Encountering The Risen Jesus (Luke 24:31-33)

Huan a mit uh a hongvakta a, a mel a theita uhi. Himahleh amah a mangta mai hi. Amau, “Lampi a hon houpihlai a Laisiangthou thute hon hilhchet lai in i lungtang a vakhuai him hilou hia?” a kichi uhi. Huailai tak in, a thou ua, Jerusalem khua ah a kiknawn ua, sawmlehkhatte leh a lawmte omkhawmte a mu uhi.

Jesu sihna apan a thohnawn nung in mi tuamtuamte kiang ah hun tuamtuam in kilak hi. Tanchin Hoih Johan in Thohnawnni zing in hankhuk en ding a kuan Mari Magdalini kiang ah Jesu kilak masa pen ahih dan gen hi (Johan 20:11-18). Tanchinhoih dangte in bel han veh ding a kuan numeite kiang ah Angel-te’n Jesu thou khinta ahih dan gen ua, Jesu kilakna gelhlou uhi (Matt. 28:1-10; Mark 16:1-12; Lk. 24:1-12).

Thohnawnni mah in nungzuite lak a nih Jerusalem apan Emmau lamzuan in zin uhi. Lampi ah a pai lai un thounawn Jesu toh ton in lam tawntung in paikhawm uhi. A tung in Jesu ahih lam theikei mahleh uh a nung in Jesu ahih dan theikhia uhi (Lk. 24:13-35). Thohnawnni nitaklam mah in Nungzuite (Thomas chihlouh) amau kia a om lai un thounawn Jesu a kiang uah kilak hi (Matt. 28.16-20; Mk. 16.14-18; Johan 20:19-23). A kal nawn Seppatni (ni giat nung) in Thomas tel in nungzuite kiang ah Jesus kilak nawn hi (Johan 20:26-29).

Huai nung nibangzah hiam nung in Tiberias dil ah Jesu a nungzuite kiang ah a kilak nawn hi (Johan 21:1-14). Hiai ahih leh nungzuite kiang a Jesu kilak thumveina ahi (Johan 21:14). Hiai nung in Jesu van ah a kah ding kuan in leng nungzuite kiang ah kilak nawn hi (Matt. 28:16-20; Nas. 1:1-8).

Paul in Korinte kiang a laikhak khatna bung 15 chang 3 pan 8 na sung ah, thounawn Jesu kilakna hiai bang in gen hi:

• Kifa (Peter) kiang ah a kilak a,
• Huaikhit a sawmlehnihte kiang a a kilak hi.
• Huaikhit in unau za nga (500) sang a tamzawte kiang ah a kilak nawn a, huaite lak a mi, a tamzaw tutan in a damlai ua, khenkhat bel a ihmuta uhi.
• Huaikhit in Jakob (Jesu sanggampa) leh sawltak tengteng kiang ah a kilak nawn hi.
• Huan a tawppen ah, a hunlou bang a piang, keimah kiang ah leng a kilak hi.

Hiai a Paul in a gente bang hun a tung hiam chih Tanchin Hoih te’n genlou uhi. Pual kiang ah Jesu kilakna pen Damsacus lampi a thiltung (Nas. 9:3-17) ahih kei leh Arabia gam a Jesu toh kituahna (kilakna) nei hi ding hi (Gal. 1:17-18).

Jesu thohnawnna nialvual ahihlouh dan hiaite apan imu thei uhi. Hiai bang a thounawn Jesu toh kituahna a nei mite a hinkhua uh kilamdang vek hi:

• Mari Nungzuite in thounawn Jesu toh a kituah un kipaktak in om a thilmuh nungzuite va hilh pah ding in tai hi.
• Nungzuite lau leh ling in om mahleh uh thounawn Jesu toh a kituah un hangsan tak in Jesu thounawn ahih dan gen ua, a thugin uh sihpih ngam uhi. A ginna uh hihkip in a om ua, Jesu thugente dik a hihdan theisiam un (Johan 2:22) kipaktak in om uhi.
• Paul, Jesu nungzuite thahsawm a panla tu himahleh thounawn Jesu toh a kituah un a hinkhua kilehbulh in Jesu a ding in zawnna, haksatna, sawina thuak in sihpih hi.

Tuni’n, simtute kivel chiat leng uthuai isa hi: Thounawn Jesu toh bang hun in na kituak ua? Na kithuah un nang bang chi in a hon khek lamdang a? Midang enlou eimah mimal chiat kivel ni.