Saptuam i chih chiang in gingtute kipawlkhawmna, khalam pumpi, genna ahi. Khuavannuai huap khalam kipawlkhawmna (universal church) leh tualsung khat a bekhawm khalam kipawlkhawmna (local church) Saptuam om hi (1Kor.12:13; Gal.1:1-2). Saptuam tuh Jesu Khrist lamkhiak ahi a (Mat.16:18) huai Saptuam’ Lutang (head) tuh Khrist ahi (Eph.5:23). Tualsung Saptuam mun tuamtuam a om te’n kigawmkhawmna (convention/ association/ organization) kineih tiltel uh a, huaite’n paidan leh gindan tuam chiat (denomination) kineih sawn uhi. Hiai paidan leh gindan tuamtuamte’ lakah kuate a dikpen ding hiam chih leh kuate etton takpen ding hiam chih pawlkhat-te’ buaipih mahmah ahi.
Oral Roberts University a Sinsaktu Larry Hart in kumzabi 21na hun ah Saptuamte zuih ding leh etton theih ding paidan (model) lian mahmah 6 vel om achi hi. Huai te tuh- 1) traditional model- achi a huai tuh Saptuam lian evangelical leh charismatic kichite paidan, hihngeisa tengmah hihtou den, chihna ahi, 2) Saddleback model- huai tuh thil hih khatpeuh ah tuppi (purpose) kichiantak nei a pai chihna ahi, 3) Willow Creek model- member hi nailoute member a hong hihtheihna ding kia uh ngim a thil khatpeuh sai chihna ahi, 4) Apostolic model- sawltakliante bang a makailian kituamneihna genna ahi, 5) Toronto model- halhthakna masuan a kimakaihna genna ahi, leh 6) Metachurch model- bial neu chikchik a kikhen a kimakaihna, chihte ahi. Hiai teng lakah ahoihpen chih a om tuam khol kei ding. Pathian’ deihdan zui, Laisiangthou a kibulphuh, ginna a kilamtou, kha leh thutak a bekhawm leh theihpihtu nasep sem Saptuamte tuh a ‘etton tak Saptuam’ ahimai ding uh. Huchi bang ‘etton tak Saptuam’ hihna (character) dia poimoh masa khenkhat hiai ah i taklang ding.
1. Worshipping Church (Bekhawm Saptuam)- Saptuam tuh Pathian hing bekhawm Saptuam ahih ngeingei ding ahi. Huai om dan bel biakpiakna limsak mahmah ding chihna ahi. Thukhun Thak hun a Saptuamte leng biakpiakna limsak mahmah te ahi uh (Nas.20:7; 1Kor.11:17f; 16:2). Pathian tuh Kha ahi a, a bemite’n Kha leh Thutak a biak ngeingei ding ahi (Jn.4:24). Biakpiakna tuh khalam thil ahi. Kha leh thutak a biakpiakna hun zat ahihtheihna ding in pitute, tanmun neite, leh mipite kha leh thutak a kibualmi ahih uh poimoh masa hi. Biakna hun tuh mimal ngaihdan, awlmoh leh puaknak thil khatpeuh genkhiakna hun ding ahi kei a, Pathian hing biakna a lungsim, kha leh taksa toh kipumpiakna hun ding ahi zaw hi. Biakna hun tuh kipak theite a dia kipahna hun ahi a, himahleh, mipite’ kipahna ding leh nopsakna ding zonna ziak a chiamnuih thanghuai genna hun a zat ding bel ahi kei. Banah, mahni kisiamtanna thu, chinglou leh siamlou kisakna thu gengen na ding hun leng ahi kei bok hi. Pitute’n (conductor or worship leaders) mipite’ lunglut dan, kilopna dan, leh nopsak dan phawk kawma makaih theih kisin ding ahi. Ahi a, apilvan huai mahmah bel kuahiam tanmun nei khat in mipite lunglutna leh nopsakna ding kia en a hon makaih chiang in nuam sim bang mahleh Pathian adia kihhuai ahih ding thil lauhuai ahi (Isa. 1:13). Mipite’ lunglutna leh nopsakna ding sang a poimoh zaw tuh kha leh thutak a biakna ahi. Huai omdan bel ei’ abetute’ lungkimna leh nopsakna dan a biakpiakna hun zat sang a Pathian’ lungkimna leh Amah deihdan a biakna hun zat a manpha zaw chihna ahi. Ei’ laka biakna hun tamzawte ah huchi bang hi theilou mawk, bangziak ahi di? Pathian’ deihdan leh Amah lungtunna sang a eimah ut dan leh nopsak dan ding i zon tamzawk ziak bang, ngaihdan leh awlmoh thilte genkhiakna hun a i zat khak sek ziak bang, kimohsaktuahna leh ki-iplahna thu genna hun a i zat khak sek ziak bang ahi nuam mahmah hi. Banah, i lasak leh thugente’n ei’ hon sukha lou, kisikna leh kikhekna hon tun loupi, midangte suk khaksak i sawm veu ziak bang leng ahi ding. Kivel thak chiat ni! Hichi bang thilhihte’n Pathian hing bekhawm Saptuam i hihna a liahmang ban uah mipi tamtakte thadah sak zawmah lai hi.
