Thupatna: Tuni’n Delhi a tuailaite’ hiptu khemnate leh a douzoh diingdan chih thu- pi gelh thei dia hinna damna hon pia i biak Pa Pathian tung ah kipahthu kagen masa hi. Banah, simtu tengteng i Toupa Jesu Khrist min in chibai aw!
Tuni’n delhi a tuailaite’n lungsim a ngaihtuah masak dia poimoh bel Hiptu khemna ituah chiang ua Pathian hon sawina hipah lou ahih dan chiang masa leng hoih mahmah ding ahi. Hiptu khemna ituah na ziak ahihleh “Michih amau utna a pimang leh hip a a om un khemna tuak uh ahi zaw hi” (Jakob 1:14). Banah hip- tu khemna i tuahte’n bang etsak nei hiam? Huaibel, i ginna uh ze-etna leh huai ze-etna in kuhkalna siam ahih dan i theih chet na ding ua hiptu khemnate tuak hizaw ihi (Jakob 1:2).
Hiaite banah delhi a tuailaite’n hiptu khem- na i tuahte uh a kibang kim vek kei ding. Banah, ah word limit hong kipiak ziak in hiptu khemnate a vek in i gelh kim zou kei ding. Hi- mahleh, delhi a tuailiate’ lak a hiptu khemna poimoh diak hi dia gingtak khenkhatte ahi- hleh ‘Dikloutak a sum muhna (Scam) a sep poisak louhna, enna (mite bang a neizou ki- sak louhna), lawm-le-vual kal sianthou louh- na (nupa hilou nupa bang a omkhopnate) ahi.
Huchi ahih lai in i Laisiangthou in ‘khemna’ achih te bang chi bang khemnate hi hiam?
Huaite, bel 1John 3:15-17 ah hichi’n ana gen hi. “Khovel it kei unla, khovel a thil omte leng it sam kei un. Mi kuapeuh in khov- el a it Khovel a thil om tengteng sa ut- nate, mit utnate, damsung thupina limte khawng Pa a kipan ahi kei a, khovel a ki- pan ahi zaw ngal a, Khovel a utnate toh, a mangthang lellel ahi. Pathian deihlam hih mi bel khantawn in a om gige ding hi.”
Awle, tunia thupi a hon kipia “Delhi a Tuailaite’ hiptu khemnate leh a douzoh diingdan” Ja- kob 4:7-10 pansan in point thum i en diing uh. Huai ma in “Tuailai ichih bang hi hiam”? chih i en masa lai ding. Tuailai ichih chiang in bel kum ‘18-40’ mite huamkha ahi. Huailouin, Tuailai ichih nawn chiang in bel khovel a i hin sung a hunbi poimoh mahmah thum omte lak a khat ahi. Hiai tuailai hun pen lungsim hat mahmah hun, thil thak tampi zil hun, a hoih-lehoihlou lampi i tot hun, sep ding bawl ding om chiang a seplah neihlouh hun leng ahi. Huchi ahih lailai in hiai tuailai hun pen melmapa Satan in leng a deih mahmah hun leng ahi.
Delhi a tuailaite’ hiptu khemnate leh a dou- zoh diing dan ‘Khatna ah’: “Pathian thuthu a om ding” (submit yourselves to God): Path- ian thuthu a om ding ichih chiang in bel Path- ian khut a kikemsak, kitulut leh kei thu hilou nang thu hizaw hen chih theihna pen Pathian thuthu a om chihna ahi. Huailou in ‘Pathian thuthu a om ding’ ichih nawn chiang in bel gingtu Khristian khat ‘Kisikna’ (repentance), lungsim khek (change of mind), kia in a hun kei hi. Hiate banah ‘I ngat na lam leng i khek (change of direction) kom a Pathian mai a kingainiam tak a om in hon zuih ngai ahi.
Hiate, banah ‘Pathian thuthu’ a i om nawn na di san bel Khovel dan bang a omlou a, Path- ian a dia kithoihna hing siangthou leh pom- tak i lat theih na ding ua Pathian thuthu a om ding hon ngiat ahi (Rome 12:1-2).
‘Jesus Khrist’ gamdai ah ni sawmli leh zan sawmli kha pii in a om hi. Huai hun in khemna chi thum a tuak hi. Khemna khatna ‘Pathian Tapa na hih leh hiai suang tanghou suak di’n thupia in achi a, khemna nihna ‘Hon bia inla, a vek in nang a ahiding achi a’, khem- na thumna ‘Pathan Tapa na hihleh, hiai a kipan in kekhe suk in.’ Himahleh, Satan in khemna dingteng a khem khit in a lemtan hun chiang di’n a pasianta hi (Luka 4:1-13). Bangziak a Jesu Khrist eimah banga ‘Za -a-Za’ mihing himahleh hiptu khemna apat vualzou hiam? Aziak bel bang dang ahi kei a ‘Pathian thuthu a a omziak leh Pathian toh kichimat a om gige ahihziak ahi.
