Saptuam masate leh gingtu masate’ ki pii dan lam chi teng in chihtakna leh Jesu kihtakna toh ana khosa uhi. Kum tamtak paisa in pilna-siamna hong sang in khotang, saptuam leh a dang dang ah khantouhna nasatak mit phiat kallou a hong tung hial khop in a ki-lang hi. Tuailaite lak ah thil muh thak leh ki-khekna tampi muh theih in om a a diak in New Delhi ah om Lamka khotual suak mi leh singtanggam a pan a Delhi zuan tuailaite’ khosak dan toh kisai saulou gen dia hong kisa kahi.
i) KI-NGAIHNA NIIN:-
~ Khosakna a nop zawk deuh na mun Delhi ah tuailai te’n theihlouh kar in sa-utna su- buching in nupa kar thaangtatna ah a ki-bual ua zawlmit a ki-en in ki-chei dan a kaan-a-val om leh tumlam gamte’ chiindan hoihloute chiing in namdangte’ a ding a thaangbawlna ahi kha uhi. Nupa kar a kipolhna pen Pathian in siangthou a a bawl ahihlai in sa-utna ziak in tuailai te’n a ngaizam kha sek uhi. (1 Korinte:6:18-19) “Kingaih taisan un. Mihing thil hihkhelh chiteng pumpi polam ah ahi; mingaihhat in bel amah pumpi tung ah thil a hihkhial a. Ahihleh, na pumpi uh, na sung ua om Pathian kiang a kipan a na muh uh, Kha Siangthou temple ahi chih na thei kei ua hia? Noumau a leng na hi kei ua, man a leisa na hita uh”.
Chiindan hoihloute tawpsan a Pathian’ lampi te zong ding in Toupa’n hon deih ahi (Galatiate:5:16). “Na piankenlui uh, na nidang lai hindan uh segawpsa suahkhia unla,…Pianken thak, diktatna leh sianthouna a Pathian batpih a siampen silh un” (Ephesate:4:22;24).
ii) GUIHTHEIH THILTE:-
~ “Huan, Aron tapa, Nadab leh Abihute’n a mei lakna uh a la tuaktuak ua, huai ah mei- am a koih ua, gimlim a buak ua, a thupiak louh pi in TOUPA ma ah mei zat louhchi a lan uh. Huchi’n TOUPA ma a kipan in mei a hong pawtkhia a, amau a kanglum a, TOUPA ma ah a sita uh” (Levetikas 10:1-2). Pathian zahtaklou a thil chiin hoihlou nei kawm in Amah biak khak theih ahi. Khamtheih- guihtheih (intoxicants) tuamtuamte thil hoih bang a lungput (attitude) nei in, ngainep tak in tuailaite’n hiaite thil chiin a nei kawm in Pathian a bia uhi.
Tuailai tamtak hiai thaang ah a awk ua gawtna tawpkhawk (Ultimate punishment) tuah theih ahi hi. I thil chiin hoihlou uh taksa susia leh sihna tanpha hon tuntu khamtheih -guihtheih te tawpsan ni. Laisiangthou sung ah hiai bang te hih in-hih ken, huai te ne in-ne ken chi a a kim sip sip in hih ding leh hihlouh ding thumal hiam thuvual hiam ki-gelh lou mah hi.
Ahi a Paul in Korin saptuam te’ kiang ah “Kuapeuh mah in Pathian temple a hihsiat leh huai mi tuh Pathian in a hihse ding; Pathian temple tuh a siangthou ngal a, huai temple tuh noumau na hi uhi” (1 Korinte:3:17) ana chi hi. Khrist nungzuitu khat a di’n siangthou hinkhua zat a ki-phamoh hi. Taksa kem siangthou a chidam-hinkhua (Healthy lifestyle) zat gige pen Toupa’ deihdan ahi. Thupil in “Cleanliness is next to Godliness” ana chi hi.
Dotna khauhtak dawng di’n na kiman hia? Bangzah vei na biakbuk siangthou sung niin paihna di’n nana zangta? Bangzah vei pharisai te bang a midang te musit kawm in thumna na neih chiang in midang te sang a dik jaw leh bangkim Toupa’ deihdan hih kha jaw a ki ngai in amah na bia a le? Mihing pumpi I taksa pen Pathian’ temple ahihlam mangngilh louh ding ahi.
