Khovel a hiipi tuamtuam omsate, hun bangtan hiam nung chiangin, awlawl in amit hiaihiai ua, a khawl thei khong zel uh. Pandemic in beina chi nih anei chih ahi. Damlouhna leh sihna ahong kiam/ bei hun (medical ending) a om; himahleh huai ma na-ngawn inleng “lauhna hiipi” abei hun (social ending) leng a om thei. Natna pen zoh hi naikei mahleh, chimtakna ziak leh apoimoh ziakin, khat veivei mite’n natna toh tenkhawmdan akizil uh ahong kiphamoh thei.
Dora Vargha, University of Exeter a historian khat, in “a zawhna buah mahmah mai ahi (endings are very, very, messy)” ana chi. Tulel a pandemic Covid 19 akipat tungin health problem ahi, himahleh economy ahon hihbuai paha, tu’n social problem, law and order problem leng ahon tun. Mun khenkhat ngial ah political dilemma asuak zomah a, world crisis thupi pen ahita. Hiai buaina ven hun ding muhtheih ahi nai kei. WHO Diretor General, Tedros Adhanom in “not even close to being over” achi lai.
Bacteria chikhat kia (Yersinia Pestis) inleng khovel ah pandemic hat penpen 3 ana omsakta. Plague pandemics ahong beidan theihchet ahi kei; mihing teng sibei lou tuh ana hi peuhmah. Quarantine zat ziak a hiai pandemic ana kizou thei dan a ngaihtuah ahi pipen. Tu tan in kum teng in hiai natna in mihing tampi a that gige lai a, himahleh a damdawi (antibiotic) leh vaccine (1890) ki mukheta ahih ziak in epidemic tuh dal zoh ahita.
Leaf from History
West Africa ah 2014 kuma ebola epidemic ziakin mihing 11,000 ana si uh. Huai hun lai in, mundang pek gamlapi Dublin, Ireland a hospital khat ah, Africa mi damlou ahong tung a. Daktor khat, Susan Murray chihlouh staff dangte’n alau ua, kuamahin ana en ut kei uh. Murray in lai a gelhna ah, damloupa natna cancer sau tung lawta ahihmanin ahihtheih omsun tuh khamuan leh etkol ahimai ana chi. Ni tamlou nung in huai damlou in ebola natna veilou ahi chih test result ahong tung. Dakkal khat khit in amah asi pah ngal a; ni thum nung in WHO in ebola epidemic beita chih thu a puangkhia.
Ebola Zoh hi nawnta: Covid 19 khovel in abuaipih sungin Ebola epidemic nanungpen kal masa, June 25 in abeita chih WHO in apuangkheta. Hiai hiipi khovela athupipen nihna leh Democratic Republic of Congo adi’a 10na; August 1, 2018 ni a puankhiak ana hita. Kum nih hial douna ah sisan sample 220,00 test leh vaccine dose 303,000 val piak ahih nung in hiai epidemic tuh zoh ahi nawn photta. (Natna beita chih theihna dingin positive case nanungpen ahong negative nawn nung ni 42 beek achin angai). Damlou 3,470 leh misi 2,287 a pha man uhi. Tu in leng ebola natna bei mahleh a virus gamsate laka om lai mahmah ahi.
Covid 19
India ah covid 19 case masapen January 30 a muhkhiak ahi. March 15 in 26 ahong pha a, niteng in tam semsem in a pung a, June 23 ni kia in leng 14,933 muhkhiak ahi. Pandemic hun chituam leh lauhuai hong tunglai ding ahi (WHO). Mun tuamtuam ah lockdown lakkhiak ding, khahkol ding chihte akipanta; lakkhiaksa koih nawn angaihna mun leng a-om zel. Hihtheih teng hih mahlehang covid zohna ahi nai kei. Natna dang khat, a lauhuai lou zangin, hiai covid 19 akiphukhe thei diam chih tanpha misiamte ngaihtuah khat ahi.
Vaccine
Tu in lametna lianpen vaccines, khovel mun 140 val a kibawl lellel a kinga ahi ahi. Himahleh vaccine bawl kichi thil lauhuai leh hunlut mahmah ahi. Kidoupi 2na hun in allied sepaih khenkhat yellow fever vaccine piak ahi ua. Alak uah a-sang-asimte’n jaundice leh hepatitis a vei ua, khenkhatte asi uh (Cutter incidence). Vaccine bukimlouh ziak mahin 1950s in mihing 40,000 in polio a vei ua, 200 vel asi uh. Tu chiang inbel vaccine bawlna khauhtak a etzui ahita. Vaccine ziaka siatna compensation piak ngai dose, 40 million ah khat khawng lel a om.
