EBCC-CD 10th Anniversary 25-26 April 2020

Evangelical Baptist Convention Church, Central Delhi @EBCC-CD 10th anniversary 25-26 April 2020 online tungtawn in zatzoh in omta hi. Eite honkem tawntung Toupa Pathian tung ah kipahthu gen in thupina tengteng Amah i khusak hi. Lockdown ziak in I kisakkholhnate khekkual bang hongngai a, biakinn a zang ding a I kisaknate ahi theitan online lamah hei hongngai hi. Bangkim Toupa thu ahihdan hong lang ahimai a, mihing kisakkholhna Toupa’ dawn dandan a pai ahihdan hong chiang mahmah hi. “Huchi kei leh zaw,”“lockdown om kei leh zaw…,” chi a ngaihtuahna khat veivei bang a saupai chiang in lapawlpi kisa ding kisa khalou leh item tuamtuam hunkhopte bang bilkha ah za in duh-am huai thei lailai hi. Himahleh I tan bangbang Toupa tung ah I vui kei a, hiai program honzat sak dan ah lungkimhuai I sa veve hi.

Anniversary Celebration Sub-Comittee panlakna toh program zat dan tomkim hiai bang ahi:-

• April 25, 2.00PM hong gin kal ngaklah tak in ki-om a, 2pm hong gin toh kituak in dakpi 10 vei hong ging ziahziah hi. Local Chairman in mipite muakna greetings honnei a, Saptuam hong kipat dan tomkim genna nei hi.
• Upa Khamkhansuan Vice Chairman in paimasate suunna hun honneihpih a, Local Pastor in thumna hun hon nei hi.
• Lapute’n anniversary lapi “Pa Thunna Ka Thuak lai in... (Pngla. No.159)” honpi in, mipi’n le ommun chiat ah kilawptak in hiai la kisa zuazua a phatkhawmna leh kipumpiakna hun kinei hi.
• Local Pastor in 10th Anniversary Souvenir 2010-2020 “Isak Maitam – 10 Years of God’s Faithfulness” kichi honna leh latna hun hon neizui ngal hi. Hiai Souvenir ah Greetings - Rev Paukhanmang Guite, GS EBC Hq, Pastor H Thangchinkhup Local Pastor, Rev V Nenglian, DS, Imphal Divn, Rev G Kamzamuan, DS, Vangai Divn, leh Upa Ngulminthang, Chairman, EBCC Delhi apan tuang hi. Hiaite banah thugelh Saptuam tangthute, Toupa’n lampi hontotsakte apan thilmuhte leh Pathian thupina thute tamtak banah lemlak leng tamtak tuang hi.
• Toupa phatna Special number BCD apan om in naupangte’n siamtaktak in Bible chang genna leng hon nei uhi.
• Huai banah message thu manpha taktak, sau loulou Rev Kamzamuan Guite, Rev V Nenglian leh Pastor G. Khankham apan ngaihkhiakna neih ahi.
• Huchi in special no. kilawmtak Florence Nenem leh alawmte apan ngaihzui ahi.
• Rev K Kamchinkhup Director Missions in “Isak Maitam” (Genesis 22) chih thupi a nei in thugenna nei hi.
• Mipi’n kilawptak in phatkhawmna "Hun hiai tan honpi" chihla ommun chiat ah kisa khawm zuazua hi.
• Upa John Thawmte in Pathian kiang a kipahthugenna, thumna leh Benediction genna hon nei in ni masa ni program zoh ahi.
• Ni nihna April 26 @2.00PM hun, hiai bang a zat ahi – Lapite’n anniversay lapi “Pa Thunna Ka Thuak lai in” chihla siamtak a honpi in, mipi’n om mun chiat ah kipaktak in ana kisa zuazua hi. Thilpiakte latna Local Pastor in hon neizui ngal hi. Local Pastor H Thangchinkhup in “Isak Maitam” (Genesis 22) chih thupi a nei in, I Pathian a muanhuai dan, hinkhua a a’ tuahkhak khenkhatte khawng tel in thugenna hun manpha tak mai honzang hi. Lapite’n “Jesu muan a lungdamhuai pen (Bnl No. 165)” chihla siamtak a honpi in mipi toh sakkhawmna om hi. Local Pastor in vualzawlna benediction gen in program zoh ahi.

