Khemna ichih bang ahia? Khemna koi a kipan hong kipan hi a, atup bang hiding ahia? Ze-etna leh khemna ichih kibang mah ahi diam? Tuailai’ hun ah khemna bangziak a tam diak hiding ahia? Bangziak a Delhi khopi ei gingtute a dinga kidouna phual lianpi/gaal muanlouhna mun suak thei nak hi hiam? Khemna toh kidim khovel ah vualzou hinkhua bang chi’n izang thei dia?
Awle, Khemna tuh ze-etna chikhat, sia leh pha theihna tungtawn a, i deihteelna setan lam ah hon thununtu khat ahi hi. Jakob 1:14, “Mi tuh amah utna’ pii leh hip a aom chiang in, Khemna tuak a; mattang a om ahi zaw hi.” na chi hi. Khemna hong kipat dan, Genesis 3:4-6 kikal in muh theih hi. Setan in mihing’ lungsim zou thoh mahmah ding thu ava zat khat ahihleh; sing gah nek tuh Pathian batna ding chih ahi hi. Huai omzia bel, na Pathian utoh dinmun kikhat a om ding na hihman un, Amah poimawh nawnlou ding chihna toh ki lamdang hetlou hi. Hiai bang khemna mihing adi’n utlouh vual hilou ahih manin, puuk peetmah ua, Pathian toh akizopna uh kitan hi.
Khemna leh Ze-etna chih kammal kinai sim mahmah abat lai un, ana kibat louhna uh om hi. Ze-etna peuhmah khemna ana hivek khollou hi. 1 Peter 1:6-7 ah, “Tu in sawtlou kaal sung, se-etna chiteng thuak in, lungkham tadih mahle uchin, hiai thu ah naakpi takin kipaak un. Hiaite tuh dangka-eng, mei a haalsiang nung a leng mang theilai sanga leng manpha zaw, na ginna uh ze-etna diing a hong tung ahi. Huchi a atak ahi chih chet a aom a, Jesu Khris hong kilaak chianga phatna, thupina leh pahtawina na tan theih na diing un.” Hiai a pat chiangtak a ze-etna thiltup muh theih a omtuh; i ginna hih hat na ding, ginna kip muh suah na ding ahi hi. Khemna pen puuksak ding tupna setan’ vanzat ahi. Himahleh ze-etna bel hih haatna dinga, Pathian vanzat ahi.
Tuailai’ hun laisiangthou in ana gen poimawh hi. Paunakte 20:29b –“Tangvalte’ thupina a haatna uh ahi a,”. Hiai ah hatna pen taksa leh lungsim lam hi a, mihing hinkhua ah nak poimoh lua hi ahi. Kumpi Solomon in, Sam 127:4 ah, “Haatlai a tapa neihte tuh, gaaldoumi’ khut a thaltang bang ahi uhi.” ana chi hi. Thaltang in ngim khak sak a a-om na lam lam tuh khoh suk ahihman in, a kaaptu’ adiing in vualzohna atut theih kawmkawm in, sihna leng tun thei hi mawk hi. I tuailai’ hun tuh, paak apaallut lai bang toh kiteh kaak thei hi, huai hun in, agim nam hat diak, et lawm in vehtu diing leng ahauh hun pen ahi. Tua mah bang in, i tuailai’ hun sawt hetlou hinapi’n, ithiltuah leh imuh te nak tam mahmah a, khemna chichih, lam tuamtuam ah hong pai hi.
Khovel khantouh dungzui in khemna hong paidan leng kibang vek lou a, huai mah bang in, i omna, ilawm polh leh imihin zia atuam dung zui in khemna hong paidan tuak chiat hi. Tu hun a khemna ituah dan leh, kum 5 khong paisa a ituah dan ana kibang khollou hi, aziak lianpen hidia igintak chuh, iduh ideih te hun atuam dungzui a kikheng zel ahihjiak hikha ding hi(I lunggulh te tungtawn a khemna hong lut ahi). I gensa bang in, khemna ichih i utna te mah tawn a hong pai ahihman ahi hi(Jakob 1:14).
