Leng diamdiam uh houlung tuak in / Lennem Toupa awi in
Hon ngailou in gam siangthou ah leeng uh
Sulkik lellou machiang suan uh / Simlei tuangnung siahna gam hi.
A mi siangthou te sihna Toupa muh in manphapi ahi (Sam 116:15).
Van ni nuai a mimbang piang teng phammoh doh-ai tawi omlou. Pian pumpelhtheih himahleh, sih bel pumpelh theih ahikei. Taksa pumpi sunga sisan luang akhawl chiang, lungphu akhawl chia’n, huai-mi “Si” ana kichi sek. Tu chia’n bel, Ventilator leh vanzat tuamtuamte ziakin: nervous system, circulatory system leh respiratory system tengthum, semthak nawn zoulou, kilehkik zou nawnlou di’a a khawl chiang un, mi “si” a kichita. Huai puangkhe thei doctor-te ahihziak un, innlum a sih, legal taka abuaihuai hun a omthei. Hiaiziakin, innlum a si sang in, damdawi-inn a si I tamzaw ta. A langkhat lam ah, Ventilator leh vanzat hoih taktakte khawng ziak mah in, Sih hun ding sehsa kichi bang le suan gamlat zek theih ahita chi ut pawl bang le a om.
Nidanglai in innlum a lupna tunga sih mahmah ana teel ua. Gamlak khawng a si te, sihdan ngeina lou (unnatural death) teng “Saksi” chi in, a luang uh innsung a puaklut phallou, zekh tuamtuam bulhkhum in, ana *Kunvui* maimah uhi. Tuchia’n bel, Electric, Gari, I neihsate ziaka a le sih theih ahihziak in, mulkimna bang le kiam deuhta abang a, Saksi chih bang le sih dan vaang (omvaang) genna asuak simta. Thugentu in, “Pianni sanga sihni hoihzaw a, annkuangluina inn a hoh sanga suunna inn a hoh hoihzaw a; hiai thu mihing lungtang in a ngaihtuah ding ahi” a chi.
Dr Bernard Lown in ‘The Lost Art of Healing’ ah sih didan deihtel mi tamta ahi, a chi a. A GOOD DEATH, sih dan hoih tuh, a-naa thuaklah vungvung lou, tanau-lainate umkolh a sih ahi a chi. Ahi, gen-gen kholkei lehang le, sih dan hoih, sih didan lunggulh zawk deuh deihthu saam I om di’a; a ngaihtuah vetlou, khat pepeuh poisa khollou le I om ding. Upa lamte bang, Innlum a sih teel ut a tam maithei. Tu chia’n, Death Certificate bawlte’n form leh ngiat tuamtuam anei ua; Insurance khawng hong tamta a. Hattawpna mun di’a innlum vachih teitei le a lemchang nawn chiah kei.
Ei district mi, COVID 19 ziaka Manipur sung kia-a si 179 apha (December 2019 – December 30, 2021). Huaite lakah 145 te Lamka damdawi-inn a si ahi uh. Innsung khaaitu khawng, Kiteen nung sawt nailou khawng, Saptuam keemtu khawng, Ta neu chichik nusia khawng, Tate maban laklohpi sihsan khawng, Doctor chitak mahmah, COVID toh kisai a Lamka doctor te hon na makaih nasan le a tel kha. A sulnung uah meithai lawh, tagah lawh mi tampi a om. COVID tuh poi tak ahi. Naa I sa. COVID ziak mah in veh louh leh zuun louh phet hilou; Saksi bang mai a innlum tawnlou a kivuiliam maimah. I ngaihtuah kik chia’n, ana ngoihngoih hi.
Sawnmon’ seisang tan ding selung geel a / Tunnu mal nua giabang na zuun ngaihna’n
Lengvan khua mual na kaailah hiam pu aw
Khua mual kaikuan na pheiphung neem na’n chia.
1987 a ka Pu’n hon beisan a ka na gelh ahi. Tua gam etlawm a khawl tawldam di hitawk le uh le, pialgal kho-mual a kaltouh chiang ua zaw, lungzuang a akhe uh bang khamh ngoihngoih di’n I suangtuah.
Pathian laa hoihtak ‘The GARDEN’ Jimmy Scott in ana gelh a: Luankhi leilawn tangthei in, Nunlui hon zawlthei leh; Lengvan hong kaltou in, hong piikik nu’ng….