Delhi a tuailaite’ hiptu khemnate leh a dou- zoh diing dan ‘Nihna ah’: “Pathian naih ding”: Bangziaka Pathian i naih uh ngai hiam? A ziak bel ei hatna, pilna siamna a hip- tu khemna douzoh vual hilou ahi. Hilehleng, Pathian i naih chiang a huai hiptu khemna apan vualzohna/taikhiak na lampi hon bawl zaw ding ahi “Mihing thuaktheih val khem- na himhim na tung uah a tung ngei kei hi. Pathian zaw a muanhuai ahi, ama’n na thuaktheih val uh khemna na tuah uh a phal kei ding; na thuak theihna ding un khemna peuhah taikhiak na lampi a bawl pah zaw ding hi” (I Kor 10:13).
Hiaite banah ‘Pathian Naih’ theih na ding dan bel ‘Laisiangthou, Thumna leh Biak- na-lePhatna’ tungtawn a Pathian naih theih tham ahi. Himahleh, hiaite kheng lam pek a Pathian naih in a gen ut bel ‘Khut silsiang ding, lungsim thuah neiten lungsim hah siang ding leh lungsim thuah neih louh ding’ (Jakob 4:8) huchi hileh Pathian toh kinaih semsem a om ding ihi.
I Laisiangthou in ‘Khut silsiang ding’ achih na san bel i ‘khut’ pen Pathian adia kihhuai thilte va lak leh va sawk na dia zat a neikha ihihleh huai pen Pathian mitmuh a sianglou ahihziak a silsiang ngai ahi. Banah, i khut pen Satan vanzat dia phallou (withdrawing them from all evil), huchi lou a Pathian ki naih thei- lou ding. Aziak bel amah siangthou Pathian, aman nang-le-kei siangthou dia hon lamette ihi. “Noute na siangthou ding uh ahi, kei ka siangthou ngal a, chih gelh ahi” (1Pet 1:16).
Hiate banah bangziak a ‘lungsim thuah neit- en lungsim hah siang ding’ chi hiam? A ziak bel gingtu Khristian khat in ‘Satan nna leh Pathian nna’ sem kop thei lou te ihih ziak uh ahi (Matthai 6:24). Huaiziak a, hiptu khemna apat i vualzoh na dia ‘Khut silsiang ding, lung- sim thuah neiten lungsim hah siang ding leh lungsim thuah neih louh ding.
Huailouin, Pathian naih ding bangtaka i naih zoh louh chiang in midang khelhna muh a baihsam mahmah mai, mahni thulou thu sakna hong lian hiaihiai leh midangte sang a khalam a hat zaw bang a ki koih khak baihlam mahmah leh hiptu khemna apat puk baih sam mahmah ding hi. Himahleh, Pathian i naih semsem chiang in bel mahni khelhna mu chiang semsem ding hang a kisikna lungsim kinei thei ding hi. Aziak bel khial mangthang ding Khrist vaang a hotdam lel hih dan hon phok sak semsem in huai in Pathian naih utna lungsim hon nei sak semsem ding leh hiptu khemna a pat puk louhna dia lampi hon lamhilh tu leng ahi.
Delhi a tuailaite’ hiptu khemnate leh a dou- zoh diing dan ‘Thumna ah’: “Toupa mitmuh a ki ngaineu ding”: Hiaia, kingaineu in a gen ut san bel ‘Jesu Khrist’ toh kichimat mite’n Pathian mai a khial hotdam lel ahih dan phok sak huai in kingaihneu na lungtang pia huai gen hizaw ahi.
Hiaite banah, Khristian diktakte’ hinkhua a ‘Kipahna’ (Joy) om pen khelhna i taisan/ nawlkhin zoh ziak ua kipahna om pen gen hizaw lou ahi. Himahleh Pathian khelh ngai- hdamna tungtawn a kiphana taktak hon om pen gen hizaw ahi.
Joseph in a hinkhua ah haksatna leh hip- tu khemna lam chiteng ah a na tuak toutou ahi. Nikhat liai tuh a Pu Potiphar ‘Zi’ in luppih dia ana zot lai a, Joseph in a nial a “Joseph in bang chin khelhna liantak hih in Path- ian tung ah ka khial theidia” ana chi ahi. Bangziak a Joseph in hiptu khemna liantak ana taisan (overcome) zou hiam? Banah Ai- gupta Ukpa (Prime minister) tan a a dopsang a om hiam? A ziak bel bangdang ahi kei a ‘Jo- seph kiang ah Toupa a om gige a (Gen 39:2), Joseph leng Pathian toh a tonkhom gige ziak leh Pathian thuthu a omdan a venghoih ziak ahi. Sam 119: 9 “Valnou in bangchi’n ahia a om- dan a hihsiangthou ding? Na thu bang zel a a omdan venghoih in.” Hiaite ziak a Joseph in a hinkhua a Hiptu khemna douzou ahi.
Thukhitna: Tunia delhi a ka tuailaipihte’n i lungsim ua theih dia poimoh bel leitung a i sep bangbang Pathian in nikhat ni chiang vai- hawmna ma a hon pii ding ahih chih phok- thak ni.
Banah, i hinkhua a hiptu khemna apat vualzoh na dia poimoh bel ‘Pathian thuthu a om ding, Pathian naih ding leh Pathian mai a kingaineu ding. Huchi hileh hiptu khemna apat vualzohna hon pia ding ahi.