Tunai a vaccine bawlna dinga hunlut dan khenkhat: SARS vaccine (2003) - kha 20, EBOLA vaccine (2014) - kha 7, Zika vaccine (2016) - ni 200. Covid 19 natna, SARS leh MERS bangin coronavirus tuam khat ziak ahi. Huai natna tegel a research thil muhkhiak tampi ban zop theih a om ziak in, ni 65 sunga clinical trial pat theih a om ahi. March 16 in dose masa pen volunteer Jennifer Heller piak ana hita.
First generation vaccines: Virus hatlou zang a kibawl vaccine ahi. Small pox, flu, measles vaccine I chih hiai dante ahi. Hichidan bawl kisawm covid 19 vaccine 9 a om uh. Second generation vaccines: Virus pumpi hilou in athem kia zang a kibawl vaccine ahi. Third generation vaccines: Tol (yeast) ah virus a khoi ua, virus lauhuailou dang toh a belhkhawm uh. Hiai dan vaccine tuh Hepatitis B, Whooping cough leh meningitis B vaccines ahi. Hiai dan 27 a om ua, Moderna (USA) in ma a kai.
Vaccine kibawlte amadawk 3 a om ua. Etkhiakna tan tungkhinta vaccine te lak ah Moderna, US in ma akai lellel a; Oxford, UK inleng anaih mahmah. India ah Bharat Biotech, ICMR leh NIV pankhawmna in vaccine khat, Covaxin minvuah bawlkhiak ahi. Ganhing guinea pig leh sansiimte a test zoh ahih nungin, tu’n covaxin adingin clinical trial phalna piak ahita. A lohchin zel leh 2021 kumtawp lam a hiai vaccine covid 19 dalna dia zatman lamet ahi.
Clinical Trial
Damdawi thak a kimuhkhiak khit chiang in, siatna a tun thei hia chih ganhing ah etkhiak masak ahi. Mihing ah, phase 3 a etkhiakna in a zui. Huaiziakin kum 4 apan 10 khawng hun alut zel.
Phase 1- Safety trial ahi. Volunteer mi tamlou kizang. Kum 2 apan 3 vel hun lut zel.
Phase 2- Volunteer aza-asimte kizang, aphatuam hia chih etna ahi. Kum asim hun sau lathei ahi.
Phase 3- Mi asang-a-simte zangin mi honpi adi’n a zattheih hia chih etna ahi. Kum 2 apan 4 vel hun la zel ahi. (tulai in phase 1 leh 2 akiton ahih inleng om). Avekpi’n clinical trial ah volunteer mi 5,000 khawng a kizang zel.
Other Challenges
Vaccine kibawl zou dek kichi mahleh, bang chituk ahoih ding chih kithei lou, a zoh hun ding leng theihchian louh ahi. Huai nung in leng phalna tuh trial lohchin dan ah akinga lai ding. Himahleh huaite ngak hileh hun tampi amang ding. Atangpi’n vaccine khat bawlkhiakna dingin $500 million khawng lut zel chih ahi. Mass production (khovel ah billion asim vaccine kibawl ngei nailou, bawlkhiak vual ding hilou), transportation (gam tengteng, azawngpen inleng poimoh ding; mun tuamtuam a bawl deihhuai), logistics. Tua teng banah vaccine petu trained workers poimoh lai ding uhi.
Glass - Unlikely Bottleneck
June 10 in glass - thawl bawltu company khat, Corning kiang ah US government in a om nailou Covid 19 vaccine, a om chianga hawmkhiakna ading in $ 204 million ana peta. Damdawi koihna leh puakvialna ding in glass naran (silicon dioxide) akizang kei a, achituam khat, borosilicate glass, damdawi toh reaction aom louhna ding in zat ahi. Corning Pharmaceutical Technologies in, kum bangzah hiam azon nungin glass chi khat, Valor glass ana mukhiata. Vaccine puakvelna haksatna khat tuh lum-le-vot ahi. Valor glass in kholum-khovot laka vaccine puakvelna ah phatuam mahmah di’a lamet ahi. Tu in glass kia leng apoimoh zah apoimoh hunin bawlzoh man ahi dia’m chih dotna kin mahmah ahita!
…
Note: Covid-19 hiipi tungtang, eimi doctor te’ thugelh kimu tamlou hi. Bungmual khua a om, heutupa (Upa) Dr Paul Ginthang, hun khat lai a Medical Suptd., District Hospital, Lamka lenkha in a gelh Bungmual Weekly News a kisuah a kimuh ciang in manpha kisa hi. A gelhtu, doctorpu lemsakpihna tawh tu in DEW ah suahkik ahi (beu 4na leh zawhna ahita). Thugelhpa leh simtute TOUPA’N navakna hongpe tekta hen!