Delhi khopi leh Khemna.
Delhi, India khopi, khovel khangthakte’ vanzat hoih mahmah te omna mun, khutsiam silbawl; mobile leh computerte zanga khovel kilchih a thil omte deih banga hunchih a et theih gige na mun leh mit a muh theih khovel thil thupi tuamtuam mihingte hiip thei thil tampi nek leh dawn, silh leh teen, nop bawlna chikim om na mun ahi, chileng ki genkhial lawmlawm di’n gintak huai lou hi. Hiai bang gam tuh mihing nop taal nuam te din mun hoihpen leng hithei a khemna leng nai diak abatna kilang hi.
Delhi tuailaite hiiptu khemna tengteng gelh kim theilou himahlehang, khenkhat te en khawm ni;
Zaleen kisakna; Zaleenna ichih mahni adiing in hoih hikim vek pahlou hi, a thutuun; mohpuakna pen zoh ahihkeileh. Paunakte 18:1a ah, “Mahni kia a om ut in, ama’ nopsak nading zong ahi”. Mahni kia a iom chiangin ilungsim hon thunun zou thil mahmah a, ahoihlam sang mah inleng ahoihlou lam, thilte hinuam diak lai uh hi, aziakbel setan in hiai hun a ihatlouhdan ana muchiang khin lua ana hi ahi. Khat kia a om ding chih, Pathian deihdan hilou hi (Ecclesiastes 4:9-12, Genesis 2:18). Zalen ikisak luat chiangin, thilhihlouh ding bang va hih khak, va lunggulh khak baihlam mahmah hi. Aziakbel huailam a hon makaih ding setan leng ikiang nai a om gige ahihman hi ahi.
Hun awl hauh na: Hun awl ichih pen, taksa leh lungsim tawldam na dinga poimawh khat ahih lailai in, hun awl deihluatna/hauhluatna in tawldamna sangin, siatna lam ah hong pilut nuam mahmah zaw hi. Sapte thupil in, “Om maimai lungsim tuh setan kibawlkhiakna mun ahi” chi hi. Om zong-zaw tak a om ichih in, ilungsim ah thil tampi hon ngaihtuah sak a, huai leng ahoihloulam thilte hi nuam diak lai hi. Omdan hoihlou ichih pen agah khia hi a, ahong kipat taktak na zaw, ilungsim a setan mun ipiak ziak hi zaw hi.
2 Samuel 11:1-2 -“Huan hichi ahi a, kum a hong kivei a, kumpipate kidou ding a akisakkhiak sek lai un, David in Joab a sawl a, a mite leh Israel mi tengteng toh; huan, Amon suante a hihmang ua, Raba khua a um ua, David bel Jerusalem ah a om hi. Huan hichi ahi a, nitak ni nem in a lupna a kipan in David athou a, kumpipa inn tung ah a kahtou a: huan, inn tung a kipan in numei khat kisil lai a mu hi; huai numei bel mel hoih tak ahi hi.”. Hiai ah, kidouna thu toh hong kipan mahleh, makai ding a kilawmtak Israelte’ kumpipa, David, a inn ah ana om muang hiit-hiat mawk hi. Tua hun pen setan a dingin hun lemchang mahmah suak a, Kumpi David khelhna lam ah pi mang hit-het zou hi.
Khovel hauhsakna deihluatna; I laisiangthou in, sum pen asia in ana gen pah lou hi. 1 Timothi 6:10 –“Sum deihluatna tuh gilou chiteng bul ahi ngal a; huai tuh khenkhat te’n adeih mahmah ua, ginna ataimangsan ua, lungkhamna tampi in amau leh amau a kisun let tetok uhi.” chi hi. Hiai ah, sum deihluatna in mihing lungsim nasatak in zou ahi chih muh theih hi; ginna tai mangsan khophial dingin mihingte thunun zou hitel hi. Mihingte’n ginna itaihmangsan ni tuh, Pathian apat ipial gamlat nipen uh himai ahi. Hiai ah kingaihsiatna in baan hon nei nuam mahmah hi.
