“Tu bek a na kiang ua ka hong theihna ding in, Pathian thuthu a zin hun lemtang ka muh teitei theihna ding ka ngen hi.”
Romte 1:10
Kei leh ka inkuante’n EBCC Chandigarh Saptuamte veh thei a ka om man un kipahhuai ka sa a, Toupa min ka phat hi. Amaute veh ding kilawp luatna ka nei hi. Hun paisa ah Covid hiipi ziak in keileng bialte veh theilou leh pusuak theilou in ka station NE Tangnuam ah kum 2020 leh 2021 sung bangtan hiam ka om hi. Hiai bang hun in, Paul tan-inn (jail) a omlai a, a lungput ding dan bang ka ngaihtuah sek hi. Ke’n leng ka bial mite ka muh ut tuntun banah Seppih DS leh Pastorte ka mu ut in ka ngai petmah hi. Tua bang mah in Chandigarh Saptuam-te’n le hiipi ziaka bialtu Pastor kum nih bang a muhlouh nung ua, kei va kilak kha ding kahih man in hampha ka kisa hi. Aziak bel keikia hilou in, amau mah inle hon mu ut ding ua, ana kithalawp ngei ding un ka gingta hi.
March 05, nitaklam dak 1:30 PM vel in Chandigarh lam zuan dingin Kei leh ka Inkuante banah Pa Thangsonmung Munirka toh ka kipan khia uhi. Delhi sung Traffic Jam lua ahihman in, ka telh hetkei uhi. Huchi kawmna pi in, GPS in ka route ding uh a saulam hon set sak kha sawnsawn hi. Lamsau lam 40-50KM kikal khong a sau zaw ding, Rohtak lam tawnkha himahle ung, zaanglou lianpipi mu kha kahih man un, kithaman ka sa veve hi. Ka kigintak sang mah un ka kai zaw ua, Ambala ka tun un khua mialta hi. Himahleh Pa Paukholian-te inkuan in hong lamtan ua, singpi leh nekding bang hong pia ua, nuam tuam in, kipahhuai petmah hi.
Pai zomzel in 9:30 PM nung deuh in Chandigarh ka tung ua, T/Upa Chinkhanmung, Local Secretary leh a inkuan-te’n hon zintun in, ann limtak hon na bawl uhi. Ann ne zou phet giahna ding nuamtak Aayar Guest House ka zuanpah uhi. March 06 zingkal breakfast nekma in Rose Garden ka vapha uhi. Rose a pak saan laitak ahihman in etlawm mahmah hi. Ka lungsim ah “nang ding in rose ka hi zel ding” chih bang hong om thepthup a, Toupa mai ah ka hinkhua Rose pak banga etlawm in pakkhia leh aw chi vongvong kawm in Guest House lam ka zuan nawn uhi.
Breakfast nekhin phet, kikhopna ding T/Upa Chinkhanmung-te’ inn ka delh ngal ua, kikhop hun ding dak 11:00 AM chih himahleh ka pan kai’ zaw deuh uhi. Biakna hun nuamtak in ka zang ua, kikhop tawp in Pa Paukholian, Sepaih ah kum 31 vingveng a pang nunga pension lawpna annkuang kikhawm teng in ka sawk khawm siausiau uhi. Biakna hun ah, Upa Siamnou, Local Secretary, Central Delhi in hon uap khak banah Saptuam sunga member kila lut thak om ziak in kipahhuai ka sa hi.
Kikhop zawh in T/Upa Thangmuan, Local Chairman leh a sungkuante’ makaihna in, Saptuam inn vehna ka nei ua, tua zoh Rock Garden va pha in, ki-thuahkhawmna hun nuamtak ka vazang uhi. Tua zoh Ambala lam zuan in ka tai vengveng ua, Pa Paukholian-te’ inn ah lut in, ka kihah siang ua, singpi dawnkhawm in hun nuamtak Pathian min in ka zangkhawm uhi. Huchi in Pa Paukholian-te’ inkuan toh nitak anne ding leh ka giahna ding uh T/Upa Thangmuante inn ka zuan nawn uhi. Nuam salua kahi ding ua, nitak sawtlam leng phawklou hial in hun ka zangkhawm uhi. Ambala apan March 07 (Seppatni) zingkal dak 8:30 vel a kipan khia in, Pastor Quarter Kishangarh dak 2:30 PM vel in Pathian pina toh damtak in kong tung kik uhi.
Chandigarh veh ding ka kithalawp mah bangin Pathian min a kivehtuahna nuam ka sa mahmah uhi. Banah kivehtuahna in gingtute tha hon guan ahihdan ka chian semsem hi. Saptuamte vehna keikia in nuamsa hilou in, veh a omte’n leng nuam sa in, kipak mahmah uh ahihdan muh theih a’ a om man in, Toupa thupina ka pia hi.
Toupa’n a min a kal i suannate hon zatsak zel in, midangte hanthawn na bang in na zang zel hi. Huai mah bangin Toupa bia ding a kal i suanna-te’n midangte thapia ahi chih manghilh kei leng ut huai ka sa hi. Biakinn a i kikhop lel inleng mi kua hiam tha pia a, i kikhoplouh in thanem sak thei chih i phawk uh ka deih hi. A kilamtou tuah dingte i hihman un Pathian min a kalsuanna, biakkhawmna chihte’ ngai poimoh semsem ding in ka hon ngen hi. Toupa’n simtute tengteng hon vualzawl chiat hen! Amen.
