“Bahte kiang ah thilhihtheihna A pia a, hanta himhim neiloute a hatsak hi.Tuailaite nangawn bah in a gim ding ua, tangvalte leng a puk zou ding uh. TOUPA ngakte’n zaw a hatna uh a thaksak nawn ding ua, muvanlai bang in kha in a lengtou ding ua, gimlou in a tai ding ua, bah lou in khe in a pai ding uhi.” Isai 40: 29-31.
Mihing haksatna tuaklou om ding in a gintakhuai kei hi. Haksatna in khentuam neilou in, aneu-alian, azawng-ahau, ahat-ahatlou chihte khen sese lou in, eimah puak khoptek I nei chiat uhi. Jesu Hondampa di’a I san ziaka, haksatna I tuahte nepdeuh leng a na hi tuankei a, Pathianmi taktakte, haksatna leh buaina toh kisikhop tampi om leuleu uhi.
A poimoh mahmah hi a I theih tuh haksatna I tuah hun in bang chi bang in I maituah a? chih ahi. Mihing in tuh haksatna ziakin hatna mansuah thei a, bah thei a, gim thei a, puk thei hi. Himahleh haksatna I tuah hun ah, I taina in gen tampi nei hi. A hon panpih theiloute kiang bang, zu-le-sa leh khamtheih thilchiin hoihlou taktakte lak ah puklut khaktheih luat hi. Huaiziaka Khristiante ading in, haksatna tuah hun a, pilvan ngai mahmah hi. “Pilvang unla, limsak un; na melma uh Diabol, humpinelkai humham bang in a nek theih ding zong in a vialvak ahi” I Pet. 5:8.
Haksatna hun Pathian naihna ding a hunlem ahih banah Satan in hon suksiat theihna di’a hunlem ahinawn hi. Job in haksatna a tuah in, Pathian adi’a a ginomna a suahtheihna ding leh Pathian a taisan theihna di’a hunlem ahi tuaktuak hi. Himahleh haksatna I tuah hun a, hon hatsak leh hon panpihthei omsun tuh Pathian ahihman in Amah naih sem ding in I kichial hi.
Pathian ahihleh mihingte banglou in bah lou, gim ngeilou hi (Isai 40:28). A kipahhuai sawnsawn ahihleh, bahte thilhihtheihna pia a, hanta neiloute hatsak a, Amah ngakmite’n muvanlai tha bang nei ding chi hi. Muvanlai sutmite’n hichi in a tangthu gen uhi. Muvanlai in leng a hinkhua ah, haksatna tawpkhawk a tuah hun om chi uhi. Huai bang hun chiang in a kha (wing)te pulh a, a’ chin leh a’ mukte a mol (hiamna mansuah) gawp in, an nek ding nasan man zoulou in hinkhua haksa tak in zang chi uhi. A kha, a’ chin leh mukte hongpulh/ kiaksiang chiangin, a thak hongpou in, nidanga a mansuah hatnate hon ngahkik nawn in, hinkhua zalentak in huihkhua ah, hon zangnawn thei hi. Haksatna hun a Pathian naihte hinkhua toh kisai Zawlnnei Isai in, a nagen ahihman in lungmuanhuai a, Pathian naih a manphatdan hon phawksak hi.
Paul inleng haksatna tampi a na tuah hinkhua ah om hi. A haksatna tuh taksa a ling toh tehkak hial hi. Hiai haksatna lakhia ding in TOUPA ngen mahleh TOUPA’N, “Ka hehpihna nang adingin ahun” chi hi. Himahleh a haksatnate, TOUPA salhvakna nuai ah hon et chiang in, a hatlouhna tak, a hanta thuguk ahihdan mukhia hi. “Huai thil tungtang thu ah hon-awngsut theihna ding in TOUPA thumvei ka ngen hi. Huan Ama’n ka kiang ah ‘Ka hehpihna nang di’n a hun hi, ka thilhihtheihna hatlouhna ah ahi hihkim a a-om’ A chi hi. Huchi in Khrist thilhihtheihna ka tunga a omtheihna ding in kipaktak in ka hatlouhnate ka suangzaw ding hi. Huaiziak in Khrist ziaka hatlouhna ah, liamna ah, taksapna ah, sawina ah, lungngaihna ah ka kipak zel hi; ka hatlouh peuhpeuh chiang in ahi ka hat zawk” 2 Kor. 12: 8-10. Hat lou leh bah I kisak hun in Pathian naih le’ng, Ama’n theihsiamna leh hatna honpe ngei ding hi. TOUPA’N simtute tengteng hon vualzawl chiat hen aw. Amen.