Khemnate douzoh diingdan:
Pathian’ ta hihna toh khemna douding: Khemtu setan pen mihing te sanga nak pilzawk lua ahihman in, khem a om ei mihingte a dingin douzoh diing hitheilou hi. Huchi ahihman in, panpihtu kipoimawh hi. Huai panpihtu ding tuh, Khasiangthou ahi hi. Ahihleh, nang leh ke’n Khasiangthou ineita hiam?/ Na piangthak ta hiam? chih kidot huai mahmah hi. Pathian in a itte(Piangthak sate) khemna hon tuaksak zel mahleh, khempuk ai iom ding deihlou hi. Khemnate Pathian’ phalna banga hongtung ahihman in, khemna hong pai peuhmah chiangin, a taikhiakna diing lampi leng bawl ahi chih I laisiangthou 1 Korinte 10:13 ah muh theih in om hi. Hiai taikhiak theihna lampi muhchiang theihna dingin, Sia leh Pha theihna hing neih poimawh hi, huai tuh ikha sisa, hihhing na tungtawn a hong om ahi hi(Pianthakna).
Thuuma toh doudiing: Matthew 26:41- Jesu’n a nungjuite’ kiangah, khemzawh ahihlouh na diing un thuum diingin thuhilh hi. Thuumna ichih chiangin Pathian toh kihouna, hunzat khawmna, i naakna ahi. Hiai thilte gingtute’ hinkhua ah ahong omlouh chiangin i ginna hong bah hi. Huai ahihziakin, Pathian thutak mah a fellowship aom gige poimawh hi. Pathian thutak, gintute a dingin khalam ann ahi. Huai huaiziak in, khalam a ibahlouhna ding un, Jesu’n, a nungzuite kiangah, “Ka niteng nekkhop diing ann hon pia in” chi a thuum dingin ana sinsak hi- Matthai 6:11
Khemna tuaklou dinga thuumding: Matthai 6:13- Mihingte iginna hatlouhdan Jesu’n theichiangluaahihmanin, panpihtu ding hon piak kia hilou in, khemnate khenkhatte Pathian in hong puumpelh(bypass) sak dinga thuum dingin hon sinsak hi. Hiai khemna pen va phut a zoh diing chih hilou in, Pathian toh kithuzak mun/ngetmun/ ihaksatna tea kiang tutna tungtawn a zawhna hi ahi chih thei kawm in, Pathian mai ah kitulut mun dingin i kichial ahi.
Sam 73- Asaph(David’ tumging siamte’ lak a khat) leng eimah bang in khovel mittoh ana hak khakziak in, a khalam nasatak in bah hi, himahleh, Tempul(Pathian’ thu) ah ahong kik in theihsiamna hon nei nawn hi. Matthai 6:33-Pathian in amasa ding leh a nanung ding ana khen hi, Agam leh adiktatna zong masak diing chih ahihlaiin, lehbulh kha ihih leh bel buaina imaban hiding ahi. Matthai 11:28- 30- Jesu’n, tawldamna ahon hi. Tuailai tampite’ hatlouhna tuh ipuakgikte hong puak pih tuding in Jesu ichial khaklouh ziak hikha diing hi.
Thil bangkim ah Pathian masa sak gige ni, huaihileh i sunga om Khasiangthou kipak dinga, huai Kha kipahna ichih Pathian deihlam hi a, Pathian lungkimna in mihingte’ kiangah tawldamna tun hi. -Sam 127:2b
Simtute i Toupa’n hon vualzawl hen, Amen!