Pathian in hon sungten theihna ding in lungsim siangthou tak toh I khelhna te thupha tawi kawm in Pathian zuan le hang Aman hon ngaidam ding ahi. (Ephesate:4:22;24) “Na piankenlui uh, na nidang lai hindan uh segawpsa suahkhia unla,…Pianken thak, diktatna leh sianthouna a Pathian batpih a siampen silh un”. “Ahihhang in i tatleknate ziak in amah liam in a om a, i thulimlouhnate ziak in vuak sidup in a om a: i lungmuanna ding in sawina a tung ah a kia a; a vuakna golhte a hihdam in i omta hi”.(Isai:53:5)
iii) SAPTUAM KI-UANGSAK TE:-
~ “…while in poorer countries in recent decades there has been the opposite temptation to wed the Christian gospel with Marxism, to produce a politicised liberation theology” (THE DEFINITION OF CHRISTIANITY
by Myrtlefield encounters). Saptuam toh kisai tuailaite lak ah ngaihdan diklou tampi hong lut a amau te khempuk a a omna uh hiai pansan mah ahi.
Ulianpi te’ vaihawmna nuai ah saptuam milipte’ thu bangmah a simlou a bang kikhekna tungthei om hiam chih ngaihtuah sese lou a mahni deihdan kia a nungta heutu I tamluat ziak uh ahi. Bang chi leh hiai toh kisai sukbei in a om thei diam chih ngaihtuah tham ching mahmah hi.
Sawltak Paul in Galatia saptuamte’ kiang ah laithon a khaklai in saptuam heutu lian te’n nang chihtak in a nang ua thudik gen a saptuam sung ah gindan-diklou lut te sukbei sawm a Gospel thutak mah a tangkoupih ziak in a sawltak hihna a dem uhi. A huchih tak in Pathian’ min in tangthupha a gum hi - Apologetical nature (Galatiate 1:1-2;11-12).
Saptuam toh kisai lungput diklou te khek ahihtheihna ding in saptuam mahmah in leng a pumpiak (sacrifice) ngam ngai tampi om hi. Saptuam paidan diklou te vei law selam a khalam bah di hial khop a lametna himhim neilou a tuailaite omlouhna ding in thum gige ding ahi. Toupa kiang ah I haksatna te tut gige ding ahi.
v) MAGIC AND THE GOSPEL:-
~ Tunai zek in tuailaite lak ah sahkhuate (religions of the world), mitkhial dawite (magics), aksi lamdang telsuina (astrology) leh telsuina in a bat phaklouh thilte (paranormal things) ah lunglutna a khang mahmah hi. A mei-a-pa in banghiam lungsim ah khalam thawmhauna (spiritual vacuum) ki-tasam ahi chi in kilkawi teng ah khalam taksapte zong in beidong tak in a om uhi.
Hiai toh kisai in a kum a sim salam poimoh telsuinate (materialistic philosophy) in kalh leh kinialna (debate) thupitak a piang sak lai hi. Zanzek thil te (Things from past decades) gentak louh in tulai in tuailai tamtakte buailouhna di pi ah a buai uhi. Lungmuanna zon chihtak in a zong uh a, a bukim lou khalam leh lungsim lam pilnate ( limited philosophy and world psychology) thupi bawl in tuplouh pi’n khalam bah kisa in mimal lungkimna leh ngaihtuahna chiimtakte ah a kinga kha uhi (principles based on rational thoughts and philosophy). Saint Francis in “Hon suaktasak ding thutak zong unla, Gospel mahmah in leh hiai suahtakna in Itna zalenna hon pia hi” ana chi hi.