EBCC-CD hong piandan tomkim:-

• TBSUC pha sakna toh Pastor Khamkhanchin Ngaihte makaih in Ministerial Committee (MC), EBC Delhi tutkhawmna nisim November 15, 2009 a kinei, Saptuam biakna thak pat ding a kalsuan kipan. Huai hun in Pastor Chin akisuan hong hun a, amah thakhek ding in Pastor V Nenglian, January 7, 2010 ni in Delhi hong tung hi.
• TBSUC in Pastor Nenglian makaih in March 20, 2010 ni’n Saptuam thak enkol ding in TBSUC leh TBMC member omsate apan mi 8 lakhawm in COMMITTEE thak phuanna nei.  Member 8 te - commissioning service April 4, 2010 (Easter Sunday) ni in EBCC Delhi ah nei ngal ua, amaute: Upa Tualzapau – Chairman, Upa G. Jamkhothang - Vice Chairman, Pa Kham Khan Suan – Secretary, Pa Pumchinkhup Guite - Asstt. Secretary,  Pa K. Biakkhanmang - Finance Secretary (Local), Pa T. Thanghnun - Finance Secretary (1/10), Pa H. Chinzason – Treasurer leh Pa K. Thangzalun - Member.
• Pastor V Nenglian makaih in Committee in meeting masa April 8, 2010 ni a nei in, saptuam thak min ding in “EBCC, Central Delhi” chih phuankhiak in om. Kikhopna masa April 25, 2010 ni a B M Gange Girls Sr. Secondary School Hall, Raj Niwas Marg, Civil Lines a neih pat ding in thupuk hi.
• Saptuam thak member ah, naupang simtel in milip 283 pha hi. Amaute - Upa Orden~2; Papi ~ 35; Nupi ~ 39; Pasal Tuailai (single) ~ 79; Numei Tuailai (single) ~ 86, Naupang ~ 42
• Pastor Nenglian in Saptuam thak EBCC Central Delhi, EBCC Delhi toh July 2011 tan puakhawm hi. Pastor Kamzamuan July 22, 2011 in hongtung a, ama’n January 2017 tan Saptuam kem hi. Pastor H Thangchinkhup January 9, 2017 in Delhi hongtung hi. Ama’n tuni chiang dong in Saptuam kem hi.
• Kum 10 sung a Saptuam member record hiai anuai a bang ahi:-

April 25 ni a Rev K Kamchinkhup thugen laktom:  Abraham ze-etna khedap bun in kingaihtuah lehang, kap kawma,“Hithei lou, hithei lou…” chi ding in ka kigingta hi. Himahleh Abraham in hithei lou chi lou in, a zingchiang beltak in zingkhangpi in athou a, chih i mu. Ni thum lampaina Moria manoh a pai lai in, angaihtuahna ah bang a om maizen di’a aw? Ut kei leh kinung hei a lampi dang a pial theihna hun atamtam ding toh, ama’n ginna kiptak nei in paisuak a lampi ah akhawl kei. A tapa in, “Pa, nidang a i hoh chiang in lah agan di toh i hoh sek a” chi in a dong ding a… Abraham in, “Toupa’n a belam ding ngaihtuah tawm nave” achih lai in a’ lungsim ah bang angaihtuah di’a?... ei hilehang kinunghei a, “Bawi, ngaihdam” khawng i chi di’a, I kap dia, i taise ding... Eite’n family first i chi sek a diklou deuh om hi, bang toh teh in, chih in thu paw ding hi..innkuan leh society et in tuh innkuan amasa ding a.. innkuan toh Pathian kaal ah bel Pathian a masa ding hi. Abraham ze-etna maituah, pasal zoh louh a puk mai abaihlam chi mahmah hi. Enle ze-etna ziak a Toupa i na taisan leh, “E, maizen!Toupa haksatna hong tun chiang a, haksa sakluat ziak a hon taisan kha ka hi…” chi in Toupa kiang kikthak leng, i chi ahi. Hebru gelh in Isak a sisa thounawn bang in gelh a, Abraham in tuh Pathian kianga a piakkhiaksa ahi...Abraham in pekhia, hilele thounawn toh kibang in Pathian in pekik ahi.Lankhe ngam peuhle, Toupa honpekik dia mansa Jehovah Jireh, I taksapte honpe di’a mansa ahi. Saptuam kum 10 i pai a, maban ah leng saupitak paina ding nei lai I hi a; maban ah leng haksa i paltoulai ding. Toupa’n huai hun chiang a hon dot nop tuh..“Nahon it hia?” chih ahi. Na it pen na peta hiam?  Ei le Abraham bang a ze-etna i tuah hun a, ding tang a, “Nang nahi ka Pathian” chi a, “ka Saptuam adi’n Jehovah Jire, ka mimal adi’n ka innkuan adi’n Jehovah Jireh” chi a, Isak maitam ah, “Toupa ka bangkim ka lan di” chithei chiat ding in, A’ Thu Toupa’n I tan chiat ah vual honzawl sak hen!

TOUPA’N hunthak lametna thak honpe zel ding a, Saptuamte kituak dialdial a mailam nawt khawm thei zel ding a honpi ding in Amah i muang hi.  Isak maitam a kilan thei chiat ding in Toupa’n 10th Anniversary tungtawn in kuapeuh A Khasiangthou in hong pawl henla, Toupa kia in thupina tengteng tangta hen. Amen.