2. Witnessing Church (Theihpihtu Saptuam)- Hiai tuh Mission Saptuam genna leng achih theih ding. Saptuamte Pathian hing bekhawm Saptuam i hi ua, huchi mah bang in, Khrist theihpihtu Saptuam leng i hih ding uh poimoh hi (Nas. 1:8; Mat. 28:19). I biakna toh kizui a i biakpa theihpihna nasep i limsak mahmah ding uh ahi. Huai omdan bel Biakpiakna leh Theihpihna (worshipping and witnessing) a tonkhawm gige ding chihna ahi. Huai tuh Saptuam dinsan leng ahipah hi- Pathian biak ding leh A’ itna thu (Gospel) puanzak ding. Theihpihtu Saptuam i hihtheihna dingin Saptuam milip in amau a Kha thilpiak omte hon muhkhiak ua huai toh kituak a hong kizat uh poimoh hi. Huai thilpiakte amau mun ding chiat ah manpha taka zat a hong hih chiang un Pathian min tawisang in om ding a, huai toh kiton in, Khrist Tangthupha puanzakna in hon zompah ding hi (Mat.5:13-14). Hiai toh kisai ah Saptuam makaite’n poimohna lian tak mai anei uhi. Amaute tuh Saptuam mite adia kokmuhtute (facilitators) ahi uhi. Michih a thilpiak tan bangzel ua hong kizat theihna ding ua kong honsak a etzui ding ahi. Pathian in hihtheihna tuamtuam hon piakte (1 Kor. 12:10) ahiding bangtak a zat ahihchiang in a gam kuankhe ding (cross cultural missionary) pawl, thuhilhtu (counselor) ding, sinsaktu (teacher), vaihawmtu (judge), thumtu, kipaktaka pia/thohtu ding, hanthawntu, zuitu, nasemtu ding, huhtu ding leh adangdang kichingtakin hong kilemtou ding hi. Huchiin Saptuam tuh ginna ah leh nahoihte sepna ah kilamtou in michihte Khrist batna ah khangtou ding uhi. Huai tuh Saptuam khan dan ding diktak ahi.