If tears could build a stairway / And memories a lane
We’d walk up to heaven / And bring you back
It broke our hearts to lose you / You did not go alone
For part of us went with you / The day God called you home
Sih dan leh suunna hoih a hinkhua khup miteng aa di’a thil hithei ahimawk kei. Hilele, sih dan nuamzaw deuh leh kikhaak dan lungkimhuai I kideihsak in I lunggulh chiat ding ua. Innlum a haksatak a ki-et liam mai sang in, chi in, naihtheihna munmun I neih uh. Sih dan nuamzaw di’a I geelsak dan pen, a laitah khit chiang ua, sih dan nuamzaw ana hi-na ahih-le-louh, phamsa kuama’n lah hong hilh kik mawk lou. A damlai te’n kikhen dan nuamzaw I lunggulh man ahisim lim.
Gam changkang zaw khenkhat ah ‘Hospice’ a chi ua. Sih dan et nuam zaw, kikhen dan lungkimhuai zaw neihtheihna di’n a damsuah zoulou di te etkol namun a nei uh. Ei aa di’n bel a genthoh mai ahi tadih. I neih dandan, I gam a thil om bangbanga lungkim kisin mah poimoh I hi uh chih I gennop khat ahi.
Sih dan suakthak ana om thethup a. Huai tuh euthanasia a chi ua. Gam khenkhat ah zat phal ahi. Hiai dan in, sih hun di’a sehsa suan-naitheih abang leuleu. Naasa vungvung leh natna lunggimpih diakte’n doctor khutnuai a, damdawi zanga sih didan a deihtel uh ahi. Himahleh, hiai dan a kizatna Netherlands te sui dan in, euthanasia deih te 100 laka 57 te mi-kipesia, 46 te natna thuak zoulou dan in a mu uh. Euthanasia toh kisai a ngaidan 2 omthei te 1997 SSPP Magazine ah ka na gelhta.
Sihna topic lianpi ahia. Sih dan topic a kigelh khe vaang. Ei lak ah tuh si-sunna mahmah a poimoh a, sihdan toh le a tonkhawm sim hi.
Phatuamngaihna I nei nasa ua. Ki-uap khiukheute I hi ua. Hun hon daaltu a bei hun chianga, tenna mun ding, abuaina teng toh pawtsan vengveng a, Tangtawn gam zuan dingte I hi ua. Tunglam a min sapkhawm chianga “Om” chi a ana dawngkaau di’a kisakholte I hi ua. Dimlianching bang in a nungak lai a, si inn lenkhawm nuam salua inchin, ‘misi om nawn taleh’ ana chi kha zezen ahi. Eilawi in sihna, sih dan leh si suundan I etdan uh I sahkhaw biakna in honpii hoih khiakdan tuh, Van kongkhak nasan ana awi te I hi:
Kongkhak ging kilawm ahong ua / A ging lawmnou in lung hon leen
Misiangthou te tualleenna ah / Aw, kei zong leen ka nuam hi
Bob Dylan in “It’s not dark yet but it’s getting there” chi’n ana awi deldel a. Duh-aam ziaka lungsim sia China te ziak bang, natnahik suakthak ziak bang, Sahkhua ziaka kithahna khawng ziaka, a hoihzaw gam zuan a I khualzinna a beima a, kikhenna mulkimhuai zawseem tuak toutou didan in I om. Bangteng hileh, YPA leh Hanmual committee makaih a Si-inn lemkhawm khawng ziak in, Sihdan mah sang in kisuun dan I poimoh ngaih zaw ua. Tawndan hoihpi nei I hi chih le I taklat ut khat ahi nawn. Hilele, ei aa bang tawndan neiloute le ana ki-it in, ana kikhelah mahmah ua. One more Day gelhtu, Laa siam Diamond Rio in, “Ni khat lel, hun khat lel, Nitum in khatvei khawlkhawm le, lungkim ning” chi’n hichi’n ana awi:
One more day, One more time / One more sunset, maybe I’d be satisfied
But then again, I know what it would do
Leave me wishing still for one more day with you / One more day
Johnny Cash in ‘HURT’ laa ana sa a: Lunggel kikham e, lemkhawm theikei ve’ng; Hun in hon khengh dang e, Hon lawng theikei ve’ng, Piandang tangta chi’a, Kei lah dang lou
Full of broken thoughts / I cannot repair
Beneath the stains of time / The feelings disappear
You are someone else / I’m still right here
Lungzuan hun a hiai dan a laa hoihpipi ngaih in hon neemthei a. I omkhawm chiang in bel, I leenkhawm laa te uh kaan a hon neem zou a omkei.
Nichin a tungthak te dawn uh / Nichin lungdam semsem uh
Sih leh kikhen lau nawnlou uh / Tawplou ding nopna tang uh
Tua gam etlawm ah khawl sam ning / Toupa tenna gam etlawm ah
Ka khawl sam ding buaina khen ah / Kei dia tangtawn galmuanna ah.
