Ka naupan chik apan in Laisiangthou sinte ka na ngaisang mah mah hi. Ken leng va sin sam ding tuh ka ut mah mahte lak a khat ahi. Himahleh dam theiih ngai, sum bang zong neih zek ngai leh laipoimoh tuam tuam om chihte kei a ding a thil baihlam hilou lua dan in ka na ngaih tuah sek hi. Ka naupan lai in Bible zilte a khawl chiang ua bial fang a hong paite bang ka muh chiang in ka na eng thei mah mah a, a thugente uh bang ngaihnop huai kasa thei lua hi. Ken leng khatvei ka zil sam ding ahi chih tuh ka ut leh ka lung lutna ahi gige hi. July 4, 1981 a Dorcas Hall, New Lamka a Grace Bible College a hong kipat in ka na kilawp mahmah a, kai khak tei sam tuh ka ut lua hi.
Ka hih theih dan dan a siamsinna zomtou zel in ka hon graduate sam ta hi. Siamsinna ka na patna i saptuam school mah ahih ziak in saptuam school a sinsaktu hiding a deihsakna ka tan in zong ka kipahna alian petmah hi. Tua nasem kawm in Laisiangthou sin ding a phalna ka na ngen zel hi. Heutute deihsakna toh kum 17 vel ka sep nung in laisiangthou sin thei ding a phalna hong kipia a ka kipak mah mah nawn hi. A sinna mun ding in ei a mah, Grace Bible College ka telpah a ka lunggulh bang in admission bawl thei ding a hamphatna piak in ka om hi. Kum sawmnih phial lai ka sim nawnlouh nung in M.Div. kum thum sung sin ding in Grace Bible College ah ka hong lut ta hi. Ka ut leh lunggulh mahmah Laisiangthou sin ding hita, amun zong ka ut mahmah na mun mah ahihman in nuam ka sa hi. Naupang kep a hong kikep chiang in tawldam huai ka sa a, himahleh a zilna lam ah bel theihna, chiamteh theihna a na molgawp simtak man in haksatna zekzek om hi. Ahihhang in mission field apan hong pai Khristian hong suak panpante toh teh a bel i theihsa leh sintawm ngailou a i neih tampi na om hi. Banah thu tamveipi na genta, saptuamte kivaisai dan tampi na kitawn kha ta ahihman in Laisiangthou bel nasepna neih nung in sin leng phatuam in hon panpih khadiak ding bang ka sa zaw tham hi.
I Saptuam in hiai Grace Bible College (GBC) i na neih uh manpha kasa a, heutu masate muhkholhna thupi kasa hi. Mission a semtu ka hih tung lai in ka tanaute lak ua khat in “Bible va zil lechin GBC a sem ding chin a kisuan suan ngailou a Lamka a om om mai ding na hi” hon chi hi. Ken zong “Na gen dik mah mah ve GBC ah sem leng bel kisuan chih om khawl lou ding, himahleh Lamka a om lunggulhna tan kia toh Bible zil tuh neu ka sa deuh” ka chi hi. Tuchiang in bel Grace Bible College pen hong khang tou zel in masawn zel hen i chih leh a semtute i thumpih ding, a hoih semna ding a semtu hoih koih touh zel ding leh Principal zong kikhek thithe lou ding in om thei leh chih bang deih huai hi. Mundang khenkhatte toh ka teh leh sithuai hetlou ahihlam ka theih beh sem sem hi. Aziak bel kua hiam in mimal a, a bawl khiak mai hilou, thumpihtu tampi nei ahihman in.
Grace Bible College in degree tuamtuam a piakte lak a Ministerial Training Course (MTC) i chih uh zong hoih kasa petmah hi. Naupanlai in Church of Christ-te a khawng leh mi tuamtuam-ten Correspondence Course a neihte uh na ki hih ngei a theihna vantang hon panpih mah mah hi. Huaite sang a leng hoih zaw, laibu hoih tak tak kipe zaw mah ahihman in michih in om mun a zil theih ahihman in zil chiat tuak ka sa mahmah hi.
Grace Bible College ah ken Laisiangthou thu theih beh tampi ka va nei a, laisiangthou sim ding dan zong ka va sinkhia a ka kipak lua hi. Huai san mun pansan in Pastor nasepna ding in kibul patna ka va nei thei a hampha ka kisa hi. Pathian gam nna ka sep dan kikhekna, ka omna mun leh mual kikhekna dia a bul ka patna leng ahi. Kei mah bang in mi tampiten hon phattuampih unla, hon phattuampih tou zel zel lai leh chih deih huai ka sa. Toupan Grace Bble College vualzawl hen.