3. Caring Church (Kikem Saptuam)- Saptuam i chih vaihawmna mun ding hi masa lou in kikepna mun ding ahi. Khalam kikepna mun ding. Khalam kikepna hoihtak omna Saptuam tuh Saptuam hing leh khangtou ahi. Thukhun Thak saptuamte leng akikem Saptuam ahi uhi (Nas. 4:33; 5:12; 1Pet.4:10). Kikepna sang a kivaihawmna hiam neihlelam hiam leh thildang khatpeuh awlmoh zawk a hong om chiang in huai in Saptuam khan ding dal in, Khrist mel liahmang sek hi. Saptuam khangtou lou tehna khenkhat ahihleh- hih ngei tengmah hih gige, member te’n hih tumta nei lou makaite lah buai petmah a buai gige, kimohsatuah leh ki-iplahtuah, thu-le-la kigen zelzul lah laktheih leh zuih theih ding mumal omlou, ahoih leh kilawm ding ngenta kigen hilele azui kuamah omlou, kipawl bawlna leh kilangkhenna, chihte ahi. Khalam kikepna kichian omlouh chiang in hiai bang thilte’n Saptuam sung luahdim pah uh a, huchiin thuneihna leh dinmun kituhna in zui zel hi. Huaiziak in, sep leh bawl ding i gelte peuhmah michih sukha khalam kikepna i tunding nop ziak ahih ngeingei ding uh ahi. Michih taksap sukha (need basis) kikepna poimoh hi. Khalam khanna toh kiton lou a building kilawm leh lian taktak tunding a hong om khak ding bang, zuih ding dan leh dun a hong tamluat ding bang thil lauhuai mahmah ahi. Huai tuh Saptuam tamtakte puksiatna bulpi ahi. Dan in kuamah hon humbit lou ding hi, a zui ding mite’n khalam pichinna i neih masak kei leh. Saptuam ah khalam kikepna mahmah pibawl pen a neih ding ahi. Amasa in mimal leh Pathian kizopna diktak poimoh a, huai zom in Pathian muanna leh Khrist ginna a kilamtouhna, sianthouna leh diktatna lampi a kichilna poimoh hi. Hichi bang kikepna in khalam keuna apan hon hunkhe dinga, kimohsakna leh kituam bawlna, leh samitna apan hon vengbit ding hi. Huai tuh Pathian’ deihlam ahi (1 Kor.11:1-13; Eph.5:18).
4. Organized Church (Kilemtuak Saptuam)- Thukhun Thak Saptuamte tuh a kilemtuak (organized) Saptuam ahi uhi. Akipanchil himahle uh Khalam kipawlkhawmna (Spiritual body) ahih dungzui in mihingte kipawlkhawmna khatpeuh toh kibang lou ahihna leh achituamna kembit uhi. Huai ah Enkaitu (Overseer) ding Upate kisep in amaute panpihtu ding (tual upa) gingtute lak apan kitelkhia uhi (Nas. 6:1-7; 15:6,12). Amaute’n Saptuam’ sep leh bawl ding, kalsuan ding dan, chihte enkai in makaihna nna kizentakin sem uhi (Nas. 11:29,30). Saptuam’ nasepna thil khatpeuh ah enkaitu kichiantak a om a, kizentak a etkai leh saizui pahpah ahih ding ahi. A saitu mumal omlou, amu masa mu nanung in kigensiak thoh maimah, chihte’n mun a neihlouh ding. Nasep khatpeuh ah leng thil omdan, thil saisawm ahihdan, leh sum dinmun chihte kichian taka taklat pahpah ding ahi. Vaihawmna leh vaisaina peuhmah itna tungtawn a sepkhiak ahih chiang in kimuanmohna leh ki-iplahna te’n mun neilou uhi. Saptuam neu leh let thu ahi kei a tanmun hawm dan leh huai ding a kisinsiamna ah a kinga zaw hi. Vaihawmtu piltam thoh maimah nasepna lah mavang tuan hetlou chih thil om thei ahi. Huaiziak in Saptuam vaisaina thil khatpeuh ah tanmun kichian tak a hawm pahpah a Saptuam milip pankhak theihna dia vai gelkhiak mengmeng tuh makaite mohpuakna ahi.
Thukhitna: Saptuam diktak tuh Pathian hing bia Saptuam, kha leh thutak a bekhawm, gingtute kipawlkhawmna ahi. Huai ah Pathian’ itna leh Jesu Khrist tatna (Gospel) theihpihna nna sepkhiak leh puanzak in om hi. Hiai kipawlkhawmna sung ah kikepna leh nna kisepsaktuahna kizen tak om a thil khatpeuh ahiding bang taka kilemtuak in om hi. Huchi in, Saptuam hong chidam a itna leh ginna ah khantouhna hong om hi. Huchi bang Saptuam tuh a ‘etton tak Saptuam’ ahi. Toupa’n A’ Saptuamte huchi bang hi thei ding in hon ompih chiat hen aw!