Ahia mihing lungsim in a batlouh van pilnate leh khalam thil te toh kisai tuailaite’n haksa asa uhi. Huchih ziak mah in tangthupha in a hon piak thupha (tidings of the gospel) dau lua hikha ding chi’n ngaihsutna a nei zomah uhi. Jesu Khrist, Sawltak masate leh tulai sahkho makai tuamtuamte a ki-khiatna om kei chi’n thukhitna a bawl uhi. Setan khemna hong hat hiai ding ahihman in pilvan mahmah ding ahi. Ahoihlouh dan innkuan chih ah nu-le-pa te’n leng a tangkoupih uh a kuul a theihna tawm nei a ki-sak uleh ki-sin uhen. Pathian’ deihdan huai mah ahi. Tui lian in a taihmangpih dek naupang’ tung ah a chitlouhnate gen ek ek sang in a hunlai tak a tui leuh ngam kisin a va hotkhiak kul hi.
Peter lungsim di ngaihsun mah dih ua “Huchi’n Jesu’n amah a na en a, Johan tapa Simon na hi, Kifa a hon chi ding uh, a chi a (huai tuh Peter chihna hi)” (Johan:1:42). Huchi’n Peter tuh nga mat a sunzom zel a Jesu’n a nungzui di’n a sam hi. Peter in Jesu tuh Khrist Toupa mah ahi chih a puan zak nung in Jesu’n “Huan, k’on hilh ahi, nang Peter na hi, hiai suangpi tung ah ka saptuam ka lamtou ding a, misi khokulh kongkhakte’n huai a zou kei ding” a chi hi (Matthai:16:18). Jesu Khrist thum vei ki-theihmoh bawl di pa, namse mahmah leh laisiamlou ngabengmi’ tung ah Toupa’n bang ahia hichi tuk a muanna a koih? Bang iitna hi tel hiam?…
Nang hi le chin Peter na tel mah diam? Thum vei mawng mawng hon ki-theihmoh bawl nung in leng amah toh ki chimat tak in na om ut lai lai diam? Jesu’n Peter tel mah veh aw, ki- chimat tak in hinkhua zat khawmpih in ompih mah veh. Jesu’n a hon taisan kei a hon ompih den hi. Hiai tangthu ah sinlai om tuh ~ Pa-ta ki-tanauna (parent - child relationship) ahi.
Bangziak a tulai tuailaite phet lou a naupang chik chik te’n thawmhauna hinkhua zang uh ahia? Milak ah kum ngamlou leh kamteh ngam ngeilou uh ahia? Thawmhauna hubing tu Jesu Khrist ahi a, nu-le-pa te’n mohpuakna lianpi nei ahi uhi I tate’ ah lamet ding bangmah a omlouh lai in leng Jesu Khrist iitna koppih a iit ding in Jesu’n hon sinsak ahi. Lungsim lam suina khovel in a hon piakte ah a tawntung a ki-ngaknataak ahihlouh dan tuailaite’n a theih uh kuul hi.
1Innkuan, khotang leh saptuam ah ki-khenna lamdang tak a tun theihna ding in tuailaite’ aw ngaihkhiat ki sin thei le a deih huai mah mah hi. Himahleh Pathian’ deihdan tellou a ut teng gam gen leng dik zel lou ahih man in, dohzou tak a om hun bang le ngai a, pau louh hun bang le om zel ngai mah hi. Huai di’n Nu-le-pate leh lamhilh thei ding Pathian’ mizatte bang ahihkeileh leh pilna-siamna nei te ki-singsa uh henla thathak la uhen chih ka thuumna la ahi. Tuailai te’n leng Toupa’ kiang ah panpihna a nget uh poimoh ahi. Nang na muanhuai mah hia? Muanhuai lua. Himahleh Toupa’ hatna ziak liu liau in hot zohpih thei ahihman in, thathak la di’n hong ki thawi in! Hanlung chiam in! Na ta manpha lua ahi, khahsuah ke’n.
Laibu ette: #the Holy Bible - Paite O. V. (Re-edited) BSI Version #the definition of christianity - Myrtlefield encounters #releasing your child’s potential - Sylvia Claire # khristian biakna - Rev. Dr. S Langzakham #pastoral care and counseling - Rev. Dr. G Khamkam #kalbi - reboot lamka #korinthte kiang a laikhak khatna - Rev. Ginmalsawm #integral mission - Grace Ngaihvung #khristian innkuan - Rev. Paukhanmang Guite #the seduction of our children -Neil T. Anderson & Steve Russo
