Tulai khovelpumpi a thiltungte’n lungsim hon khoih a, patauhna, thawmhauna leh theihsiam louhna in hon am haisak hi. Tangthu a simkhak ‘hiipileng’ chihte hong tung a hon nuaikh ahitamai hi. Lungziinhuai....
Hiaibang hun buaihuai tak a I dinlai in, Jacob in a innkuante kiang a a thugen a thak in ngaihtuah ni. Jacob a U, Esau lau in gamdai ah taimang hi. Jacob, lungkham mangbatna toh beidong tak a a om lai-a, athiltuahte Jacob in a innkuante kiangah hichi'n gen hi, "I thou ding ua, Bethel ah I paitou ding uh; huchi’n, ka lungziin laia hongdawng, ka Pathian ading in maitam ka doh ding hi,” a chi a (Gen 35:3). Jacob lungkham mangbang leh beidong a, galmuanglou tak a a omlai in a kiang a om a, a thumnate dawngtu kua ahi achi a? A innkuante bang hihpih dinga chial ahia, bang chi a kisakhawl ding in agen a, chihte ngaihtuah thakni.
Tunia galmuanglou, beidong leh lungkham a I omlai in kuan/bang in hon ompih hi'n I thei-a? Ahihkeileh, lametna neinawnlou kisa a, mahni kichimtaakna toh hun I zat leh lauhhuai & lohsap huai mahmah hinkhua zangkha hi ding hihang! Emmau lampi-apai lawmtate’n huai hunlai-a Jerusalem leh asehvela thiltungte leh vaihawmte thil saidante a lamet uleh gintak dan uh banglou ahihmanin, lungsim a mangbang leh thawmhauna toh khualzin lampai ahi uhi. Ahihhangin, Jesu chial ua, a thil etdan uleh ngaihdan uh hihvak in om hi (Luke 24:13-35). Jacob in amangbatlai-a a kiang aom a, athumnate dawng Pa a theihchet bang a, enleng I theihchet leh iinnkuante toh Toupa a ding maitam doh thakni hang. Tuabang a theihchetna neikhalou/nailou I hihleh leng Emmau khua zuan lawmtate bang in tuni'n Jesu chialni hang.
Huan, lungkia leh lamet bei kisakna toh hinkhua ana zangkha I hihleh, Gideon kiang a Pathian in vualzohna mihing hatna zang a pelou ahih dan Laisiangthou ah (Judges 7:2-8) enthakni hang. Huan, kamsang Jeremia tungtawn a Pathian in "Kei mihing tengteng Toupa leh Pathian ka hi. Kei dingin thil/thu haksalua a om ahia?" (Jeremaiah 32:27) chia agente phawk in, athakin Jesu chialni. Amah chialte, i Toupa’n nial ngeillou hi.
Amah chialte I Toupa’n nial ngeilou,
Tuachi'n akiang ua khawl in a ompih denta;
Khamuanna tulthei ngeilou A peta-a,
A kiang uah teeng in A ompih denta.
Hiai thawmhau huai hunah Khasiangthou in, thugelh simtute, hon ompih chiatta hen!…
*Thugelhtu, tulel a Chairman, EBCC Delhi hihna len ahi. A tung ah I lungdam lua hi.
