Khovel kinohtak a hing ihi a, a diakin Delhi, Capital of India, tuailai te a ding in opportunities leh challenges tam na mun ahi. Nam tuamtuam leh culture tuamtuam nei te kisuktuahna mun a tuailaite’ lampi dik apan hon pial sak thei tampi om hi. Sahkho lam en zual leng, Christian population as per latest census a 0.96% lel ahi a, a dang teng ahihleh Hinduism, Islam, Jainism, Sikhism ahihkeileh Buddhism ichih te ahi. Huchi ahihna a tuailaite’ I ginna dengdel sak thei ding leh bah sak thei ding tampi om hi. Khemna koia hon kipan a? chih leh, bang chi douzoh ding chihte suut suk ding hi hang.
Tuailai Khristian hinkhua zatna a michih in responsibility liantak kinei chiat hi. Huai I responsibility apan hon lampial sak thei “Khemna” ahi hi. Michih I tuam dungzui un khemna I tuah te uleng tuam chiat hi. Khemna ichih chiang in thil hoihlou ahihkeileh thil diklou khat va hih utna ahi. Khristian context a en leng, laisiangthou toh kituaklou te hih utna tuh khemna ahi.
HIIPTU KHEMNATE KIPATNA:
Jakob 1:14 in “Michih amau utna a hiip leh pimang a a-om chiang un khemna atuak uh ahi zaw hi” ana chi hi.
Gingloumite hindan a hinna: Diuteronomi 13 in Pathian’ I lungtang tengteng, I hinna tengteng a iit ding ahih dan leh pathian dangte I biak ding a hihlouh dan chiang tak in gelh hi. Huai pathian dangte be te leh midang khat ginglou mite hindan zuidia pi lutte tuh a sih ding uh ahi ana chi hial hi.
Theih utna lungtang: Thil khenkhat va theih ut luatna apan leng khemna hon lut thei hi. Hiai tungtanga michih I pilvan uh ngai mahmah hi. 2 Korinthte 11:3 leh 2 Korinthte 1:12 ah Evi, gul in zuaupil a khem bangin, Khrist lam a takna leh sianthouna a kipan bangchi hiam in tuailaite lungsim hihse thei tampi om hi. Etsakna ding in, zu vaki chiam le bang a chi de aw! Laizial ki teep leh bang a chi de aw! Science in huai chi a, a dik mah ahi de aw! Pathian om taktak mah ahi de aw! Chih te tamlo a Khrist lam a pan tuailaite’ lungsim hihse thei khenkhat ahi. Sapilnate pen theihsiam haksa a himahleh Pathian tanchinhoih pen simple in theihsiam baihlam hi.
Utna diklou: Romete 1:28-29, Galatiate 5:19- 21 in khemna chi tuamtuam tampi kim sipsip in ana gen a, huaite ahihleh, diktatlouhna, gitlouhna, huaihamna, huatna a dimna, hazatna, tualthahna, kiselna, gensiatna, migenna, Pathian huat lamte, kisaktheihnate, nu-leh-pa thumanglouhna, thuchiam susete, itna neih louhna leh hehpihna neihlouhna. Hiaite tengteng in Pathian’ thangpaihna tun in amah toh hon ki gamla sak hi.
Lohsap hun leh lungkiat hunah: Tuailaite lam tuamtuam a kitaiteh den ihi a, siamsinna vai ah, sepna vai ah, khotang leh a dangdang a leng. Lohsapna leh lungkiatna tuh I tuah ding him uh ahi. Huai hun chiang in khemna hon pai te Pathian hatna muang in dou ni. Aziak ahihleh, 1 Korinthte 10:13 a, Pathian in I thuak theih val khemna himhim I tung a tungsak lou hi. Amah pen muanhuai a, khemna I tuah hun chiang inleng, I taikhiakna ding lampi abawl zaw hi. Mite tuahsa leh mite tuah lellel khemna te apan hon honkhia thei Pathian kia ahi hi. Khemna I tuahte Pathian in hon ze-etna hi thei hi. Khovel in a pom khelhna a leng a sim nawn lou tampite apan tuailaite pilvang ni. Eg Gay marriage, zu dawn, teep leh muam leh a dangdang.
KHEMNATE DOUZOH NA DINGA PATHIAN POIMOHNA:
Bible a, (1 Korinthte 10:13) imuh bang in khemna chiteng, aneu-alian, I zoh louh ding I tung a Pathian in tungsak lou chih I theih ding ahi. Hiai ahi Pathian nei tuailaite, ginglou mite tunga advantage I neih uh. Khamuanhuai in tha hon pia a, huai kia leng hilou in khemna te apan I suahtakna ding lampi hon bawl sak ahihmanin Pathian min phat in om hen!
