kizil naknak in, chi liing zen a va sa! Huailai light hoihtak a hong kikap, kiding theilou, chi ling-a-ling. Laa sak lai a ka chil khawng bang valh kha kut zel maw, hichi khop a nervous a ana kipan ka hi. Hilele huai in hichia laa sa thei ka hihna… chih di hia, mi hon theihna hong suak inchin, huchia hong paitou kha. Huaiziak a banghiam khat in honna phut ek ziak a hichia hong paikhia. Huaiziak a tate khah ahihna uh, laa sak sese le chi khang maw, lunglutna a neih uh huai talent a neih pen uh poimoh, huai I hekmitsak hetlouh di uh hoih ka sa. Tua banah Pathian in purpose nei a A piak hidi ahi, lunglutpih poimoh ka sa ahi. (Sutzop di).