Huaiziakin, gingtu tuailaite’n I theih ding leh zuihding om hi-
KHEMNATE BANG CHI DOU ZOH DING:
1) Foundation dik leh kip: Eite hon tanpa Jesu hilhial leng khem leh ze-et in a om chih bible a imu uhi(Matthai 4:1-11), Mark 1:12-13), (Luke 4:1-13).Himahleh Jesu in Pathian’ thute leh a deihdan a kinga in khemna te a douzou hi. Jesu’n eite tan ding a kros a hon sih zoh van a akah ma in kum 3 sung a nungzui te toh hun zang chih leng imu nawn uhi. Nikhat a dakkar 8 zel hun zang khol ding un tuat taleng; kum 3 sungin dakkar 8760 sung Jesu in a nungzui te toh hun zang khawm ding uhi. Tua I gen nungzuite nangawn inleng khemna a tuahte ua panin thanemna neithei uh ahihleh ei tuailaite’n leng I nei mahmah ding uhi. Hilele vualzohna Jesu kiang a om veve. Jesu’n a nungzuite hichiin thuhilh a, “Agam leh ama diktatna zong masa un, huchi in hiaite tengteng ahon piak behlap ding hi”.Hiai apan tuailaite’n I sin theih ahihleh; Pa deihlam zong phot peuhmah leng khemna tuihual lianpen leng a zohna ding tha hon pe dinga, khemna paimang san na ding lampi leng hon kawk muh ding hi.
2) Hatna dinga thumna: Paunakte 24:10 in “Vangsiat ni a na bahleh, na hatna aneu hi” chih ana gelh a, Paunakte mah 4:23 in “Thanopna tengteng toh na lungtang kem in; huai a kipan lah hinna tui nakte a luang ngal a” ana chi nawn hi. Jesu’n Matthai 26:41 a a nungzuite kianga, “Khemna a na lutlouhna dingun kiging gige in thum un; kha in zaw angap a, sa bel a hat kei”, chiin ana thuhilh hi. Khemnate douzohna na dia a poimoh thahatna pen Jesu kiang a om ahihman in, tuailaite’n I thum ua I ngetnget ding uh ahi.
3) Lawmpolh-ah: Hon suse thei leh lampi diklou a hon pi thei ding lawm tuailaite’n kinei chiat ding in ka gingta hi. Amnon, David tapa in a sanggam nu Tamar a iit in a luppih nuam hi, himahleh a adingdan a ngaihtuah khe thei kei hi. Migitlouhpil mahmah khat, amin Jonadab lawmin a nei hi. A lawmpa tungtawn in khelhna thupi tak mai, Amnon in a hihta hi. 2 Samuel 13 sunga. Jonadab bang lawm lak a tuailate I pilvan uh kul hi. I laisiangthou in Pathian limsak loute hoihsak bang a om lou ding leh a lampi ua leng ding lou ding in chiang tak in hon thuhilh hi. Huchi hileh I thilhih peuh a ki lamzang zel ding hi. Sam 1;1- 3 sung a. Tua a hih manin, na tuailai hinkhua mangpha thei pen a hon zat pih thei ding te pawl in.
4) Diabol leh a khemnate taimang sanin: Bangpeuh I maituah ngam louh te ki zou theilou hi. Hoihlou hi a na theih te na hepkhiat tawmtawm keileh omden ding ahi. Na tuailai hinkhua leh Khrist nungzuih na a hon su nawngkai thei te na theih a, koihkhiat dan lampi na zong ngai hi. Aziakbel, I melma pa diabol, humpinelkai humham bang a nek ding zonga vialvak den ahih manin 1 Peter 5:8. Pathian a kitulut in diabol dou lehang, diabol in hon taimangsan ding hi Jakob 4:7. Adiakin, tuailai te lak a pornography leh angkawm na lam a khemna haat diak hi. Sawltak Paul in leng a laikhak te a ana gen tuantuan hi. 1 Korinth 6:18 a Kingaih taisan ding in I biak Pathian in hon deih hi. 1 Thessalonikate 5:22 a gilou chiteng apan kihemkhia dingin Pathian in hon sawl hi. Koimun, koimun a na om hun inleng, na ginna bahsak thei ding hi a theih leh, taimang san in tuailai! Aziakbel, I biak Pathian in amah bang a siangthou dinga hon deih ahihmanin.
Thukhitna: Tukhitna dingin, khemna pen a tak a om mah ahi a, a tuak lou tuailai ki om lou hi. Himahleh, I zohlouh ding khemna Pathian in I tung a hon tungsak lou ahihmanin Toupa min I phat ahi. A thu te pansan in, thuum in, hon suse thei lawm te apan kiveng in leh khemna I tuah hun a taimang san ngam peuh leng Pathian in vualzou hinkhua hon zang sak na kei dia hia? Ka tuailai pihte tengteng Pathian in hon kem henla, hon ompih chiat ta hen!
